Text copied!
CopyCompare
Buka Helaga - AONEGA HEREVADIA

AONEGA HEREVADIA 22

Help us?
Click on verse(s) to share them!
1Ladana namona tauna ese, kohu momo tauna ia hereaia noho. Bema ladana namo bona kohu momo ruaosi, edia huanai ta oi abia hidi neganai, ladana namona do oi abia hidi.
2Kohu momo tauna bona ogogami tauna, be dala ta dekenai edia mauri be tamona. Gauna be inai: Lohiabada ese idia ruaosi ia karaia.
3Aonega tauna ese dika ia itaia noho, bona unai dika dekena amo ia raka siri, to aonega lasi tauna, be unai dika dekenai do ia raka lao, bona gabeai hisihisi do ia davaria.
4Lohiabada do oi gari henia, bona do oi manau. Inai bamona oi karaia neganai, kohu, bona matauraia, bona mauri do oi davaria.
5Tau dikana ena mauri dalana dekenai be hekwakwanai, bona tarapu idia noho, to iena lauma ia naria noho tauna, be unai gaudia dekena amo ia raka siri noho.
6Mero dekenai mauri dala maorona do oi hadibaia, vadaeni ia buruka neganai, unai dala do ia rakatania lasi.
7Kohu momo tauna ese ogogami tauna ia biagua noho, bona moni ia abiatorehai tauna ese, heniatorehai tauna ena hesiai gaukara ia karaia noho.
8Kara kerere ia hadoa tauna ese, ena anina, dika momokani, do ia davaria, bona ia ese taunimanima ia dagedage henia vadaeni dainai, Dirava ese ia do ia hadikaia ore.
9Gau bona aniani be ogogami taudia dekenai do oi henia, badina Dirava ese, unai bamona idia karaia taudia do ia hanamoa.
10Hekokoroku tauna, hereva dika ia gwauraia noho tauna, be do umui lulua siri, vadaeni heai do ia ore, heatu, bona ladana hadikaia hereva, danu do idia doko.
11Bema laloa goevagoeva oi ura henia, bona oi hereva manada neganai, oi be king ena turana do oi lao.
12Lohiabada ese aonega hereva ia itaia noho, bona ia durua noho, to koikoi taudia edia hereva ia koua noho.
13Lahedo tauna be ruma dekenai ia helai noho. Ia gwau, “Bema murimurina dekenai lau lao neganai, laiona ta ese lau do ia alaia mase.”
14Heudahanai kara be tarapu dobuna bamona. Lohiabada ese ia badu henia noho taudia, be unai tarapu lalonai do idia moru momokani.
15Natuna maragidia ibounai ese kavakava idia karaia noho, to emu natuna oi kwadia neganai, inai kavakava kara do ia rakatania momokani.
16Bema ogogami taudia oi dagedage henia, oi sibona kohu momo do oi abia totona, o bema kohu momo taudia dekenai, harihari gaudia oi henia neganai, oi sibona be do oi ogogami.
17Oiemu taiana do oi kehoa, aonega taudia edia hereva do oi kamonai. Edia hadibaia hereva oiemu kudouna dekenai do oi abia dae.
18Badina bema emu kudouna lalonai inai hereva oi dogoatao, bona idia oi gwauraia diba neganai, lalo namo do oi davaria.

19Lau ura oi ese Lohiabada do oi abidadama henia. Unai dainai hari dina, inai hereva oi dekenai lau hadibaia noho.
20Sisiba bona aonega hereva ibounai 30, be oi dekenai lau torea vadaeni,
21bona idia ese kara maoromaoro bona kara momokani, oi dekenai do idia hadibaia. Vadaeni oi ia siaia tauna dekenai oi giroa lou neganai, haere maorodia do oi henia.
22Ogogami taudia dekena amo do oi henaoa lasi, badina idia be ogogami, bona gau lasi taudia be kota lalonai, do oi hadikadia ore lasi.
23Badina be Lohiabada ese edia kota hereva do ia durua, bona edia kohu ia henaoa tauna do ia alaia mase.
24Badu haraga tauna danu do oi turana karaia lasi, bona dagedage tauna danu do oi noho lasi,
25edia dala dekenai do oi manada garina, bona idia be tarapu oi dekenai garina.
26Tau ta ena abiatorehai henia lou gwauhamata, be do oi karaia lasi,
27badina be bema unai moni oi henia lasi neganai, oiemu mahuta patana do idia abia lao.
28Tano ena hetoana gunana, oiemu sene taudia idia atoa gauna, be do oi kokia lao lasi.
29Iena gaukara ia karaia namonamo tauna oi itaia noho, a? Ia ese taunimanima momo ia hereaia noho, bona ia ese king taudia edia vairana dekenai do ia gini.