YOHAAN 13:4-14

⁴a’di cuki mis mo ’peni tonṯe/ mo, dhali a’di ’cuḵki burrinyem p̱om piti mo mmokara ’cesh mo dhali a’di ki deḵ burrinye/ gi imanmiiya ṯu’c e empa’d piti mo.

⁵Dhali yan’ko’d a’di ki wol yi’de/ e bwam ma sahan mo dhali ṯel mii ’pen mo mmolam imanciḵ a’di gwo sho’k mo dhali shumuṯ uni sho’k ki burrinye/ gi imanmiiya ṯu’c jin hitha a’di e empa’d mo be.

⁶A’di p̱u’dki’da Simaan Buṯerus mo dhala Simaan Buṯerus ki o a’di gwo mo ki: Tap̱a, /e mini lam aha/ sho’k pem ’taa?

⁷Yesus ki thoḵ a’di gwo mo ki: To jin miiga/ shwane/ tani dina /e ki mish mo, hili ŋ’ko’d mo tani /e mini mish gwo yan ’ban mo be.

⁸Buṯerus ki thoḵ a’di gwo mo ki: /E mini diki lam aha/ sho’k pem ki sule/ sule/ mo ba/. Yesus ki thoḵ a’di gwo mo ki: Waḵki/ aha/ dinaki lam /e mo tani /e diki ta gi moŋkamu/ e aha/ mo be.

⁹Simaan Buṯerus ki thoḵ a’di gwo mo ki: Tap̱a, jasi sho’k pem ’te/ yisa, hili me’d pem si’da/ mo dhali ’kup̱ mo be.

¹⁰Yesus ki thoḵ a’di gwo mo ki: Adiyin jin up̱kunu mo tani midi mii diki mii ta gi mo jin minu lam a’di mo isi ciki/ jasi sho’k piti mo, hili a’di dhelelki’d ka ’kup̱ kulu/ mo be. Dhali um dhelelkin mo tani, hili yisa umi ’baar mowa.

¹¹Haali/ a’di mishki a’di jin midi ’ciṯẖ a’di is ki gwo mo. A’di i/ona a’di gwo gi wakan mo ki: Umi ’baar mo yisa idheleladhelel mo.

¹²Ki a’di lamki uni sho’k buni mo tani dhali a’di bu’thki burrinyem piti ka nyaŋ’ko’d mo dhali c̱a’b e mom piti mo, dhali a’di ki o uni gwo mo ki: Um mishi ’pemen miiŋ gwo yansan jin miiga/ gom um mowa?

¹³Um yuḵki aha/ ka Manṯor Gwo dhali ki Tap̱a mo. Dhali miim bum ’boro’d be haali/ aha/ wana kan mo be.

¹⁴Waḵki/ aha/ wana kan mmota Tap̱a mo dhali Amanṯor Gwom bum mo lamki um sho’k mo tani um si’da/ ḵa ba/ imini lam sho’k ka gam ’kup̱ mo be.