1कुम्सो पपाइक्ब कली दाऊद आ कुम्सो। भजन संग्रह ५३:- मूर्खपुकीमी “परमप्रभु मबाक्ब” दे मिम्नीम। मेकोपुकी ग्रांग्रा दिचा ङा दुम्शा, मरिम्शो गेय पाइनीम। मेको आन दातेमी रिम्शो पाइब सुइ मबाक्नीम।
2परमप्रभु यावेमी स्वर्ग रे मुर आन कली कोव़ब। मारदे कोव़ब देंशा हना, मुर आन दातेमी जोक्ब तुइक्ब परमप्रभु कली माल्ब, सुइ बाक्मा कों, दे कोव़ब।
3तन्न मुर नेल्ल परमप्रभु कली प्रोंइशा, दूली पाइब दुम्तेक्म। रिम्शो पाइब का यो मबाक्नीम। उत्पत्ती ६:१२; रोमी ३:१०-१२
4मरिम्शो पाइबपुकीमी परमप्रभु यावे कली मतुइक्नीम। आ मुर आन कली शोब्ले जशो खोदेंशो पा नेक्नीम। मेकोपुकीमी परमप्रभु यावे कली यो मपुंइनीम। मीका ३:३
5मिनु नोले मेकोपुकी शुश हिंशा, ख्रिंख्रि पाइनीम। मारदे हना परमप्रभु ठीक पाइब आन दातेमी बाक्ब।
6मुरपुकीमी प्रुङग आन मिम्शो बिग्रेचा दाक्नीम। तन्न परमप्रभु यावे मेको आन ख्रुइक्तीके बाक्ब।
7सियोन रे इस्राएली आन ब्रोंइतीके तामेक्ल। परमप्रभु यावेमी आ मुर आन कली प्रोनानु, याकूब आ चच युइ, इस्राएली नेल्ल ग्येरसीमल। भजन संग्रह १२६:१
