Yontu 30:1-12

¹Tɑfiiti yontu nti pɑ yoo Ɩsɔ təsɛɛlɛ tʋlʋɣʋ wɑɑtʋ tɔɣɔlɔ.

²Hɑɩ, Tɑcɑɑ, mɑ sɑmɑ-ŋ. Mpi tɔ, nyɑ́ ləsənɑ-m lumɑŋ tɑɑ. N tɑ sɔɔlɩ sɩ mɑ kolontunɑɑ ɩ́ pɑɑnɑ-m.

³Mɑ Ɩsɔ Tɑcɑɑ, mɑ wiinɑ-ŋ, ɩlɛnɑ ń wɑɑ-m.

⁴Mɑ nɔɔhəlɛ kɑ wɛʋ pəlɑɑʋ tɑɑ tɔ, nyɑ́ ləsənɑ-m sətɑɑ tɛ́ nɑ ń hɑ-m weesuɣu.

⁵Mpɑ mɛ ɩ́ sɔɔlɑ Tɑcɑɑ tɔ ɩ́ yoo-ɩ yontu. Ɩ́ sɛɛ-ɩ nɑ ɩ́ sɑmɩ-ɩ ɩ tənɑŋŋ wɛɛtʋ tɔɔ.

⁶Ɩ pɑ́ɑ́nɑ́ wɛ lɑɑsɑɣɑ tɔɔ tike kɛ́. Ɩlɛnɑ ɩ kʋpɑntʋ kɛ yʋlʋ weesuɣu tənɑ. Tɑɑnɑɣɑ kɛ yʋlʋ wiiki nɑ kʋ fe tɑnɑŋ ɩlɛnɑ ɩ́ woŋ nɑ ɩ́ kpɑləsɩ.

⁷Wɑɑtʋ wei mɑɑ cɑɣɑnɑ mɑ tɩ tɔ, mɑ hʋʋkɑɣɑ kɛ́ sɩ pʋlʋpʋ kɑɑ lɑ-m.

⁸Tɑcɑɑ nyɑ́ kʋpɑntʋ tɔɔ kɛ́ n kɑ yelɑɑ nɑ mɑ́ səŋ teu təcɑ ɩsɩɩ pʋɣʋ. N kɔmɑ nɑ ń hɑ-m siɣile ɩlɛnɑ pə liɣiti-m.

⁹Ḿpʋɣʋ mɑ mɑpɑ kɑpusi nɑ mɑ́ wiinɑ-ŋ nɑ mɑ́ pɔɔsɩ-ŋ sɩ

¹⁰ye mɑ səpɑ nɑ mɑ́ tii pəlɑɑʋ tɑɑ weɣe n wɑɑkɩ? Yʋlʋ ɩ́ pəsɑ tɛtʋ ɩ tɑsəɣɩ-ŋ sɑm yɑɑ ɩ́ kpɑɑlɩ nyɑ́ kʋpɑntʋ tɔtɔɣɔ?

¹¹Tɑcɑɑ, ke ŋkpɑŋŋ nɑ ń wɑɑsɩ-m, Tɑcɑɑ kɔɔ nɑ ń yɑ-m.

¹²Ḿpʋɣʋ n lɑɣɑsɑ mɑ lɑŋwɑkəllɛ kɛ lɑŋhʋlʋmlɛ, nɑ ń wɔɣɔsɩ mɑ ləyɑɣɑ wontu nɑ ń suu-m ɑcimɑ nyəntʋ.