Text copied!
CopyCompare
Buka Helaga - AONEGA HEREVADIA

AONEGA HEREVADIA 24

Help us?
Click on verse(s) to share them!
1Kara dika taudia dekenai do umui mama henia lasi. Idia dekenai umui turana karaia gwauraia lasi.
2Badina kerere havaraia totona idia laloa karaia noho, bona taunimanima hadikaia totona idia herevahereva noho.
3Aonega bona laloa kehoa tauna ese ruma ia haginia noho, bona iena famili idia tubu goada noho.
4Inai tau ena diba dainai, ruma ena daiutu be davana bada kohu, bona gau namodia dekenai ia hahonua noho.
5Aonega tauna ese goada tauna ia hereaia noho, bona diba namona tauna ese, tauanina goada tauna ia hereaia noho.
6Badina be tuari do umui karaia namonamo dalana, be palani namodia do umui karaia guna, bona tuari do umui kwalimu totona, sisiba namona do umui kamonai henia namonamo guna.
7Aonega hereva be dobu momokani, bona kavakava tauna ese edia anina ia davaria diba lasi. Hebou lalonai hereva badadia idia herevalaia neganai, ia be ia hereva lasi noho.
8Bema kara dika karaia dalana, be nega ibounai oi laloa noho neganai, taunimanima ese kerere havaraia tauna oi do idia gwauraia.
9Kavakava tauna ese ia laloa noho palani be kara dika, bona tau haida dekenai ia hereva dika henia tauna, be taunimanima ese idia badu henia noho.
10Bema hekwakwanai neganai oi manoka neganai, oiemu goada be maragimaragi momokani.
11Bema kerere lasi tauna, be do idia hamasea gwauraia neganai, unai tau do oi hamauria haraga. Mase dekenai kahirakahira idia moru taudia, be do oi veria mauri.
12Bema oi koikoi, oi gwau, “Lau be inai gau lau diba lasi,” laloa ibounai Dirava ese, inai koikoi ia itaia lasi, a? Oiemu lauma ia naria noho Dirava ia diba lasi, a? Ia ese taunimanima edia davana, be edia kara hegeregerena do ia henia.
13Egu natuna e, hani do oi ania, badina ia be namo. Hanibi edia ruma dekena amo ia mai hani, be mai ena mamina namo oiemu uduna dekenai.
14Kamonai, aonega be unai bamona, oiemu laumana dekenai. Bema aonega oi davaria neganai, vaira dinadia be do idia namo, bona oi ura davaria gau namodia, be oi dekenai Dirava ese do ia henia.
15Kara maoromaoro tauna dekena amo henaoa totona, o iena ruma abia totona, hunia dekenai do oi naria noho lasi. Unai be kerere bada taudia idia karaia bamona.
16Badina be kara maoromaoro tauna, be nega momo do ia moru, to ma do ia toreisi. To kara dika tauna be hisihisi ese, do ia hadikaia ore momokani.
17Oi dekenai ia tuari tauna ia moru neganai, do oi moale lasi. Ia hekwakwanai neganai, do oi moale bada lasi.
18Lohiabada ese oiemu moale do ia itaia, vadaeni do ia badu, bona unai neganai Lohiabada ese oi ia tuari henia tauna, ena kerere davana do ia henia lasi.

19Oiemu lalona do ia hekwarahi lasi, kara dika taudia dainai, bona kerere idia karaia noho taudia, be do oi mama henia lasi.
20Badina be kara dika taudia, be do idia mauri noho daudau diba lasi, bona kerere idia karaia noho taudia edia lamepa, be do idia bodo haraga.
21Egu natuna e, Lohiabada do oi gari henia, bona king do oi matauraia. Bona haida ese Lohiabada bona king idia dagedage henia neganai, unai dika taudia do oi durudia lasi.
22Unai bamona taudia be Lohiabada bona king ese, do idia hadikaia ore haraga. Idia ruaosi, Lohiabada bona king ese idia mailaia dika, be daika do ia diba?
23Aonega taudia edia hereva ma haida be inai: Kota maoromaorona lasi be dika.
24Bema kota biaguna ta ese kerere tauna ia hamaoroa, ia gwau, “Oi be kerere lasi” neganai, unai kota biaguna be taunimanima ibounai bona bese ibounai, ese do idia badu henia momokani.
25To idia ese kerere taudia edia kerere davana, be idia henia momokani neganai, kota biagudia ese hanamoa bada bona ladana namo, do idia abia.
26Haere maoromaorona bona momokani oi dekenai ia henia tauna, be turana korikori ena kara ia karaia noho.
27Oiemu tano hanamoa gaukara do oi haorea, bona oiemu uma gabuna do oi abia hegaegae. Unai murinai, oiemu noho rumana do oi haginia.
28Oiemu badibadinai noho tauna do oi samania kava lasi, bona ia totona do oi hereva koikoi lasi.
29Do oi hereva lasi inai bamona: “Ia ese lau dekenai ia karaia hegeregerena, be lau ese ia dekenai do lau karaia. Lau ese iena dika davana do lau henia.”
30Lahedo tauna ena uma gabuna lau raka hanaia, unai kavakava tauna ena vain audia danu lau raka hanaia.
31Vadaeni lau itaia, au ginigini ese idia koua momokani, ava ginigini ese tano idia hahonua momokani, bona iena nadi maguna be ia makohia vadaeni.
32Unai gabu lau itaia dainai lau laloa namonamo, bona unai dekena amo, diba bona laloa kehoa lau davaria.
33Lahedo tauna ese inai bamona ia hereva, ia gwau, “Egu mahuta do lau halataia, do lau laga-ani sisina, bona nega sisina egu imana do lau lokua, do lau mahuta totona.”
34Vadaeni ogogami ese ia do ia abia, dadia tauna ia mai bamona, bona gau lasi ena nega, be ia dekenai do ia ginidae, tuari tauna ia ginidae bamona.