San Juan 13:4-14

⁴Orzeꞌ Jesuuz wes sum zeꞌ nu zub mi ricy mi che. Orzeꞌ bloom shab mi nu riib par ich. Orzeꞌ gush mi tub negy nu cuiigy mi dey. Orzeꞌ brim ñii nañ mi.

⁵Orzeꞌ bduꞌm nis nañ tub casuel. Orzeꞌ brugyiꞌ nu rgyiib mi gyiꞌ tub ga de yu nu rsyaꞌ lom, nunu pcuiigy mi gyiꞌ dey nu negy nu bri nañ mi zeꞌ.

⁶Na ornu bdugyi Bed nu cyib mi gyiꞌy, orzeꞌ nay rab yum: ―Shuaan na, ¿walab gaal ru cyib ru gyi̱ꞌ ya̱? ―nay.

⁷Orzeꞌ na Jesuuz rab mi yu: ―Na na la wagyet lag ru cuen de coz nu ricy du̱ ru, tees par lo, orzeꞌ gyet lag ru cuen ―nam.

⁸Orzeꞌ na gaꞌ Bed: ―¡Mas lac ruꞌ ya̱ washet ica̱ nu ru cyib ru gyi̱ꞌ! ―nay. Orzeꞌ nam rab mi yu: ―Zeꞌ benu wadiba̱ gyiꞌr, orzeꞌ wac gac ru mbecy ne̱ ―nam.

⁹Orzeꞌ na gaꞌ Simo̱o̱ Bed: ―¡Zeꞌ benu ni, orzeꞌ cueꞌ nu gyiꞌ ziꞌla̱ cyib ru, sinu niꞌ ziꞌl ya̱a̱ gal nu to̱o̱! ―nay.

¹⁰Orzeꞌ na Jesuuz rab mi yu: ―Cyu ziꞌl mbecy nu bi blaagy, yu zeꞌ walagy ñi nu cyib yu deꞌ zir lugaar ni cuerp niy. No maas gyiꞌ ziꞌl yu rlagy ñi nu cyib yu, gun dutuub la cuerp niy bi byacaacy ñi. Zeꞌ de ru bi byacaacy der, tees walab dela der ―nam.

¹¹Jesuuz mniim nu walab dela dey byacaacy yu, gun bi gud lagy mi nu ca na yu nu cush cya ich mi.

¹²Na ornu blazh nu bdiib mi gyiꞌ dey, orzeꞌ bzu gaꞌm shab mi nu riib par ich zeꞌ. Orzeꞌ bish cya gaꞌm nu gusub mi lo mez tuubaꞌ tir. Orzeꞌ nam: ―De ru, ¿a bet lag der cuen coz nu bicy du̱ der ii na?

¹³De ru rnii der nu ya̱ naca̱ moscuel nunu naca̱ Shuaan der. Nunu laab ni gal nu de ru rniir nu naca̱.

¹⁴Tees como ya̱ naca̱ moscuel ni der, nunu naca̱ Shuaan der, se ya̱ bdiba̱ gyiꞌ der, ndeꞌ nu niꞌ de ru rlagy ñi nu cyib tub, cyib tub ziꞌl der gyiꞌ losaꞌr.