SALAMO 9:6-20

⁶Inai taudia vada e dika hanaihanai, vada e puki; edia hanua vada o raḡadia oho, ilalotaodia vada e boio.

⁷A Iehova na terono ai e helai hanaihanaimu, ena terono vada e haginia, hahemaoro totona;

⁸ia ese tanobada e hahemaoro heniamu mai maoromaorona ida, tanobada besedia e hahemaoro henidiamu mai maoromaorona ida.

⁹Haida ese e daḡedaḡe henidiamu taudia edia kohoro na Iehova, ia na edia kohoro, dika negadia ai.

¹⁰Oi ladamu dibadia taudia ese e abidadama henimumu, badina be, Iehova e, oi vada e tahumu taudia na asio rakatanidia.

¹¹Iehova, Siona ai e nohomu Diravana, ba imodaia! Iena kara na bese idau-idau bogaragidiai ba herevalaidia!

¹²Badina be rara davana iabina Diravana ese e lalodiamu; haida ese e daḡedaḡe henidiamu taudia edia taitai na ia ese se laloa boiomu.

¹³Iehova e, ba bogagu hisi! E inai henigumu taudia edia amo na abi hisidia na ba itadia, mase ikoukoudia amo o abigu isimu Diravana e!

¹⁴Bena oi ihanamolaimu herevadia iboudiai baina gwaurai; Siona natuna kekenina ena ikoukou ai emu hahemauri baina moalelaia.

¹⁵Bese idau-idau na sibodia e ḡei guridia lalodiai vada e moru dobi; sibodia e otoa huona ai aedia vada e headai,

¹⁶Iehova na sibona e hahedinarai, hahemaoro vada e karaia; kara dika taudia na sibodia imadia karadia ai vada e heidoa. (Higgaion. Selah)

¹⁷Kara dika taudia na mase taudia edia gabu baela; Dirava e laloa boiomu besedia iboudiai na unu baela.

¹⁸Badina be e dabumu taudia na basine lalodia boio hanaihanai, bona ogoḡami taudia edia helaro na basine mase hanaihanai.

¹⁹Iehova e, a tore isi! Taunimanima na basie kwalimu; bese idau-idau na oi vairamu ai bae hahemaoro henidia.

²⁰Iehova e, ba hagaridia! Bese idau-idau taudia bae diba idia na taunimanima mo. (Selah)