Ngën-gi-woy 4

1

2

3

4

5

6

7

8

¹Yaaka rafet, xarit, yaaka taaru! Sa gët yi niy pitax, làqoo muuraay bi, njañ liy loy-loyee ngi saf géttu bëy yu ñuul yu bartaloo kaw tundu Galàdd.

²Sa gëñ yi weex ni xar yu ñu wat ñuy yéege ca sangukaay ba, ku nekk ak seexam, kenn wéetu ca.

³Sa tuñ yi mel ni wëñ gu xonq curr, ndaw gémmiñ gu jekk! Sa lex yiy tàkk ni ŋaali gërënaat, làqoo sa muuraay bi;

⁴sa loos wi ne coleet ni tatay Daawuda, mërgalu ba jekk, caq bay lang ni junniy kiiraayi jàmbaar.

⁵Sa ween yi ni ñaari tef, mbaa seexi kéwél yuy fore digg tóor-tóor yi.

⁶Balaa jant a fenk, ker gàddaay, ma ne coww diggante tund wa ndàbb ne bann, ak tund wa xas ma neexe.

⁷Xarit, sa lépp a rafet, sikk nekkul ci yaw.

⁸Séet sama, jógeel Libaŋ, jege ma, bawool Libaŋ, jegesi ma. Wàcceel colli Amana ak colli Senir ak Ermon. Génnal xunti gaynde yooyook tundi segg ya.

⁹Jigéen sama, séet sama, benn yoon nga ma xool, sama fit ne tërit. Sa benn peru caq rekk, sama fit ne tërit.

¹⁰Jigéen sama, séet sama, sa mbëggeel a neex! Sa mbëggeel a dàq biiñ, sa diw yu xeeñ dàq luy cuuraay.

¹¹Séet sama! Lem ay xellee sa gémmiñ, lem ak meew lal sa làmmiñ. Sa xetu yére xetu àllub Libaŋ la.

¹²Jigéen sama, séet sama, yaay tóokër bu tëje, yaay seyaan bu tëje, di bëtu ndox bu saañe.

¹³Yaa di toolub gërënaat bu naat, meññ ngën-gi-meññeef ak fuddën ak reen yu xeeñ,

¹⁴muy reen yu xeeñ, safroŋ, barax, kanel, ak xasoo xas mu xeeñ, ndàbb ak alowes ak lépp lu xeeña xeeñ.

¹⁵Yaa di bëtu ndox ci tool yi, di teen bu fees ak ndox muy daw, wale tundi Libaŋ.

¹⁶Yaw, ngelawal bëj-gànnaar, yewwul, ngelawal bëj-saalum, dikkal, wolal-leen ma sama tool bi, mu gilli; sama nijaay dugg toolam, xéewloo ngën-gi-meññeefam.