1Gubin e girdi’ nu Judah nra mel’eged Uzziah ni ragag nge n’el e duw yangren nib mo’on ni fak Amaziah ni nge yan nga luwan e chitamngin nge mang pilung. (
2Nga tomuren e yam’ ni tay Amaziah me kol Uzziah yu Elath u fithik’ e mael nge fal’eg fare binaw bayay.)
3Uzziah e ragag nge n’el e duw rok me mang pilung, me gagiyeg u Jerusalem ni wugem nge l’agruw e duw. Chitiningin e Jekoliah nu Jerusalem.
4Me folwok rok e chitamngin nge rin’ e tin nib m’agan’ SOMOL ngay.
5Zekariah e ir e tafanow rok Uzziah ni i fil ngak ni ngi i fol rok Got. Ere n’umngin nap’an ni i par Zekariah nib fos, ma i par Uzziah nib yul’yul’ ngak Got, me fal’eg Got wa’athan.
6Me m’ag Uzziah e mael ngak piyu Filistia. Me buthug nga but’ e yoror ko fapi binaw nu Gath, ngu Jamnia, ngu Ashdod, miki fal’eg boch e binaw nib gel ni fan ko mael u to’oben yu Ashdod nge gin kabay u Filistia.
7Me ayuweg Got nge gel ngak piyu Filistia, nge piyu Arab ni yad ma par u Gurbaal, nge yu Meun.
8Yu Ammon e ur pi’ed e walbuw rorad ngak Uzziah, me gel gelngin nge wear thin nge mada’ nga Egypt.
9Me gelnag Uzziah e yoror ni fan ko mael u Jerusalem ni ubung e pi wulyang ni tafen e damit ko bin Tabthung e Garog, nge bin Loway e Garog, nge gin ni chiygog e rungrung riy.
10Miki ubung e pi tagil’ e damit ni kan yororiy ni fan ko mael u daken e ted me fu’og e luwed nib yo’or, ni bochan e bay yu ran’ i gamanman rok u enggin e purey’ nge yungi tafelfel’ u ba’ ni ngal. Ri ba’adag e milay’, ma aram me tay ir ko girdi’ ni ngar yunged e milay’ ni grape ko gin ni go’ burey mi ni wolduguy e gin nib yung’ol e but’ riy.
11Ma immoy barba’ i salthaw nib ga’ ni yog ngorad ni ngar fal’eged rogorad ni fan ko mael. Ma en nma yoloy murung’agen e re raba’ i salthaw nem e fa gali tayol i Jeyel nge Maaseyah nrogon ni be tay Hananiah murung’agen, ni reb i chonggin e maruwel rok e en pilung.
12Re raba’ i salthaw ney e l’agruw e bbiyu’ nge n’el mir’ay e pi tolang ni yad ma gafaliy.
13Ma 307,500 e salthaw ni yad bay u tan pa’rad nrayag ni ngar chamgad ni bfel’ rogon nib togopluw ngak e pi to’ogor rok fare pilung.
14Me pi’ Uzziah ngak fa raba’ i salthaw e pin’en nib aray: yungi shield, nge sarey, nge urwach ko salthaw, nge madan e mael, nge gat’ing nge gan, nge malang ni gan e gawul.
15Ma pi’in yad ma sunmiy tatalin ban’en ni fen u lan yu Jerusalem e ra ngongliyed talin e mun gat’ing nge fen e mun malang nib ga’ u p’ebugul e wulyang nge pi tabthung ko yoror ko fare binaw. Me wear bugwan Uzziah u gubin yang, mri gel gelngin ni bochan e ayuw rok Got ngak.
16Machane nap’an ni par Uzziah ni Pilung nike gel gelngin me tolngan’, ma aram tapgin me mul pa’ ko pilung. I dariyfannag SOMOL ni Got rok ni bochan e yan ngalan fare Tempel ni nge urfiy e incense u daken fare altar ko incense.
17Me lek Azariah ni prist fare pilung nike un 80 e prist ngak ni yad ba gel mab m’uthan’rad
18ni ngar taleged. Me lungurad ngak, “Uzziah! Dariy mat’awum ni ngam urfiy e incense ngak SOMOL. Kemus ni prist ni pi’in owchen Aron e kan tabgul nagrad ni ngu’ur rin’ed e bin e maruwel. Mu chuw u lan e re ngin’ey nib thothup. Ka mu kirebnag laniyan’ SOMOL ni Got, ma dabki fal’eg wa’atham.”
19Ba sak’iy Uzziah u rom u lan fare Tempel u barba’ i to’oben fare altar ko incense ni be kol ban’en ni yima urfiy e incense ngay. Mri damumuw ngak fapi prist, ma ka ngiyal’nem me for e malad u daken peri’.
20Mi yigi lik’ath Azariah nge fa tinem e prist nga peri’ fare pilung ni kar tamdaggad, ma aram miyad suruy ni nge chuw u lan fare Tempel. Me gurnag ir ni nge yan nga wean, ya ke gechignag SOMOL.
21Me par Uzziah ni Pilung nnum’ngin nap’an e yafos rok nib ta’ay ni bochan e re m’ar rok nem. Ma dakiyag ni yan bi’id ngalan fare Tempel, mi i par u lan e naun rok, ni da ki rin’ urngin e pi maruwel rok, ma ngiyal’nem e Jotham nib mo’on ni fak e i gagiyegnag fare nam.
22I Isaiah ni profet nib mo’on ni fak Amoz e ke yoloy urngin e tin kabay ban’en ni i rin’ Uzziah ni Pilung u nap’an e gagiyeg ni i tay.
23Me yim’ Uzziah mi ni k’eyag u daken fare gi but’ ntagil’ e gum’eyag rok e pilung, machane dan k’eyag ngalan fapi low ko yam’ rok e pilung ni bochan fare m’ar ni immoy rok. Me yan Jotham nib mo’on ni fak nga luwan nge mang pilung.
