FƐCANYƐ̀NFƐ̀ 4

1

2

3

4

5

6

7

8

¹N cɑ̀ɑ̀ nhɑ wennimu, ɑ tú oposɑ́ɑ́tì nwe, ɑ ɔ̃ ndɑ́ɑ́tí kuyɑ̀ɑ̀kù kɑ̀ɑ nɔmbii ndònnɛ̀ fɛduonfɛ kɔ̃mɛ mmɛ. Kɑ̀ɑ yùtì dònnɛ̀ yɛbɔdɑkɛ̀ yɛ̀ɛ̀ pùù yɛtɑ̃rɛ̀ ĩ́nkɛ̀.

²Kɑ̀ɑ nìì mpɛ̀íkù dònnɛ̀ kupecɛ̃nku, bɛ̀ kɛ̃ĩ́ ìì pe kó ticìtì kɛ ì wùɔ̀ kɛ̀ ì yɛ̀tìní. Imɔu kɛ̀ ì dò nhɛ̀rɛ, kɛ bo imɔu bɑ́ fɛ̀mɑfɛ̀ í kpɑ.

³A bìɛ̀ ndònnɛ̀ kuyɑɑ̀wũɔ̃kù nku, kɑ̀ɑ nɔ́ndɛnfɛ̀ wenni, ɑ ɔ̃ nkɑ̀ɑ dɑ́ɑ́tí kuyɑ̀ɑ̀kù ɑ bɑɑ̀ nní ndònnɛ̀ yɛtebɛ bɛ̀ tu yɛ̀ kèdènɑ́tì yɛ̀ kó diyɑtirì ndi.

⁴Kɑ̀ɑ fɔ̃̀níí dònnɛ̀ Dɑfiti kó didènnì, bɛ̀ mɑɑ́ dì kɛ̀ dì dò ncírícírí, kɛ̀ tidɔpììtì tɛkɔupíítɛ̀ (1000) dì nùú. Bɛkpɑ̀rìnuɔmbɛ kó tidɔpììtì.

⁵A mɛ yɛdɛ́ dònnɛ̀ kupɛriniku nku, kɛ dònnɛ̀ fɛwɑurìfɛ̀ kó yɛtɑ́ɑ́tɛ́bɛ, yɛ̀ɛ̀ cèntì mutepóó nhɑ̃ dɛ̀.

⁶Diyiè bo nkpɑɑ́ kɛ í tònkɛ̀, kɛ̀ mɛdɛ́ɛ̀ mmu nyí pɛ̃ɛ̃tɛ́ kɛ̀ n kɔtoomu, míírì tie mbɛ̀ dɔ̀ɔ̀rinɛ̀ dɛ̀ tùdɑ̀ɑ̀rí dɛ̀ bo dìì tɑ̃rì, tihúúntì tie, bɛ̀ tu tì ɑ̃̀nsɑ̃́ɑ̃̀ kó tɛtɑ̃tɛ̀.

⁷A tú osɑpùnsɑ́ɑ́tì nwe, n cɑ̀ɑ̀ nhɑ í ɑ̃ kuyɛ̀nkù kupíkù mɑkù.

⁸Fɔ̃́ m pocɛ̃nnì, ítɛ́ní kutúúkù Dimɑɑ kɛ́kɔtɛní kɛ̀ tí nnɛí, ɑ itinímu Amɑnɑ kɛ̀ ti bo nnɛí, ítɛ́ní ditɑ̃rì Seii nɛ̀ Ɛdimɔnni kpɛri. Cokɛ́nɛ̀ yɛcìrícìrɛ̀ kɛ́kɔtɛní. Dɛ kó yɛtɑ̃rɛ̀ tu yɛkpɑmɑɑ̀ nkpɛyɛ nyɛ.

⁹A tɑ n yɛ̀mmɛ̀ mmɛ n tɑ̃ũ̀, m pocɛ̃nnì, ɑ n wèńtɛ́ kucɛ mɛ̀mɑ́ɑ̀ ndi kɛ̀ n yɛ̀mmɛ̀ kɛ̃ɛ̃́ nkɛ dɑ tɑ, mɛdɛ̀ì nhɑ dúúkúmɛ̀ mɛɛ̀ yũ̀ɔ̃́ n yɛ̀mmɛ̀.

¹⁰N cɑ̀ɑ̀ nhɑ kɑ́ɑm̀mù n nɑɑtimu, ɑ kɑ́ɑm̀mù ɔ̃ nni nnɑɑtimu kɛ pɛ̃ɛ̃tɛ́ mɛnɑɑ̀, ɑ kó kufɔ̃ɔ̃ku n nɑɑtimu kɛ pɛ̃ɛ̃tɛ́ tùdɑ̀ɑ̀ríbɛ̀ bɛmɔu.

¹¹M pocɛ̃nnì ɑ bìɛ̀ n wɛ̀ɛtimu, mɛcekùɔ̀ ndòmmɛ̀, ɑ nɔ́ndɛnkù dò nkù ɑ̃ mɛcekùɔ̀ mmɛ nɛ̀ mɛnɑɑmiɛ̀, ɑ yɑɑ̀bòrɛ̀ fɔ̃ɔ̃ku dònnɛ̀ kutúúkù Dimɑɑ kó kufɔ̃ɔ̃ku nku.

¹²N tɑ̃ũ̀, m pocɛ̃nnì, ɑ dònnɛ̀ dikũmpúrì sɑ̀ɑ̀rì ndi dìì dìti, m mɑ́ɑ̀ n kó tɛbintɛ, m mɑ́ɑ̀ n kó dinɛ́bòrì.

¹³A boomu kɛ dònnɛ̀ dɛtie mbɛ̀ tu dɛ̀ kèdènɑ́tì dɛ̀ɛ̀ bo kupúú sɑ̀ɑ̀kù, kɛ pɛí yɛbɛ kɛ̀ yɛ̀ nɑɑti, kɑ̀ɑ fɔ̃ɔ̃ku dònnɛ̀ tùdɑ̀ɑ̀rí bɛ̀ tu wè ɛdéè.

¹⁴A kó kufɔ̃ɔ̃ku dònnɛ̀ tùdɑ̀ɑ̀rí bɛ̀ dɔ̀ɔ̀nɛ̀ wè nwe dɛtie mbɛ̀ tu dɛ̀ nɑ́ɑ́rì nɛ̀ dodiè nɛ̀ kɑ̀nɛ́dì nɛ̀ míírì nɛ̀ ɑ̀dòwɛ́ɛ̀ nɛ̀ dɛtɛrɛ̀ dɛ̀ɛ̀ kó dimɑ̀ɑ̀ fɔ̃̀ɔ̃́tí.

¹⁵Kɛ dònnɛ̀ kupúú kó tɛbintɛ, kɛ dònnɛ̀ mɛnɛ́sɑ̀ɑ̀mɛ̀ kó tɛmintɛ tɛ̀ɛ̀ pũɔ̃̀nní Dimɑɑ túúkù kó ditennì.

¹⁶Kubɑkù yoú kó muyɑɑ́ nɛ̀ kubɑkù cɑ̃̀nku kɔ̃mu kɔtɛnɛ̀ní kɛ́fuutɛ n kũmpúú, kɛ̀ kufɔ̃ɔ̃kuu dɑ́tínnɛ́, fɔ̃́ n dɑcɛ̃nnì kɔtɛní ɑ púú miɛkɛ kɛ́di ɑ tebɛ sɑ̀ɑ̀yɛ̀, yɛnɑtiyɛ̀.