ẔWA 16

1

2

3

4

5

6

7

8

9

10

11

12

13

14

15

16

17

18

19

20

21

¹’Da' ki goža' ḻe'e, nich bi gak chope ḻáže'le.

²Žin ža kate' kwéjgake' ḻe'e to chi'ize gan ẕdobgak benne' judío ka' nich yéngekle' x̱tiža' Dios, na' ža na' gékgekle' cha' gótgake' ḻe'e góngake' x̱chin Dios.

³Ki góngake' dan' bi zej nónbi'e X̱ažo Dios, na' dan' bi zej nónbi'e neda'.

⁴Žapa' ḻe'e da' ki, nich kate' žin ža na', chejsá' ḻáže'le da' ni da' žapkza' ḻe'e, na' bi gak chope ḻáže'le. Ḻezka' wnná Jesusen': —Da' ki bi goža' ḻe'e ža ni'te, dan' zóaḻenkza' ḻe'e.

⁵Na'a yeyá'a, na' chejsóaḻena' X̱ažo Dios, Bennen' bseḻe'e neda', na' bi nnáblele nitole ḻe'e neda', bi nnale: “¿Gaẕ chejo'?”

⁶Na'a, dan' žapa' ḻe'e da' ni, žak nyache' ḻáže'le.

⁷Neda' žapa' ḻe'e da' naken dot da' li. Gakže chawe' chele cha' yeyá'a. Cha' bi yeyá'a, bi yedjsóaḻen Dios Be' La'y ḻe'e. Cha' yeyá'a, na' seḻa'a-ne', na' yedjsóaḻene' ḻe'e. Ḻe' gákḻene' ḻe'e, na' gon choche' yichj ḻáẕdo'le.

⁸Kate' yide' Ḻe', yesnisle' benách ka' nníta'gake' yežlyó nga zej nbage'e doḻa', na' bi zej nónbi'e da' naken chawe', na' Dios choge' chégake' kwia yí'gake'.

⁹Zej nbage'e doḻa' dan' bi žejḻé'gake' chia' neda'.

¹⁰Bi zej nónbi'e da' naken chawe' dan' gótgake' neda', na' yeyá'a gan zoa X̱ažo Dios, Benne' chawe', na' biž ḻé'egekle' neda'.

¹¹Dios choge' chégake' kwia yí'gake' dan' ba bchoge' che da' x̱iwe' kwia yin', dan' ẕnna bian' benách ka' nníta'gake' yežlyó nga.

¹²’Da' zanže žénela' wcháḻjḻena' ḻe'e, san bi gak chejní'ilelen na'a.

¹³Ẕchaḻj Dios Be' La'y da' naken dot da' li. Kate' ḻe'e Ḻe', wsedle' ḻe'e yógo'te da' naken dot da' li, dan' bi wchaḻje' žakze chie', san wchaḻje' yógo'te da' yenle' dan' nna X̱a', na' wzejni'ile' ḻe'e yógo'te da' žaḻa' gaken.

¹⁴Ḻe' gape' neda' ba la'ne, dan' si'e da' naken chia', na' wzejni'ilen' ḻe'e.

¹⁵Yógo'te da' naken che X̱ažo Dios zej naken chia'. Che ḻen wnnía' si'e da' naken chia', na' wzejni'ilen' ḻe'e.

¹⁶Ḻezka' wnná Jesusen': —Yetó chí'ido'ze, biž ḻé'elele neda', na' yetó chí'ido'ze yeḻé'elele neda', dan' yeyá'a gan zoa X̱ažo Dios.

¹⁷Naž benne' wsedle chie' ka' belyi'e ljéžgake' toe' yetóe', na' wnnágake': —¿Biẕ zejḻás dan' gože' žo'o? Wnné': “Yetó chí'ido'ze, na' biž ḻé'elele neda', na' yetó chí'ido'ze yeḻé'elele neda', na' naken dan' yeyá'a gan zoa X̱ažo Dios.”

¹⁸Naž wnnágake': —¿Biẕkze zejḻás da' ni, dan' wnné': “Yetó chí'ido'ze”? Bi žejni'ilto' dan' wnné'.

¹⁹Žákbe'ele Jesusen' žénegekle' nnábgekle' Ḻe', na' gože' ḻégake': —¿Ẕnnáblele lježle kan nak che dan' wnnía': yetó chí'ido'ze, na' biž ḻé'elele neda', na' yetó chí'ido'ze yeḻé'elele neda'?

²⁰Da' li žapa' ḻe'e: kwéžele, na' gak nyache' ḻáže'le, san benách ka' nníta'gake' yežlyó nga yebégekle' katen' gótgake' neda'. Naž ḻa'kze gak nyache' ḻáže'le, yeḻa' nyache' ḻaže' chelen' yeyaken yeḻa' žebél katen' yeḻé'elele neda'.

²¹To no'le kate' za' galj bi'do' chie', ẕzáka'ḻi'e, dan' ba bžin ža chie', san kate' ba zoa to x̱kwide' byodo' chie', biž žejsá' ḻaže'e dan' wẕake'e, san žebele' dan' ba golj to x̱kwide' byodo' yežlyó nga.

²²Ḻezka' žaken chele. Nak nyache' ḻáže'le na'a, san yeḻá'a neda', na' yedjwía' ḻe'e, na' naž yebélele, na' bi sáke'le no benne' yeké'e yeḻa' žebél chelen'.

²³’Ža na' bi be nnáblele neda'. Da' li žapa' ḻe'e: yógo'te da' nnáblele X̱ažo Dios, na' wkónlele žin la' neda', Ḻe' gonnen' chele.

²⁴Na' zejte na'a ža bi ẕkónlele žin la' neda' kate' bi da' ẕnnáblele X̱ažo Dios. Le nnable' ki, na' gata' chele da' nnáblele-ne', nich gak dot ḻi ḻaže' yeḻa' žebél chele.

²⁵Ḻezka' wnná Jesusen': —Bsaka' ḻeba' katen' bcháḻjḻena' ḻe'e. Žin ža kate' biž wcháḻjḻena' ḻe'e da' wsaka' ḻeba', san kwáselo wcháḻjḻena' ḻe'e kan nak che X̱ažo Dios.

²⁶Ža na' nnáblele Dios, na' wkónlele žin la' neda', na' žapa' ḻe'e, bi gon byenen gáta'yoela' X̱ažo Dios ḻo wlazle ḻe'e, dan' X̱ažo Dios nži'ile' ḻe'e. Nži'ile' ḻe'e dan' nží'ilele neda', na' žejḻe'le bžoja' gan zoe' Ḻe'.

²⁸Bžoja' gan zoa X̱ažo Dios, na' bḻa'a yežlyó nga. Yetó da' gaken, yezá'a yežlyó nga, na' yeyá'a gan zoakze' Ḻe'.

²⁹Naž benne' wsedle chie' ka' belyi'e Ḻe', na' wnnágake': —Na'a kwáselo ẕchaḻjo', na' biž žsaka' ḻebo'.

³⁰Na'a žákbe'elto' nnézkzelo' Le' yógo'te, na' bi žon byenen no benne' bi da' nnable' Le', dan' ẕḻoe'elo' neto' da' za' nnabton'. Che ḻen žejḻe'to' bžojo' gan zoa Dios.

³¹Bechebe Jesusen', na' gože' ḻégake': —¿Žejḻe'le chia' neda' na'a?

³²Le wia, za' žin ža, na' ba zoažo ža na', katen' gáslasle che chele, na' wka'nle neda' toza', san bi soa' toza', dan' X̱ažo Dios zóaḻenkze' neda'.

³³Da' ki goža' ḻe'e nich ga'n ži yichj ḻáẕdo'le, dan' nakle chia' neda'. Gak da' wsaka' zin' ḻe'e yežlyó nga, san le gak choch. Neda' ba bežoja' chawe' ḻo da' žak yežlyó nga.