1मिनु परमप्रभु यावेमी मोसा कली
2“ङोंइती ङा महिना ङा ङोंइती नाक्ती, आं बाक्तीके ग्रुम्तीक ताम्बु कीङो। प्रस्थान ४०:१७; प्रस्थान १२:२; प्रस्थान १९:१
3गे कबल पशो सन्दोस आगाम वोइश्शा, फारतीक वाम फारदो।
4टेबल ओंइशा, मेको तारी मार मार वोइक्चा माल्बा, ठीक पा वोतो। मिनु बत्ती दातीके ओंइशा आ दियारी दाङो।
5सुन के धूप चोशा चढ़ेतीके कबल पशो सन्दोस आ ङोंइती वोतो। आं बाक्तीक आ ओव़तीक ङा फारतीक वा क्युक्को।
6ग्रुम्तीक ताम्बु आ ओव़तीक आ ङोंइती चोशा चढ़ेतीके वोतो।
7ग्रुम्तीक ताम्बु नु चढ़ेतीक आस दातेम चिक्तीक ठेयब बोस वोइश्शा, ब्वाक्कुम प्रिंदो।
8लाङगा ङा थाम वोइश्शा, एर ओंथ हिरशा फारतीक वा नु ओव़तीक ङा फारतीक वा क्युक्को।
9मिनु गे लुक्चा कली तेल चाक्शा, आं बाक्तीक नु मेकेर ङा मारेइ मारेइ आन कली ‘परमप्रभु यावे केन बाक्ब’ दे तेल लुक्तो। मोपा मेको नेल्ल आं के दुम्नीम।
10चोशा चढ़ेतीक नु मेको आ मारेइ मारेइ आन कली यो ‘परमप्रभु यावे केन बाक्ब’ दे तेल लुक्तो। मोपा मेको नेल्ल यो आं के दुम्नीम।
11चिक्तीक ठेयब बोस नु मेको आ निप्पाइक्तीके कली यो तेल लुक्तो। मिनु मोपा मेको आं के दुम्ब।
12मिनु हारून नु आ तौ आन कली, ग्रुम्तीक ताम्बु ङा ओव़तीकेम चाक्शा चिक्तो।
13आं कली चढ़ेब दुम्पाइक्चा कली हारून कली चढ़ेतीक वा फेक्पा, तेल लुक्शा आं कली जिम्मा गेयी।
14आ तौ आन कली यो चाक्शा, वा फेक्तो।
15आन आफ कली खोदेंशो पा मेको आन कली यो तेल लुक्तो। मेकोपुकी यो चढ़ेब दुम्शा, आं गेय पचा माल्नीम। मेको तेल लुक्तीके आन चच युइ आन पाला नेल्लेमी गेना हना यो आं कली चढ़ेब दुम्नीम” देंत।
16मिनु परमप्रभु यावेमी मोसा कली दोपा अरेवा, मोपा पाप्तु।
17इजीप्त रे गाक्मा आ नोले जाक्शो बर्स आ ङोंइती ङा महिना, ङोंइती ङा नाक्ती परमप्रभु यावे आ बाक्तीक ताम्बु कीतेक्म।
18मोसामी परमप्रभु यावे आ बाक्तीक ताम्बु कीशा, राप्पाइक्तीकपुकी वोइक्तु। मिनु फलेक थारशा, लाइश्शो कोक्के शुइश्शा, थाम राप्पाइक्तु।
19परमप्रभु यावे आ बाक्तीक तारी सुम्तीके यो कोप्ताक्व। परमप्रभु यावेमी मोसा कली दोपा अरेवा, मोपा पाप्तु।
20मिनु मोसामी परमप्रभु यावे आ अरेशो लोव़ मुशा ब्रेक्शो फुल्लु कबल पशो सन्दोसम कुर पाप्तु। मिनु कबल पशो सन्दोसम कुरतीक कोक्के शुइक्ताक्व। मिनु मेको आ तार सुम्तीकेम सुम्तु।
21मेको कबल पशो सन्दोस परमप्रभु यावे आ बाक्तीके ओंइशा, फारतीक वामी फारताक्व। परमप्रभु यावेमी मोसा कली दोपा अरेवा, मोपा पाप्तु।
22मोसामी टेबल कली ग्रुम्तीक ताम्बुम ओंइशा, फारतीक वा आ ङोंइती उत्तर गे वोइक्तु।
23टेबल तारी परमप्रभु यावे आ ङोंइती कोंइतीक शोब्ले वोइक्तु। परमप्रभु यावेमी मोसा कली दोपा अरेवा, मोपा पाप्तु।
24टेबल नु एर ओंथ पा दक्खिन गे बत्ती दातीक कली ग्रुम्तीक ताम्बुम वोइक्तु।
25परमप्रभु यावे आ ङोंइती दियारी दातु। मिनु परमप्रभु यावेमी मोसा कली दोपा अरेवा, मोपा पाप्तु।
26मिनु मोसामी सुन के सेल्शो धूप चोशा चढ़ेतीके कली ग्रुम्तीक ताम्बु ङा फारतीक वा आ ङोंइती वोइक्तु।
27मिनु मेकेर ब्रोव़शो रिना पाइब धूप चोप्तु। परमप्रभु यावेमी मोसा कली दोपा अरेवा, मोपा पाप्तु।
28नोले ताम्बु ङा ओव़तीकेम फारतीक वा क्युक्तु।
29मिनु चोशा चढ़ेतीके परमप्रभु यावे आ बाक्तीके ग्रुम्तीक ताम्बु आ ओव़तीकेमी वोइक्तु। मिनु मेकेर चोशा चढ़ेतीक नु अन्न चढ़ेतीके चढ़ेप्तु। परमप्रभु यावेमी मोसा कली दोपा अरेवा, मोपा पाप्तु।
30मोसामी ग्रुम्तीक ताम्बु नु चढ़ेतीक आस दातेमी चिक्तीक ठेयब बोस वोइश्शा, चिक्चा कली ब्वाक्कुम प्रिंताक्व।
31मिनु मोसा, हारून नु हारून आ तौपुकीमी आन गुइ खोइली चिक्साक्म।
32ग्रुम्तीक ताम्बुमी ओव़शा चढ़ेतीकेम लमानु, आन गुइ खोइली चिक्चा माल्तेक्म। परमप्रभु यावेमी मोसा कली दोपा अरेवा, मोपा पाप्तु।
33मोसामी ग्रुम्तीक ताम्बु नु चढ़ेतीक आ लाङगा एर ओंथ नेल्ल थरपु हिरशा, आ ओव़तीके ङा फारतीक वा क्युक्तु। मोपा मोसामी ग्रुम्तीक ताम्बु ङा गेय नेल्ल थुम्तु।
34मिनु गोस्सुमी ग्रुम्तीक ताम्बु सुम्तु। परमप्रभु यावे आ सक्ति नु छेङछेङमी मेको आ बाक्तीक ब्रीत। इजीकीएल ४३:१-९
35मिनु मोसा ग्रुम्तीक ताम्बुमी ओव़ने मचब। मारदे हना मेको गोस्स मेको तारी बाक्शा, परमप्रभु यावे आ सक्ति नु छेङछेङमी आ बाक्तीक ब्रीत। गन्ती ७:८९
36मेको गोस्स परमप्रभु यावे आ बाक्तीक तारी रे ग्येत्थ बोक्मेनु, इस्राएलीपुकी गाक्चा गोम्तेक्म। प्रस्थान १३:२१; गन्ती ९:१५-२३; गन्ती १०:३४-३६; १राजा ८:१०-११; यसैया ४:५
37मेको गोस्स ग्येत्थ मबोक्म सम्म इस्राएली मेक उइ बाक्तेक्म।
38नाक्ती परमप्रभु यावे आ गोस्स आ बाक्तीक तारी बाक्त। नाक्दो चहिं मेको गोस्स आगाम मी दुम्त। इस्राएली गोरशो रागीम गाक्मा सम्म मोदेंशो दुम्स ङा दुम्स पा नेल्लेमी ताम्तेक्म।
