Josua 9:8-24

⁸Iwe, ra üreni Josua, “Äm aipwe noum chon angang.” Nge Josua a aisiniir, “Ämi chon ia? Ia oua feito me ie?”

⁹Iwe, ra üreni, “Äm noum chon angang aia feito seni fanü toau pokiten iten ewe Samol mi Lapalap om we Kot. Pun aia rong pworausan, usun mine a föri me lon Isip,

¹⁰pwal meinisin mine a föri ngeni ekewe ruoman kingen chon Amor, ra nom ötiuen ewe chanpupu Jortan, iten eman Sihon ewe kingen Hespon, pwal iten ewe eman Ok ewe kingen Pasan mi nom lon Astarot.

¹¹Iwe, nöüm souakom me chon fanüem meinisin ra ürenikem, pwe aipwe angei amötüm fän iten äm sai o feito pwe aipwe churikemi. Aipwe pwal ürenikemi pwe äm aipwe nöümi chon angang. Aipwe tüngor ngenikemi pwe sipwe eäni eu pwonen atipeeufengen.

¹²Ikkei enem pilawa. Mi chüen pwichikar, lupwen aia uwei seni imwem lon ewe ränin aia popuetä saito remi. Nge nengeni, iei ra pwasapwas o topur.

¹³Ekei lenien wain seni silin man ra minefö, lupwen aia alölöör, nge nengeni, ra kam. Üfem kei me ipwem sus ra mesingau pokiten äm saitam.”

¹⁴Iwe, ekewe re Israel ra etiwa mine ra ngeniir o mongö, nge resap akomwen ais öüröürer me ren ewe Samol mi Lapalap.

¹⁵Iwe, Josua a föri eu pwonen atipeeu ngeni ekewe re Kipeon pwe epwe amanaueer. Nge ekewe souemwenin ewe mwichen Israel ra pwon fän akapel ngeniir pwe repwe apwönüetä ewe pwon.

¹⁶Iwe, ülüngat rän mürin ar föri ewe pwonen atipeeu, ekewe chon Israel ra rong pwe ekewe aramas ir chon arur mi nom lefiler.

¹⁷Mürin ekewe aramasen Israel ra saila o tori än ekewe aramas telinimw lon aülüngatin rän. Nge iten ar kewe telinimw Kipeon, Kefira, Pereot me Kiriat-jearim.

¹⁸Nge ekewe aramasen Israel resap tongeni nirela pokiten än nöür kewe souemwen pwon fän akapel ngeniir iten ewe Samol mi Lapalap ewe Koten Israel. Mürin, unusen ewe mwichen Israel a lal ngeni ekewe souemwen.

¹⁹Iwe, ekewe souemwen meinisin ra üreni unusen ewe mwichen Israel, “Äm aia fen eäni pwon fän akapel ngeniir iten ewe Samol mi Lapalap ewe Koten Israel. Iei mine sisap tongeni afeiengaueer.

²⁰Nge iei meta sipwe föri ngeniir: Sipwe amanaueer, pwe än Kot song esap feitiu woch pokiten sia eäni ngeniir ewe pwon fän akapel.

²¹Sipwe amanaueer, nge repwe chon uwos mwüch me chon üfüf koluk fän itach meinisin.” Iwe, ra föri usun mine nöür souemwen ra üreniir.

²²Iwe, Josua a körato ekewe chon Kipeon o üreniir, “Pwota oua atupukem o üra pwe ämi oua feito seni fanü toau, ngei oua fen nom lefilem?

²³Ren ei oua anümamau. Aramas repwe nöünikemi amanau fansoun meinisin, oupwe uwos mwüch o üfüf koluk fän iten imwen ai Kot.”

²⁴Iwe, ekewe chon Kipeon ra üreni Josua, “Äm noum chon angang aia rongorong pwe a let mine ewe Samol mi Lapalap om we Kot a allük ngeni nöün we chon angang Moses, pwe epwe ngenikemi unusen ewe fanü o arosala chon meinisin me mwemi. Iei mine aia chüngümongüw manauem pokitemi o föri ei föför.