1मिनु परमप्रभु यावेमी मोसा कली
2“इस्राएलीपुकी, इन ङोंइती जरमेशो तौ नु इन बी ब्यफ, क्यारश भेडा आन ङोंइती जरमेशो बोहोर बोका योव़शा गेयीनी। मारदे हना मेको आं के बाक्नीम, दे मुर आन कली देंचा माल्ब” देंत। प्रस्थान १३:१२,१३; प्रस्थान २२:२८
3मिनु मोसामी मुर आन कली “गेपुकी इजीप्त रागीम वाइलीम वाइल दुम्शा, ब्रोंइशा, एक जाक्शो नाक्त मप्रेंदीन। परमप्रभु यावेमी इन कली आ सक्तिमी ग्रुंइताक्व। मोपतीके मेको नाक्त गे बोरब ओख्ती मसुप्शो शोब्ले ला जचा माल्नीनी। प्रस्थान १२:३३-३४
4गे मुलाक्ती आबीब महिनामी ग्रूतीनी। प्रस्थान १२:२
5मिनु परमप्रभु यावेमी इन किकी पिपी आन कली ‘कनानी, हित्ती, एमोरी, हिव्वी नु यबुसी आन रागी इन कली गेनुङ’ दे कसम जशो बाक्माक्त। मेको रागीमी जाक्दीश्शा, आबीब महिनामी पास्सा चाड मानेचा माल्नीनी। मेको रागीम दूध नु खुदो शुश बाक्ब, मारेइ मारेइ यो शुश ग्रेल्ब। उत्पत्ती १५:१८
6७ नाक्त सम्म बोरब ओख्ती मसुप्शो शोब्ले जचा माल्नीनी। मेको आ नोले ङा नाक्ती परमप्रभु यावे आ नेंमी चाड का मानेचा माल्नीनी। प्रस्थान १२:१५-१६
7मिनु बोरब ओख्ती मसुप्शो शोब्ले ७ नाक्त सम्म जचा माल्नीनी। इन बाक्तीके नेल्लेमी बोरब ओख्ती सुप्शो शोब्ले काइ वोइक्चा मदुम्ब। मिनु बोरब ओख्ती यो वोइक्चा मदुम्ब। १कोरिन्थी ५:८
8मेको नाक्ती इन आल आन कली ‘परमप्रभु यावेमी इं कली इजीप्त रागी रे ग्रुंइशो कोंइचा, दे ओदेंशो पाइनय’ दे शेंचा माल्नीनी।
9मेको पास्सा चाड इन गुइमी नु इन कुप्फीम मिम्तीके चिन्ड खोदेंशो पा बाक्चा माल्ब। मोपा परमप्रभु यावे आ अरेशो लोव़ गे नु बाक्ब। मारदे हना परमप्रभु यावेमी आ ठेयब सक्तिमी इन कली इजीप्त रागी रे ग्रुंइताक्व। ब्यवस्था ६:८; ब्यवस्था ११:१८
10मोपा गेपुकी बर्स बर्समी मेको चाड ठीक नाक्तीम मानेशा आ अरेशो लोव़ पचा माल्नीनी।
11मिनु परमप्रभु यावेमी इन कली नु इन किकी पिपी आन कली ‘गो मेको रागी इन कली गेनुङ’ दे कसम जशो, कनानी आन रागीम चोव़दीब।
12गे इन ङोंइती जरमेशो तौ नु इन बी ब्यफ, क्यारश भेडा आन ङोंइती जरमेशो परमप्रभु यावे कली गेचा माल्नीनी। ङोंइती जरमेशो बोहोर बोका परमप्रभु यावे केन नम।
13तन्न इन गधैनी आ ङोंइती जरमेशो बोहोर प्रोंइचा कली मेको आ पा ङा पाठा का गेचा माल्नीनी। पाठा गेचा मदाक्ताक्नी हना, आ शुर जिक्चा माल्नीनी। इन ङोंइती जरमेशो तौ आ पा ङा क्येट गेचा माल्नीनी।
14मिनु काबु इन आलपुकीमी ‘गे मारदे ओदेंशो पाइनीनी?’ दे हिल्लो पाइनीम। मेना गेपुकीमी ‘परमप्रभु यावेमी इं कली आ ठेयब सक्तिमी इजीप्त रागी रे ग्रुंइताक्व। वाइलीम वाइल दुम्शो रे यो प्रोंइतु’ दे इन आल आन कली शेंचा माल्नीनी। प्रस्थान १२:२६,२९
15‘फाराओम इं कली काइ लचा मगेतीके, परमप्रभु यावेमी इजीप्त रागी ङा मुर आन ङोंइती जरमेशो तौ नु बस्तु भाव आन दाते ङा ङोंइती जरमेशो नेल्ल साइक्तु। मोपतीके ङोंइती जरमेशो बोहोर बोका परमप्रभु यावे कली चढ़ेनीकी। तन्न ङोंइती जरमेशो तौ आ पा ङा क्येट गेशा प्रोंइनीकी।
16एको पतीके इन गुइमी नु इन कुप्फीम मिम्तीके चिन्ड खोदेंशो पा बाक्चा माल्ब। मारदे हना परमप्रभु यावेमी इं कली आ ठेयब सक्तिमी इजीप्त रागी रे ग्रुंइताक्व’ दे इन आल आन कली शेंचा माल्नीनी” देंत।
17मिनु फाराओमी इस्राएली आन कली लचा गेवानु, परमप्रभुमी इस्राएली आन कली आन नेक्था ङा लां पलिस्ती आन रागी ङा लां मकोंइद। मारदे हना मुरपुकीमी “लडाइ पचा माल्तेक्म हना, हिंशा इजीप्त रागी लेत्नीमी, कों” दे लाइश्शो लां कोंइताक्व।
18मोपा परमप्रभुमी इस्राएली आन कली गोरशो रागी रे लल समुन्द्र गे ङा लां कोंइताक्व। मिनु इस्राएली इजीप्त रागी रे गाक्मानु, लडाइ पचा कली यो ठीक दुम्शो बाक्तेक्म।
19मोसामी योसेफ आ रुश यो कुरतु। मारदे हना योसेफमी इस्राएली आन कली “परमप्रभुम इन कली थमा पा एको रागी रे ग्रुंइशा लाइब। मेना आं रुश यो लाइक्चा माल्नीनी” दे कसम जपाइश्शो बाक्माक्त। उत्पत्ती ५०:२५; यहोसु २४:३२
20मेकोपुकी सुक्कोथ सहर रे लशा, एथाम सहर ङा गोरशो रागी आ नेक्थामी बास बाक्तेक्म।
21मिनु परमप्रभु यावेमी मेकोपुकी नाक्दो नाक्ती गाक्ने चाप्मेक्ल, दे मेको आन कली लां कोंइचा कली नाक्ती गोस्स के थाम नु नाक्दो मी के थाम दुम्शा, मेको आन ङोंइङोंइती गाक्त। प्रस्थान ४०:३६-३८; गन्ती ९:१५-२३; भजन संग्रह ७८:१४; १कोरिन्थी १०:१
22नाक्ती गोस्स के थाम नु नाक्दो मी के थाम आन ङोंइङोंइती गाक्चा मप्रोन।
