Gesese 2

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Doha ina galewa eo tanoubu se heohidi, ginauridi maudoudoidi.

²Na asubena hehaligigi‐labuina eai Eaubada paisoa i paisoaei wa, i heohi, arinai asubena hehaligigi‐labuina eai ana paisoa gamagaridi wa i aiyawasiedi.

³Arinai Eaubada asubena hehaligigi‐labuina i ainauiai eo i hetabuei, paana arinai Eaubada ana paisoa wa i aiyawasiei, ena hetuhetubu paisoana wa.

⁴Galewa eo tanoubu huia hetubudi wasadi. Asubena eai ne GUIAU Eaubada tanoubu eo galewa i ginauridi.

⁵Huiana ne sora nige oea ginaurina ini’inina esau tano eai i tubu, eo sora nige oea lagauna i inisaema, paana GUIAU Eaubada sora nige nabu i hetaru tano eai, eo sora nige tau esau tano i giari;

⁶na goura mo tano eai ie sae, iaede tano maudoina i hebuta.

⁷Abotai GUIAU Eaubada tau i hetubu tanoubu muamuana eai, mauri eahuana i eahualau isuna eai; abo tau wa i hemala doga ma earuana maumaurina.

⁸Abo GUIAU Eaubada oea i umai Edena eai, tupo aruabu eai, temetai abo tau wa ie tore, iaede i ginauri wa.

⁹Eo tano eai GUIAU Eaubada oeagi gamagaridi i hetubudi, isi ede adi ao se lolo, eo isi hinage aiaidi se lolo; mauri oeagina hinage oea duaduarina eai, eo lolo eo baaea italobaina oeagina hinage.

¹⁰Saga esau Edena eai i didipesa, oea wa ana goila, abo i hemala saga hasi.

¹¹Bagubagunana esana Pisona; ia ede i lau Havila tehana maudoina i hetaiiri, temetai gold wa;

¹²eanua ne ena gold i lolo dumaduma; bedelium eo onyx we’una hinage metai.

¹³Saga helabuina esana Gihona; ia ede Kusa oeana maudoina i tauhetaiiri.

¹⁴Hehaionana esana ede Hidekela, Asiria tupo aruabuna eai ie lau. Eo saga hehasina ede Euparatea.

¹⁵GUIAU Eaubada tau wa ie abi ie tore Edena oeana eai, bena i giari eo i itawatai.

¹⁶GUIAU Eaubada tau wa i lauhesom, i ene, “Oea ta oeagina gamagaridi uauadi abo au ainapaidi;

¹⁷na lolo eo baaea italobaina oeagina iabom mo taba nige au ai, nei asubenana eai ne au ai abo au mate.”

¹⁸Abo GUIAU Eaubada i ene, “Nige i lolo tau iabom mo i mia; ana sagu abo ea ginauri abo i lau loloei.”

¹⁹Arinai tano eai GUIAU Eaubada oea suisuidi gamagaridi, eo eada manudi gamagaridi i hetubudi, eo i woeaidima Adamu arinai, ia bena esadi i toredi, eo Adamu wa esa saha i mosedi ginauri maumauridi gamagaridi eai, isi esadi ede.

²⁰Adamu esa i mosedi suisui gamagaridi oea eai taumia; na Adamu iabom sora nige ana sagu mamohoina se lobai.

²¹Arinai GUIAU Eaubada Adamu i heenomate, ia ma eno‐matena oitarina esau i abihai eo bulumana i hemauuioi;

²²eo wau oitarina wa GUIAU Eaubada tau lisilisina eai i niusihai wa, arinai sine i ginauri, eo i woeaiyama tau arinai.

²³Abo Adamu i ene, “Teina abotai ede siadagu siadana, eo bulumagu bulumana; ia esana abo se atai Sine, paana tau arinai se abihaiyama.”

²⁴Arinai ede tau tamana eo sinana abo i laugabaedi i patudidini monena arinai, eo isi se hemala bulumadi esega.

²⁵Wau tau wa ma monena isi taudi labui ma kohakohadi, na nige se taumaeamaea.