1दाऊदमी परमप्रभु कली पुंइशो लोव़। परमप्रभु यावे, आं पुंइशो लोव़ नेनीन। मिनु लोव़ लेत्तीनी। मारदे हना गो प्रुङग नु श्येत जशो बाक्नुङ।
2आं कली खाल पा साइक्चा मगेयीनी। मारदे हना गो इन कली थमा सुइश्शा, इन गेय पाइब नङ। गे आं परमप्रभु बाक्नीनी।
3परमप्रभु, आं कली शिशी पाइय्यीनी। मारदे हना गो नाक्त रे इन कली ब्रेश्शो बाक्नुङ।
4इन गेय पाइब आ थुं ग्येरपतीन। मारदे हना गो आं थुं परमप्रभु, इन कली जिम्मा गेनुङ।
5परमप्रभु, गे रिम्शो पाइब नु माफ गेब बाक्नीनी। इन कली पुंइब नेल्ल आन कली गेना हना यो दाक्नीनी।
6परमप्रभु यावे आं पुंइशो लोव़ नेनीने। मिनु शिशी पाइक्चा कली आं पुंइशो नेनीन।
7गो श्येत जङानु इन कली पुंइनुङ। मिनु गे आं लोव़ लेत्नीनी। भजन संग्रह ५०:१५
8परमप्रभु, देवी देवता आन दातेमी इन खोदेंशो अरु तेकोइ मबाक्नीम। इन पशो गेय खोदेंशो पा अरु सुइम मपाइनीम। भजन संग्रह १३५:५; प्रस्थान १५:११
9परमप्रभु, इन सेल्शो रागी रागी ङा मुर इन ङोंइती बाप्शा, इन नें थिशा, इन कली ठेयब सेल्चा माल्नीम।
10मारदे हना गे ठेयब बाक्नीनी। मिनु छक लाक्चा ङा गेय पाइनीनी। गे ला परमप्रभु बाक्नीनी।
11परमप्रभु यावे, आं कली इन लां खोइक्चा शेंदीनी। मिनु गो इन थमा पतीकेमी गाक्नुङ। आं कली थुं का पा इन कली मान पा हिंब सेल्यीनी। यूहन्ना १४:६
12परमप्रभु यावे, आं परमप्रभु, गो आं थुं नेल्लेमी “गे रिम्शो पाइब बाक्नीनी” देंनुङ। मिनु गो गेना हना यो इन नें ठेयब सेल्नुङ।
13मारदे हना इन गेना हना यो आं कली दाक्तीके ठेयब बाक्ब। गे आं कली बेक्शो मुर आन नेल्ल क्येङा आगा ङा बाक्तीके रे प्रोंइतीनी।
14परमप्रभु, शिशी मपाइब मुरपुकीमी आं कली खेदा पतीमी। मरिम्शो पाइब आन हुलमी साइक्चा माल्तीमी। मेकोपुकीमी इन कली ममिम्नीम।
15तन्न परमप्रभु, गे दाक्ब नु शिशी पाइब परमप्रभु बाक्नीनी। रीब पा मगाइक्ब, गेना हना यो दाक्शा मप्रोंइब बाक्नीनी। भजन संग्रह १०३:८; प्रस्थान ३४:६
16आं कली कोव़शा, शिशी पाइय्यीनी। इन गेय पाइब कली इन सक्ति गेने। इन वाइलीम आ तौ कली श्येत रे प्रोनीन।
17गे इन दाक्तीके चिन्ड का गेयीनी। मिनु आं कली काइ मदाक्बपुकी मेको तशा, मुने दोक्मल। मारदे हना परमप्रभु यावे, गे आं कली वारच पाइतीनी। मिनु लेम्ताक्यीनी।
