Iosua 9:8-24

⁸Ma dia ga biti tai Iosua: Avet kaum umana tultul. Ma Iosua i ga biti ta diat: To ia avat? Ma avat mamave?

⁹Ma dia ga biti tana: Kaum umana tultul dia vut maro ra gunan vailik ure ra iang i ra Luluai kaum God; tago ave ga valongore ra enana varvai ure, ma ra lavur magit i ga pait ia aro Aigipto,

¹⁰ma ure ra lavur magit i ga pait ia ta ra ura king kai ra tarai Amor ta ra papar a Iordan maro, tai Sikon a king Kesbon ma Og a king Basan nina i ga ki Astarot.

¹¹Ma kaveve umana patuana ma ra tarai ta kaveve gunan par dia ga biti ta vevet dari: Avat a kap ra magit na nian ure ra vinavana, ma avat a vana barat diat, ma avat a biti ta diat: Avet kaum umana tultul; ma go i boina ba dat a pait ra kunubu na bartalaina.

¹²Go ra gem ave ga kap ia upi ra aveve nian i ga malamalapang boko ta nam ra bung ave ga vana kan ra kubakuba i vevet upi avet a tadav avat; ma go, gire, i tar biu ma i kungal;

¹³ma go ra umana paura na vain dia ga kalamana ba ave ga vabuka diat; ma go dia tarada; ma go kaveve umana mal ma ra umana pal a kau i vevet dia tar maulana ta ra ngala na vinavana.

¹⁴Ma ra tarai dia ga tatak ta kadia magit na nian, ma pa dia ga matoto ta ra ngie i ra Luluai.

¹⁵Ma Iosua i ga tata na malmal pire diat, ma i ga vatur ra kunubu pire diat upi diat a laun; ma ra umana luluai kai ra tarai dia ga vavalima pire diat.

¹⁶Ma ba di ga tar pait ra kunubu pire diat, ma i ga par a utul a bung taun ia, dia ga valongore ba dia ki maravai ka, ma ba dia ki livuan ta diat.

¹⁷Ma ra tarai Israel dia ga vanavana mulai, ma ta ra vautuluna bung dia ga tadav kadia umana pia na pal. Ma go kadia umana pia na pal: Gibeon, Kepira, Berot, ma Kiriat-Iearim.

¹⁸Ma ra tarai Israel pa dia ga ubu diat, tago ra umana luluai kai ra tarai dia ga vavalima pire diat tai ra Luluai ra God kai Israel. Ma ra tarai par dia ga tata mukumuk ure ra umana luluai.

¹⁹Ma ra umana luluai dia ga biti ta ra tarai par dari: Ave tar vavalima pire diat tai ra Luluai ra God kai Israel, kari i dekdek upi dat a bili vakaina diat.

²⁰Dat a pait go ra magit pire diat, dat a nur vue diat upi diat a laun, kan ra kankan na tup avet, tago ave ga vavalima pire diat.

²¹Ma ra umana luluai dia ga biti ta diat: Avat a nur vue diat upi diat a laun. Damana dia ga tena kita davai ma tena kulupe tava kai ra tarai par, da ra umana luluai dia ga vatang ia ure diat.

²²Ma Iosua i ga oro pa diat, ma i ga biti ta diat dari: Ta ra ava ava ga tuam pa avet, ma ava ga biti, Ave ki vailik kan avat, ma go ava ki ka livuan ta vevet?

²³Io, avat a kakaina ka, ma avat a ki na vilavilau vatikai, a umana tena kita davai ma ra umana tena kulupe tava ta ra kuba i kaugu God.

²⁴Ma dia ga tata bali Iosua, ma dia ga biti: Tago a dovotina di ga ve kaum umana tultul ba ra Luluai kaum God i ga ve Moses kana tultul ba na tul tar go ra gunan parika ta vavat, ma ba na vamutue ra tarai par dia ki tana ta ra luaina mata i vavat; kari ave ga burut na kaia ta vavat ure kaveve nilaun, ma ave ga pait go ra magit.