Soloumane ea Gesami 4

1

2

3

4

5

6

7

8

¹“Na dogolegei! Di da baligiliwane noga:i ba:sa! Dia si da dia odagi dedebosu abula baligadili, nenemegisa. Dia dialuma hinabo da goudi wa:i amo da Gilia:de agologa soagagala: ahoa agoane ououloba dabe ba:sa.

²Dia bese da sibi amo da hinabo waha dafoga:i amola dodofei agoane, folowaidafa ba:sa. Afae da hame gui ba:sa. Ilia huluane defele dadalei ba:sa.

³Dia lafi gadofo da yoi efe agoai gala. Di da sia:sea, amo da noga:idafa ba:sa. Dia ba: dia odagi dedebosu abula baligadili, da nenemegisa.

⁴Dia asogoa da Da:ibidi ea diasu gado gagagula heda:i agoane, ononoi amola hohona:boi ba:sa. Dia gisa:gisu ga:i da da:igene ga:su 1000 agoane legei ba:sa.

⁵Dia dodo da ‘gasele dia’ ohe aduna lalelegei amo da ‘lili’ bugi ganodini ha:i nanebe agoai ba:sa.

⁶Na da gabusiga: ‘me’ agolo ganodini esalumu. Hahabe fo da fulabosea amola gasi da alalolesisia fawane yolesimu.

⁷Na dogolegei! Di da noga:idafa ba:sa. Di da baligili noga:idafa.

⁸Na uda! Ani Lebanone Goumi alelaloi amo fisili ahoa:di! Lebanonega ani ahoa:di! Amana Goumi da:iya gado amoga gudu sa:ima! Amola Sine Goumi amola Hemone Goumi (amoga laione wa:me amola lebade wa:me fi diala) amoga gudu sa:ima!

⁹Di da na dogolegei amola na uda! Dia siga ba:be amola dia gisa:gisu ga:i amo da fedege agoane, na dogo wamolai dagoi.

¹⁰Na dogolegei amola na uda! Dia sasagesu hou da nama hahawane hamosa. Dia sasagesu hou da waini hano ea hedai baligisa. Dia gabusiga: da hedama:ne fodole nasu ea hedabe baligisa.

¹¹Na dogolegei! Agime hano ea heda da dia lafi gadofo da:iya diala. Dia gona:su da nama dodo maga:me amola agime hano agoai gala. Dia abula ga:i gabusiga: da Lebanone ea gabusiga: defele gala.

¹²Na dogolegei, na uda da muguniai ifabi amola gagoiga sisiga:i ifabi amola hisu nasu hano bubuga:su agoai gala.

¹³-

¹⁴Amogawi bugi liligi da noga:le heda:sa. Ilia da ‘bomegala:nidi’ bugi defele heda:sa. Amola amoga fage noga:idafa legei dialebe ba:sa. Amogawi, hedama:ne fodole nasu amola gabusiga: manoma hamosu bugi huluanedafa dialebe ba:sa. Amo da hena, nade, sa:falone, ga:lamase, sinamone, me, a:lou amola gabusiga: manoma hamosu bugi huluane.

¹⁵Ifabi hano soga:su da hano nawa:li amo Lebanone Goumi alelaloi amoga dalebe ba:sa.” Uda da amane sia:i,

¹⁶“Ga (north) fo amo nedigima! Ga (south) fo amo na ifabia fulaboma! Hisi amo gabusiga: amoga nabalelesima! Na sasagesu dunu ea ifabia misa:ne amola amo ea fage legei noga:idafa moma:ne, logo doasima.”