BƐBAATÍBƐ̀ 19:7-19

⁷Kòo ndɔ́ kɛ́kò nkòo cɔ̀kù yetoo kòo yóu kɛ yíɛ́ kɛ́yié.

⁸Diyiè nummurì yiè kɛ̀ dɛ̀ nkpɑɑ́ uu dikṹnweńnì sɛ̀ì kòo bɑ́ɑ́tí kɛ bo kò nkòo cɔ̀kùu yetɛ kɛ dɔ̀: Kɑri kɛ́di, kuyuoku kɛ nɛ́ kétɛ́. Mɛm̀mɛ kòo kɑri kɛ̀ bɛ̀ɛ wɛ̃nnɛ́ kɛ́di.

⁹Bɛ̀ di dìì mɔ̀nnì kɛ deè kòo ndɔ́ kɛ́túótɛ́ o pokù nɛ̀ o tɔ̃ntì kɛ̀ bɛ̀ɛ kò, kòo cɔ̀kù ò nɑ̀kɛ́ kɛ dɔ̀: Diyiè diɛ nkɛ dèè kɛ̀ dɛ̀ bìiri, túótɛ́ mɛfíè nkɛ́duɔ́ diɛ nkɑ̀ɑ yɛ̀mmɛ̀ɛ cɑ́tɛ́, kɛ̀ dɛ̀ nkpɑɑ́ uu kɑ̀ɑ kò.

¹⁰Dɛ mɔ̀nnì odɑpɑ̀ɑ̀ mmɛ ntɛ̃́nkɛ í nyie nkɛ bo nkpɑɑ́, kɛ́túótɛ́ o pokù nɛ̀ o sɑ̃mmɑrímúbɛ̀ bɛdɛ́, kɛ́boú tinɛntì dɛ ĩ́nkɛ̀, kɛ́nkérí kɛ́tuɔkɛ Sebusii, dihɛì bɛ̀ tu dì di mmɔ̀nnì Sedisɑdɛmmu.

¹¹Bɛ̀ tùɔ̀koo dìì mɔ̀nnì dihɛì kɛ sɔ̃́ ndiyiè dèè, kòo kóo tɔ̃ntìi ò nɑ̀kɛ́ kɛ dɔ̀: Tí kɔtɛ Sebusiibɛ ciɛ kɛ́yié.

¹²Kòo yetɛ kɛ dɔ̀: Ti bɑ́ɑ́ kɔtɛ dihɛì mɑrì Isidɑyɛɛribɛ í bo dì. Ti pɛ̃ɛ̃tɛ́ kɛ́kɔtɛ Kibeɑ.

¹³Tí yetoo kɛ́tuɔkɛ Kibeɑ yoo Dɑmɑɑ, yɛɛ̀ ɛkɛ̀ kó dìmɑrì ndi ti dò nkɛ́yiémmɛ̀.

¹⁴Kɛ̀ bɛ̀ɛ sɔɔtɛ́ bɛ cɛ, kɛ̀ diyiè nyóó tɑ kɛ̀ bɛ̀ tùɔ̀koo Kibeɑ, Bɛnsɑmɛɛ botí kɔbɛ ciɛ.

¹⁵Bɛ̀ tùɔ̀koo dìì mɔ̀nnì dihɛì kɛ́tɑ kɛ bo yié nKibeɑ kɛ́bɑ́tɛ́, kɛ́nkɑri yɑɑ́rɛ̀, òmɔù mɛ nyí mbɛ̀ yu kɛ̀ bɛ̀ bo tɑ o cĩ́ɛ̃̀tɛ̀.

¹⁶Kɛ̀ bɛ̀ nsɔ̃́ nhodɑkótì mɔù kũntiní kupɑku, o ciɛ do bo Efɑdɑimmu tempɛ̃ nditɑ̃rì ĩ́nkɛ̀ nkɛ, kòò kɔ̀tɛní kɛ bo Kibeɑ Bɛnsɑmɛɛ kɔbɛ ciɛ.

¹⁷Kòo yɑ̀ opɔ̀ɔ̀ kòò kɑ̀ri yɑɑ́rɛ̀, kòo ò bekɛ kɛ dɔ̀: A yɛ̀nní dɛ? A kɔri kɛ?

¹⁸Kòo ò tɛ̃̀ńnɛ́ kɛ dɔ̀: Ti bonní Bɛtideɛmmu nwe Sudɑɑ botí kɔbɛ ciɛ, kɛ kũnti Efɑdɑimmu ditɑ̃rì ĩ́nkɛ̀, dihɛì dìì í tɔ́kɛ́nɛ̀ yɛtɛyɛ̀. N do kɔ̀tɛ Bɛtideɛmmu nwe, kɛ kũntiní òmɔù mɛ nyí n yu kɛ̀ m bo yié nho cĩ́ɛ̃̀tɛ̀.

¹⁹M mɛ ntɔmu timútì n sɑ̃mmɑrímúbɛ̀ kpɛ́í nkɛ mɔkɛ pɛ̃́ɛ̃̀ nɛ̀ mɛnɑɑ̀ mmí nnɛ̀ m pokù nɛ̀ n kóo tɔ̃ntì ti kpɛ́í, dɛ̀mɑrɛ̀ í ti dónnì.