Miti Mânec 30:1-12

¹Wofuŋ, go bafaharecnumeŋte muafecgupe; go râsifâc‐nane mana‐jaretec pepecne mi enarembiŋ.

²O Wofuŋ Anutu‐nane, no kuku qagarepo, eme goki ɋiɋicne bacnumeŋ.

³O Wofuŋ, go qâqâtâc‐nane hâmoc haeonec baefumeŋ, nombâŋte biŋe jaŋeraonec jujuo bârisiecnumeŋ.

⁴Mitiŋicfâc‐ticne ŋoŋe Wofuŋ mumuteŋ gae hecneniŋ, â tiri ʒâŋe‐ticnere daŋge âzâcneniŋ.

⁵Kimbeŋ‐ticne dameŋ bembeŋne mac fuaekac, aki anonoc‐ticne ine fohuc juha juju dameŋ taraekac. Ŋafeo ki mamakuc iqic‐nâpoekac, hae fureme ine ʒeri bubiaŋ fuaekac.

⁶No ine manape fâsâeha kecʒiŋuc mupo: “No biric boroc moc mi epemu.”

⁷Wofuŋ, go maŋuruc qanarehuc, tiki sanaŋ tinac râecnumeŋ. Erâ ine ʒâŋe maige bâsoŋke‐naretec, bipic tatara enarewec.

⁸Eme Wofuŋ, go kio wâwâsic egarepo, ʒiŋuc muhuc numu‐garepo:

⁹“No nombâŋko hupemuo, hâmoc‐nanezi wemo fârine bâfuaocmu? Rufezi sâcne mumbiaŋguocmu? Erâ‐eesanaŋge sâcne muromackeocmu?

¹⁰Wofuŋ, go manarâ aki anonoc enarec! O Wofuŋ, go baficnuc!”

¹¹Eme go kinane hetikietec gae wowo fuawec, go busâqocte mateŋ hetara‐naremeŋ, ehuc ʒeri bubiaŋte eri hendiŋ henaretec huwec.

¹²Ine maŋ qâqâtâc‐nanezi dâŋemâc mi juhuc mumbiaŋguocte. O Wofuŋ, Anutu‐nane, no daŋge gazarâ gaza ehuc juzepac.