Gesese 5

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Adamu isina bukana ede ina. Huia ne Eaubada tau i hetubu, Eaubada ana ao eai ia i hetubu.

²I hetubudi tau eo sine, eo i ainauiaidi, esadi i mosedi Tau, huiana i hetubudi wa.

³Adamu ia borimai handere esega, eo tau‐esega‐i‐mate‐saudoudoi, abo i hemala tama, natuna iabom ana ao eai, eo ia tautauna eai, esana wa ie tore Seta.

⁴Adamu asubenana, huia ne i hemala tama wa murina eai ede borimai handere haligigi‐haiona; nanatunayaao headi tatao eo sisine hinage i labasidi.

⁵Arinai Adamu ena mauri asubenadi maudoidi ede borimai handere haligigi‐hasi eo tau‐esega‐i‐mate‐saudoudoi; abotai ie mate.

⁶Seta ie mia borimai handere esega eo haligigi, muridi eai abo i hemala Inosi tamana.

⁷Inosi se labasi wa murina eai Seta ie mia borimai handere haligigi‐haiona eo haligigi‐labui; ia nanatunayao headi tatao eo sisine i abidi hinage.

⁸Arinai Seta ena mauri asubenadi maudoidi ede borimai handere haligigi‐hasi eo saudoudoi‐labui. Abotai ie mate.

⁹Inosi ie mia wa borimai tatao‐hasi‐se‐mate‐saudoudoi, abotai i hemala Kenana tamana.

¹⁰Kenana se labasi wa murina eai Inosi borimai handere haligigi‐haiona eo saudoudoi‐haligigi ie mia, eo nanatunayao headi tatao eo sisine ie abidi hinage.

¹¹Arinai Inosi ena mauri asubenadi maudoidi ede handere haligigi‐hasi eo haligigi; abotai ie mate.

¹²Kenana ie mia borimaina tatao‐haiona‐se‐mate‐saudoudoi, abo i hemala Mahalalela tamana.

¹³Mahalalela se labasi murina eai Kenana ie mia borimai handere haligigi‐haiona eo tatao‐labui‐se‐mate, eo nanatunayao tatao eo sisine headi i abidi.

¹⁴Arinai Kenana ena mauri asubenadi maudoidi ede borimai handere haligigi‐hasi eo saudoudoi; abotai ie mate.

¹⁵Mahalalela ie mia borimaina tatao‐haiona‐se‐matehaligigi, abo i hemala Iareda tamana.

¹⁶Iareda se labasi wa murina eai Mahalalela borimai handere haligigi‐haiona eo tau‐esega‐i‐mate‐saudoudoi, eo nanatunayao tatao eo sisine headi i abidi.

¹⁷Arinai Mahalalela ena mauri asubenadi maudoidi ede borimai handere haligigi‐haiona eo tatao‐hasi‐se‐mate‐saudoudoihaligigi; abotai abo ie mate.

¹⁸Iareda borimai handere esega eo tatao‐haiona‐se‐mate eo labui ie mia, abo i hemala Enoka tamana!

¹⁹Enoka se labasi wa murina eai Iareda borimai handere haligigi‐haiona ie mia, eo nanatunayao tatao eo sisine headi i abidi hinage.

²⁰Arinai Iareda ena mauri asubenadi ede borimai handere haligigi‐hasi eo tatao‐haiona‐se‐mate eo labui; abotai ie mate.

²¹Enoka borimai tatao‐haiona‐se‐mate eo haligigi ie mia, abo i hemala Metusela tamana.

²²Metusela se labasi wa murina eai Enoka Eaubada maena se laulau borimai handerehaiona, eo nanatunayao tatao eo sinine headi i abidi.

²³Arinai Enoka ena mauri asubenadi maudoidi ede borimai handere haiona eo tatao‐haiona‐se‐mate eo haligigi.

²⁴Enoka Eaubada maena se laulau esega, i lau e ia nige’e, paana Eaubada ia i abiya’o.

²⁵Metusela ie mia borimaina handere esega, eo tatao‐hasi‐se‐mate haligigi‐labui, abo i hemala Lameka tamana.

²⁶Lameka se labasi wa murina eai Metusela ie mia borimai handere haligigi‐labui eo tatao‐hasi‐se‐mate eo labui, eo nanatunayao tatao eo sisine headi i abidi.

²⁷Arinai Metusela ena mauri asubenadi maudoidi ede borimai handere haligigi‐hasi eo tatao‐haiona‐se‐mate eo haligigi‐hasi; abo ie mate.

²⁸Lameka borimai handere esega eo tatao‐hasi‐se‐mate eo labui ie mia, natuna tau esau se labasi.

²⁹To esana wa ie tore Noa, i ene, “Tano GUIAU i ribahemate wa boeana eai te ina ta abo aba‐aiyawasina i leama, ada paisoa arinai eo nimada edi paipaisoa aridi eai.”

³⁰Noa se labasi wa murina eai Lameka ie mia borimaina handere haligigi eo tatao‐hasi‐semate‐saudoudoi‐haligigi, eo nanatunayao headi, tatao eo sisine i abidi.

³¹Arinai Lameka ena mauri asubenadi maudoidi ede borimai handere haligigi‐labui eo tatao‐haiona‐se‐mate‐sau‐doudoi‐haligigi‐labui; abo ie mate.

³²Noa borimai handere haligigi ie mia, abo i hemala Sema, Hama eo Iapeta tamadi.