Yaburina 30:1-12

¹Dawudaa bɛtina. Sigi sariɲanxina. Batu Banxin nasariɲan bɛtina.

²Alatala, n ni i batuma, amasɔtɔ i bata n yite. I mi tin n yaxune yi e xunnayeren n xun na.

³Alatala n ma Ala, n ni i mafan nɛn malina fe ra, i yi n nakɛndɛya.

⁴Alatala i n niin masiga nɛn laxira ra, i n faxamatɔɔn nakisi.

⁵Alatalaa tɔgɔndiya muxune birin xa bɛtin ba a xa! Ɛ a matɔxɔ a wali sariɲanxine fe ra!

⁶Bayo, a xɔlɔn mi xunkuya, koni a marafanna luma nɛn muxun siin sogen birin. Wuga xuiin minima nɛn kɔɛɛn na, koni sɛwan fama nɛn xɔtɔnni.

⁷N yi laxi n ma hɛrin na waxatin naxan yi n naxa, “Sese mi n yimaxɛ!”

⁸Alatala, n to yi i ya xanuntenyani, i n lu nɛn fangani alo geyana. Koni i to i yɛtagin luxun n ma, na yi n kɔntɔfili.

⁹N yi i tan Alatala xili, n yi Marigin mafan,

¹⁰n naxa, “N na faxa, i tɔnɔn mundun sɔtɔma nayi? N na sa gaburun kui, tɔnɔn mundun na ra? Faxa muxune nɔɛ i tantunɲɛ ba? E nɔɛ i ya lannayaan matɔxɛ ba?

¹¹Alatala, i tuli mati n na, i kininkinin n ma! Alatala, n mali!”

¹²I bata n ma nimisan maxɛtɛ sɛwan na. I n makininkininna ba n ma, i yi n nabilin sɛwan na.