1Sa tuna koreo, se Zehosapati si baṉara hobea si asa, meke va nabu ia sa sa nana ṉiniraṉira, meke va nama ni sari pa Izireli.
2Veko ni nana puku tie varipera sa koari na vasileana pa Ziuda sapu ta goba patu, meke koa ri kaiqa vasina ta vizatadi pule pa Ziuda, meke koari na popoa pa Iparemi saripu vagi e Asa sa tamana.
3Koa turaṉia e Zihova se Zehosapati sina tatasana si lulia sa sa hahanana tanisa tamana sapu e Devita, meke lopu vahesia sa sa beku Beolo.
4Hataia sa sa Tamasa tanisa tamana, meke va tabei sa sari tinarae te Tamasa, meke lopu taveti sa sari na hahanana tadi na baṉara pa Izireli.
5Va nabua e Zihova sa ṉiniraṉira te Zehosapati koasa binaṉara pa Ziuda, meke doduru tie pa Ziuda si paleke la vinariponi koasa, ke tagotago sisigiti si asa meke tava lavata.
6Sa hiniva tanisa si ṉiṉira hola pa linulina se Zihova, meke huara betoi sa sari doduru vasidi tana vahesi beku koari na toqere, meke sari na beku te Asera sa tamasa barikaleqe, pa Ziuda.
7Pa vina ṉeta vuahenina sa nana binaṉara si garunu vura taloa ni sa sari na nana palabatu pude va tumatumae koari na vasileana pa Ziuda: Benihaili, Obadaea, Zakaraea, Netanela, meke Mikaea.
8Somana luli turaṉae koa rini sari ka sia tie Livaeti meke karua hiama. Sari na tie Livae si ari Semaea, Nataniela, Zebadaea, Asahele, Semiramoti, Zehonatani, Adonaeza, Tobiza, meke Tobadonaeza; meke sari na hiama si ari Elisama, meke Zehoramu.
9Palekia rini sa buka tinarae te Zihova meke ene va tumatumae si arini pa doduruna sa popoa pa Ziuda.
10Sa minatagutuna e Zihova si kamo koari doduru binaṉara pa vari likohaena Ziuda, ke lopu la raza ia rini sa baṉara Zehosapati.
11Kaiqa ari na tie Pilisitia si paleke la dia vinariponi meke na siliva, guana dia vina lavata, koe Zehosapati, meke ari na tie Arebia si paleke lani koasa si ka zuapa tina zuapa gogoto sipi, meke zuapa tina zuapa gogoto qoti.
12Ke ṉiṉira nono latu se Zehosapati. Pa doduruna sa popoa pa Ziuda si kuri i sa sari popoa goba patu tana vinaripera,
13meke sari na vasileana lavata vasina ta kopue sari na ginani na likakalae. Meke vekoi sa pa Zerusalema sari na tie bokabokadi pa vinaripera.
14Ta vagi si arini koari na hopeke puku butubutu. Adana sina koimata koari na tie varipera tadi na puku butubutu pa Ziuda, meke ka ṉeta gogoto tina tie varipera si koa pa nana kinopu.
15Sa koimata vina rua si e Zehohanani; karua gogoto vesu ṉavulu puta tina tie varipera si kopu ni sa,
16Sa koimata vina ṉeta si e Amasia tuna e Zikiri; karua gogoto tina tie varipera si kopu ni sa. Telena vala pule nia se Amasia pude nabulu nia se Zihova.
17Sa koimata tanisa puku tie varipera pa butubutu Benisimane si e Eliada; na keke tie varipera bokabokana si asa. Kopu ni sa si karua gogoto tina tie varipera pu paleke lave na bokala.
18Sa koimata vina rua koasa butubutu Benisimane si e Zehozabadi meke kopu ni sa si ka keke gogoto vesu ṉavulu tina tie; na tie namanamadi va leana koari na likakalae vinaripera.
19Arini sari na tie pu nabulu nia sa baṉara pa Zerusalema, meke veko va nama ni tie varipera tugo sa sari na popoa ta goba patu pa binaṉara Ziuda.
