1Te Jehosafat aga aya Asago pesage selama, tama aga Juda dabego king pedalali. Tama agai aga ami dabe bomo ilama dąų olama bomo mu ilali. Tama tibaso, te Israel dabe augwaliba boi hwįagasabo usu meni yani.
2Agai aga ami bidi dabe te bomai obo elalubo taun dabede tagaliyu, me te kantride tigidali buluba dabe tatagalo bilali. Tama agai te ami dabe meba te Efraim hanigo taun dabede tagalali, te aga aya Asago te boide sali te taun dabe.
3Tama Jehosafatgo aga wąį Devit hasia king pedelali sogo yali wiegi yai sę tiwai yali. Tama Jehosafat agai tibo god Balba lotu po me wayu ebeo. Tama tibaso Genuai Bidi aga dali bidiyu aga tau sali.
4Jehosafatgo aga ayago God wali pelama, tama me agai aga Godigo bomai po sese tama bugagia wali pali, tama agai te Israel dabego king dabego ebo dwai kolesaga tiwai me ebeo.
5Tama Genuai Bidigo Jehosafat aga bomai king mu pedalomainu elama, tama agai kanrti Juda tonaluali. Tama tigidali we bidigo agabolo doado bage dabe magasali. Tama tiyu, agai mone me nai dabe hauwa elaluyu, tama Juda dabego gedude agai genuai nogi mu elaluali.
6Jehosafat aga Genuai Bidi wali pabo bomo elama mu yali. Tama aga te tigidali Juda kantri tǫ pedai badu sese tama biligi pali, tama agai te tibo god dabeba lotu wabo pesage doliyu, me god we Aserago piksa noma me doliyu yali.
7Te Jehosafat aga king bidibadi kibu be sela wabode, agai aga genuai bidi dabe meba e badi, Livai dabe meba ebadi, pris bidi si ebadi agai Juda tǫ tigidali badu tagala palali. Agai augwalibolo Godigo tigidali bomai po dabe elalubo buku sese selasa tigidali taun dabeba pelama, tigidali we bidibolo te bomai po skul ola memena biligi pao po wali. Te genuai bidi dabego nogi e dao, Benhail, me Obadia, me Sekaraia, me Netanel, me Mikaia dao. Tama te Livai dabego nogi da e dao, Semaia, me Netania, me Sebadaia, me Asahel, me Semiramot, me Jehonatan, me Adoniya, me Tobia, me Tobadonia dao, tama pris bidi sigo nogi e dao, Elisama me Jehoram dao.
10Te Jehosafat aga king bidibadi Genuai Bidigo te Juda bulu pąde elalubo kantri king bidi dabe me tobolu bidi dabe augwali Jehosafatde wi dwai mu emainogo ilali. Tama tibaso augwaligo aga dali boi me hwįagasobeo.
11Tama te Filistia dabe mebago takis abelainogo agabolo silva dabe meba sesali, tama me augwaligo Jehosafatbolo meba doado bage dabe sesali. Tama me te Arebia dabego me agabolo 7,700 sipsip kibu me 7,700 meme kibu omai dabe te Jehosafatbolo magasali.
12Tama Jehosafat aga bomai king mu genuai mu me pedaludali, tama agai Juda dabego taun dabeba bidi dabe tagala pabalo pali. Tama augwaligo te tubo nai dabe me wa hulu dabe wialubo bakstua dabe sę egi pali. Tama me augwaligo ami bidi dabe bidiyu boi bidi dabe no munaluaba pesage boma pai me geseliyu yali.
13Tama tialima Jehosafatgo walu hauwa dabe te bakstua dabe tomoba mumuna pali. Tama me Jehosafatgo bomai ami bidi dabe Jerusalemde bidimainu tagalali.
14Te ami bidi dabe augwali augwa deli deli we wai dali bidiyu tama deli deli ofisa dabego 1,000 ami bidi tonaluyu yali. Te tigidali Juda hanigo ami bidi dabego namba wan ami ofisa bidi nogi te Atna dao. Tama agai 300,000 bomai ami bidi tonaluai dao.
15Tama agai namba tu ofisa bidi nogi te Jehohanan dao, tama agai 280,000 bomai ami bidi dabe tonaluai dao.
16Tama namba 3 ami ofisa bidi te Amasia, te Sikrigo ogwa dao. Agai agabolo Genuai Bidigo sę me emainogo mani. Tama agai 200,000 bomai ami bidi dabe tonaluali.
17Te Benjamin hanigo tigidali amigo namba wan ofisa te Eliada dao. Aga wiegi yai bomai ami dao, tama agai 200,000 ami augwali ni name sabele dagego me enesigigo boi hwįbo bugagia mu koneani bidi dabe tonaluali.
18Eliadago namba tu ami ofisa te Jehosabat dao, tama agai 180,000 ami bid tonaluai dao. Tigidali sogo te ami dabe augwali boi hwįabo no munalubo dao.
19Tigidali te ami hani augwali te Jerusalemde bidiyu, augwaligo kingo sę ebo dao. Tama kingo gasa meba ami bidi dabe augwali te kantri Judago bomai obo elalubo taun dabede bidali.
