João 13:4-14

⁴Xina âwinduadyly umelâ Jesus saudyly. Tâty BOH waunlo nhetyly. Ilâpygueduo toalha nhanâdyly, âzepagâjily.

⁵Adâipygueduo, paru bacia odaji XU nhedyly. Tokalâ, tokalâ warâ xina ihuru ingokely. Ilâpygueduo, toalhague xina in-hugoguewâdyly.

⁶Simão Pedroam saintuo, mâkâ tuhuru igokedyzeba, âdykâ pymâ ânguy ihuru ingokely nepyra tawylygue. Aituo Jesusram aguely: — Urâem tâwaneim mâkeba âmâ, Pymâ. Awylygue uhuru mâingokedyzeba wawyly — kely.

⁷Aituo Jesus eyam aguely: — Iwerâ mâuntuba wâne âmâ âdaituo arâ awidyly awyly. Xutuze olâ âmâ — kely.

⁸— Uhuru mâingokewâbyra ise âmâ — kely Pedro. Aituo Jesus eyam aguely: — Âhuru kâingokeba urâ-ro watay, ynynonro mâkeba ise âmâ — kely.

⁹Jesus agueduo, Pedro aguely: — Pymâ, arâ atayma, uhuru lelâba igokegâ-ro, iemary, yangahu alelâ-ro! — kely.

¹⁰Aituo Jesus aguely: — Kipygueduo, idânârâ kodo tywykuneba, kuhuru lelâ tugokezeim, itybyem kaimpygueduo. Deus inakanhe matomobyry nhygakeduo, iweâ kulâ ityby ara âmaemo. Idânârâ tywykuneba wâne âmaemo; tokalâ olâ tywykeim Deus xurâem — kely Jesus.

¹¹Tutuze myakâwâm Jesus, ânguy tuduery emaxi tyâhoem tâgamenri awyly. Awylygue “Idânârâ tywykuneba wâne âmaemo; tokalelâ olâ tywykeim” kely, Judas agueho.

¹²Xina ihuru ingokebygueduo, Jesus tâty BOH waunlo nhetondyly. Mesa onwa ekadondyly. Xinaram aguely: — Âdaituo âhugoguelymo mâuntuba mawylymo.

¹³“Xina iwymâry”, tâkeze, “xina enomedâni” tâkeze warâ âmaemo yam. Âkealâ amyguelymo.

¹⁴Âwymârymo lelâlâ urâ, inomedânimo lelâlâ warâ, âhurumo olâ xigokeagui, tagonro emawyadâni wâne myara. Agonromo ihugoguewâdaungâ lâpylâ, âsemawyadâni mawylymo mâenehon-homoem.