ПСАЛТЫР 9:6-20

⁶Ты абурыўся на народы, бязбожнага зьнішчыў, сьцёр іх імёны навечна.

⁷У ворага зброі ня стала зусім, і гарады Ты разбурыў; загінула зь імі памяць пра іх.

⁸А Гасподзь жыве вечна; Ён трон Свой на суд падрыхтаваў,

⁹і Ён будзе судзіць сьвет па праўдзе, па справядлівасьці суд над народамі ўчыніць.

¹⁰І будзе Гасподзь прытулкам прыгнечанаму, прытулкам у скрушлівы час;

¹¹І спадзявацьмуцца на Цябе тыя, што ведаюць імя Тваё, бо Ты не пакідаеш тых, што шукаюць Цябе, Госпадзе.

¹²Сьпявайце Госпаду, Які жыве на Сіёне, абвяшчайце ў народах дзеі Ягоныя,

¹³бо Ён спаганяе за кроў; памятае іх, не забывае енку прыгнечаных.

¹⁴Умілажалься зь мяне, Госпадзе; глянь на цярпеньні мае ад ненавісьнікаў маіх, - Ты, Які ўзносіш мяне над брамаю сьмерці,

¹⁵каб я абвяшчаў усю славу Тваю ў браме дачкі Сіёна: буду радавацца з майго ратаваньня Табою.

¹⁶Народы пападалі ў яму, якую выкапалі; у сетку, якую схавалі яны, ублыталі ногі свае.

¹⁷Гасподзь быў спазнаны праз суд, які Ён учыніў; бязбожнік злоўлены дзеямі рук сваіх.

¹⁸Хай шыбуюць бязбожнікі ў пекла, - усе народы, што забываюць Бога,

¹⁹бо не назаўсёды забудзецца ўбогі, і надзея ўбогіх не назаўсёды загіне.

²⁰Паўстань, Госпадзе, хай чалавек не адужае, хай народы судзяцца прад абліччам Тваім.