Brabli Gudwan Song 4

1

2

3

4

5

6

7

8

¹Yu brabli purdiwan, main olgamen! Yubin gaburrumap miselp feis garram heinggitjif, bat det dubala ai blanga yu brabli shainiwan en yu shoum mi yu laigim mi. En wen yu larramgo yu heya im brabli blekwan en shainiwan.

²Blanga yu tuth, im brabli waitwan laik det ship wen dei kadimbat blanga im wul en washim im. Holot jis rait, en yu nomo bin lujim eni tuth.

³Blanga yu mawus, im jis laik redwan ribin. En wen yu toktokbat, yu luk brabli purdiwan. Wen yu gaburrumap miselp, yu feis stil shain biyain langa det heinggitjif.

⁴Det nek im longwan en im brabli purdiwan blanga yu, en yu nekleis im garram bigismob purdiwan ting heinginap raidaran langa yu nek.

⁵Blanga yu milk dubala brabli raunwan jis laik det dubala popo.

⁶Ai garra pudum main hed langa det dubala hil weya ola gudsmelwan medisin gro, raidap ailibala wen det win blo, en det dakbala gowei.

⁷Main olgamen, yu purdiwan, en yu luk brabli purdiwan ebridei.

⁸Main pramis, kaman na. Yunmi garra libum Lebanan hil kantri. Yunmi garra gowei brom det bigwan hil gulum Amana, en brom det dubala hil gulum Senira en Heman, weya ola laiyan en lepad oldei jidanbat.

⁹Det wei yu luk langa mi, main pramis, en det nekleis yu werrimon, meigim mi brabli hatjamp.

¹⁰Yu luk brabli purdiwan langa mi, main pramis. Dumaji yu laigim mi detmatj, yu mobedawan langa det wain, en det smel blanga yu im mowa gudwan langa enijing.

¹¹Det mawus blanga yu im teist laik shugabeig, main pramis, en det tang blanga yu im teist laik milk en shugabeig langa mi. En yu klos im smel brabli gudwan laik det gudsmelwan medisin tri.

¹²Main olgamen, yu jis laik det speshalwan gadin. Det gadin garram wol raidaran, en im garram im ronwan springwoda.

¹³Deya na ola plent oldei gro gudwei. Det gadin growimap detlot pamagrenit tri, en olkain gudwan frut daga. Det gadin growimap olkain plent blanga gudsmelwan medisin, en blanga meigim det daga teist gudwei.

¹⁵Yu na jis laik det woda weya im randan en wodarim det gadin, en jis laik det springwoda weya im oldei jidan fulwan, en detlot lilwan krik weya kamat brom Lebanan hil kantri.

¹⁶Win brom nowathwei, yu gidap na! Win brom sauthwei, yu gidap du! Blo langa dijan gadin, en meigim ola ebrijing langa dijan gadin smel gudwan. Main olmen, yu garra kaman iya langa main gadin, en dagat ola gudwan frut weya yu wandim dagat.