FƐCANYƐ̀NFƐ̀ 1

1

2

3

4

5

6

7

8

¹Sɑdomɔɔ wɑ̃̀ri fɛ̀ɛ̀ cɑnyɛ̀nfɛ̀.

²Á nh ɔrí, ɔrí mí nwe, n dɑ dɔ́ kɛ̀ dɛ̀ m muɔ́mmu kɛ pɛ̃ɛ̃tɛ́ mɛnɑɑ̀.

³A fɔ̃ɔ̃ku dònnɛ̀ tùdɑ̀ɑ̀rí kɔku nku, ɑ yètìrì tu tùdɑ̀ɑ̀rí nwe, dɛɛ̀ te kɛ̀ isɑmpùmbí dɑ dɔ́.

⁴N yṹɔ̃́nko ɑ borɛ̀ kɛ̀ ti cokɛ́ okpɑ̀ɑ̀tì ń tɑnnɛ́ ɑ cĩ́ɛ̃̀tɛ̀, dɛ̀ bo nti nɑɑti tidɛ́, kɛ̀ tí nwɛi, n dɑ dɔ́ kɛ̀ dɛ̀ m muɔ́mmu kɛ pɛ̃ɛ̃tɛ́ mɛnɑɑ̀. Isɑpùmbí nɑɑtimu, ì mɛ̀ ndɑ dɔ́mɛ̀.

⁵N sɔùmu, kɛ nɛ́ wenni, n wenni kɛ dònnɛ̀ Kedɑɑ ɛì kó tiyɑ̀ɑ̀tì nti, kɛ dònnɛ̀ Sɑdomɔɔ cĩ́ɛ̃̀tɛ̀ kó tiyɑɑ̀sɑ̀ɑ̀tì. Sedisɑdɛmmu ɛì kó bɛsɑpɑ̀mbɛ̀,

⁶Bɑ́ ndɑkɛnɛ̀ nkɔ̃nsɔ̀ùtì kpɛti, diyiè diì n tùɔ n yɔ̃fũ̀ɔ̃̀ kɔbɛ miɛkɛ kɛɛ̀ m pɛ́ì kɛ̀ bɛ̀ m bɑ̀nnɛ dɛtie mbɛ̀ tu dɛ̀ fínyĩ̀. N kpɛrɛ bomu m mɛ nyí dɛ̀ bɑ̀ɑ.

⁷Fɔ̃́ n dɔ́ wè ɑ nɛ́ n nɑ́kɛ́, ɑ kɔrinɛ̀ kɛ̀ ɑ wũɔ̃ kɛ bo ì cɛ̃mmú. Diyiè bo nyóó cónnɛ́ yɛyɔ kɑ̀ɑ ì ompùnnɛ dɛ? Kɛ̀ dɛ̀ɛ yié nkɛ̀ m bɑ́ nh ɑ̃́ɑ̃́ nhɑ nɛ́pobɛ̀ wũɔ̃cɛ̃nku miɛkɛ.

⁸Kɑ̀ɑ í kù yɛ̃́ fɔ̃́ mbɛnitipowennibɛ kóo wenniwe, yɛ̀roo kɛ́tũnnɛ ipe kó yɛnɑcɛ̀nɑ̀, kɛ́ncɛ̃mmú ɑ bɔbí kɛ́kɔtɛ bɛnɑɑcɛ̃mbɛ kó titouti borɛ̀.

⁹A wenni kɛ dònnɛ̀ Esibiti kóo kpɑ̀ɑ̀tì kó tɛsɑ̃ntɛ̀ tɛ̀ɛ̀ dɛ̀ri okpɑ̀rìnɑɑsɑ̃ntɛ̀ ntɛ.

¹⁰A ììkɛ̀ yienɛ̀mu yɛtootɔ̃rɛ kɑ̀ɑ fɔ̃̀níí yiennɛ̀ mɛdɛ̀ì.

¹¹Ti yóó dɑ dɔ̀ɔ̀ mɛsɔɔ nkó mɛdɛ̀ì mmɛ, kɛ́ mɛ dɑ̀ri timɑ́tì pɛ́ítì.

¹²Okpɑ̀ɑ̀tì bonɛ̀mu o kɔbɛ kɛ̀ n kó mɛteniɛ nfɔ̃ɔ̃mɛ kó kufɔ̃ɔ̃ku yiɛ̀.

¹³Odɑsɑ́ɑ́tì n yɛ̀mmɛ̀ kou ɑ dò m borɛ̀ tùdɑ̀ɑ̀rí bɛ̀ tu wè míírì o kó fɛbɑtifɛ nfɛ. Kɛyènkɛ̀ ɑ ɔ̃ nduɔ́ m mɛ sɑku nku.

¹⁴N dɑcɛ̃nnì n yɛ̀mmɛ̀ kou ɑ dònnɛ̀ mutie bɛ̀ tu mù ɛnnɛ́ɛ̀ mu kó mupóó mmu, mùù bo fínyĩ̀ kó kupɑku miɛkɛ.

¹⁵M pocɛ̃nnì n yɛ̀mmɛ̀ kou ɑ wennimu, kɛ mɛ̀nkɛ wenni. Kɑ̀ɑ nuɔ ndò nfɛduonfɛ kpɛyi.

¹⁶N dɑcɛ̃nnì fɔ̃́, ɑ wennimu kɛ mɛ̀nkɛ wenni. Ti kó didɔ́ù yɔ̀ɔ̀ nkɛ dònnɛ̀ tifɑ̃ɑ̃̀bɛ́ntì nti.

¹⁷Ti kó tɛcĩ́ɛ̃̀tɛ̀ kó yɛsɑ̃ǹkɛ̀ tu sɛ́tìrì kó dɛtie ndɛ, kɛ̀ ti cĩ́ɛ̃̀tɛ̀ kó itempìeti tú dɛtie mbɛ̀ tu dɛ̀ sìpɛ̀rɛ́sì dɛ kó tidɑbɛɛtì.