Tuni Bidi Dabego Po Elalubo Buku Si 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Te Jehoram aga king bidali sogo, te bidi mebago te hwįbo bidi dabe meba selama, tama augwali Juda buluba aselama, tama agai ogomani sese tama ela silali, tiali goli augwaligo Jehoramgo sabi ogwa mu Ahasia deli digi elebeo. Tama tialima, te king Jehoram isibo si, te Jerusalem dabego Ahasia augwa king pedelemainu sa muani, te aga ayago bidali pesage somainu. Ahasiago me nogi Joahas dao.

²Ahasia aga king pedelali sogo agai kibu be 42 elaluali, tama aga Jerusalemde kibu be delide tama aga king bidali. Aga ida te Atalia dao, te king Ahapgo wegi, tama king Omrigo wąį dao.

³Ahasia aga idago aga kolesaga ola maduali. Tama tialima Ahasiago te Ahapgo hanigo dwai kolesaga wali pali.

⁴Tama agai Genuai Bidigo gedude dwai kolesaga yali, te Ahapgo hanigo ebo kolesaga tiwai mu tama yali. Magi baso meni, aga isai tudi badu agai te Ahapgo hani bidi aga kolesaga ola momainu sali. Tama agai augwaligo dwai kolesaga wali peyu, te dwai kolesaga tama yali.

⁵Me sogo Ahasia agai te bidi dabego po wali peyu, tama aga Joram te Israel dabego king dali wali pali, tama augwali Siria dabego king Hasael dali hwįgi pali. Augwali te hanu Ramot te distrik Gileat pąde hwįani, tama Siria ami bidigo Joram enego enani tama aga selali.

⁶Tama tialima Joram aga te hwįbo tagalama, aga te taun Jesrilba bidigi pali, te aga usu ma ebo tonaluyu. Aga Jesrilde bidibadi, Ahasiago aga sugi pali.

⁷Godigo polo koneani, king Ahasiago Joram sugi paibao wali, tama agai te sogo agai Ahasia dolaibao homu yali. Tama Ahasia aga te Joram dali bidibadi, augwali sigo te Nimsigo ogwa Jehu suali. Jehu aga te Genuai Bidi aga digi te Ahapgo hani dolomainu sa muai bidi dao.

⁸Tama tialima Jehugo te Ahapgo hani dolobo sę idubadi da, agai te Juda dabego tobolu bidi dabe meba me, Ahasia aga ama sologo ogomani meba agai suali. Te bidi dabe augwaligo te king Ahasiago sę dabe ebo bidi dabe dao. Tama tialima Jehugo te bidi dabe sese tama elama isila silali.

⁹Agai augwali ela silama, augwaligo Ahasia gegebo sę yali. Ahasia aga Samaria bulude geme dualaluali, tama bidi mebago aga sulama, tama augwaligo aga Jehu pageba odasa pelama, tama augwaligo aga ela muani. Tiali goli augwaligo Ahasiago tigi olo munalumainu sula tagalobeo. Menio. Augwaligo aga wąį king Jehosafatgo wiegi yai kolesaga elama, tama aga homu kolesagago mu Genuai Bidi wali peyu yali te kone palama, tama augwaligo Ahasiago tigi pubulali. Tama Ahasia aga hani bid me deli bomo elama king pedelama, te Juda we bidi tonaluabo bidi meni yai.

¹⁰Te king Ahasia aga ida Ataliago aga ogwa king Ahasia isalio po odobo si, polo tama agai te ami bidi dabebolo walama, te Juda dabe king hani bidi dabe sese ela silao po wali.

¹¹Tiali goli augwaligo te king Ahasiago ogwa Joas elebeo. Magi baso meni. Jehoseba te king Joramgo wegi, agai te Joas dali te aga tonaluabo wegi me dali, agai augwali si selama, tama agai augwali si te be habu me augwaligo bet dabe me matres me doado bage dabe wialobo be habude geme dualali. Tama Atalia agai Joas ela muabo usu ebe. Jehoseba te king Ahasiago abe dao. Tama tiyu, agai te Joas geme dualali. Jehoseba aga bidi te pris Jehoiada dao.

¹²Tama augwali sigo aga te be habude oda selama Godigo tempel beba odasa pelama, tama aga te bede dualalubadi kibu be te 6 kibu be tamade dualaluali. Tama te tama kibu bede Atalia aga Juda dabego polalubo we kwin bidali.