Jon 13:4-14

⁴Eme ma iy aimon nyamon hawe oro, ano iy suri iy ere loken, iy asini awin badu bwele-en le iu, ma iy andrei kolau ra-ei eme iy tabuwiy i ndrukulun.

⁵Ano ja iy solowei gwa ili bolo bwisi sabok ma iy sikine kati oro lau tan, ano iy owei kati oro lau tan abosar na kolau nane iy tabuwiy udu ndrukulun.

⁶Iy eme isos hawe Saimon Pita, Saimon Pita eme asehek sahou i buku doh i tan, “Laban, ou anya sikine katik?”

⁷Jises asumon sahou ta Pita i buku doh, “Ou bala tanam ta saba lakou jo amekes dah bwe, arile hamon kameh ou barala tanam baramwenen.”

⁸Pita anya, “Jo bwalek, ou winiyan basikine katik bwe!” Jises eme asehek sahou i tan ja, “I buku jo basikine katim bwe eh, ou kameh winiya bado hawek bwai.”

⁹Saimon Pita anuhun sahou ta Jises nane doh, ma manin atur labai. Eme ma iy asehek sahou i tan ja, “Laban, anya i buku baden eh! Ndri-iy ai, ou sasikine le katik, ou sikine minek ma la-uh ma batuk ale.”

¹⁰Jises anya, “Are lau ndranyu mara-ei, iy winiyan banyu ja bwai, idah kameh kasikine le katin. Bada ado ndra bele, arile jo basehek bada ado marakon bwe.”

¹¹Iy ndratanan are lau handru kameh edeu sa-oh tan, ta idoh le ma iy eme asehek, “Bada ado ndra bele, arile jo basehek bada ado marakon bwe.”

¹²Iy sikine kati oro lau tan ano, iy eme atehei awin tan ili la-un ja, ma iy edek ili hamon manyah ili ndrahunen ja. Iy eme lelen oro lau tan, “Saba lakou jo ndramekes ndrawek tado, ado ndratanan sese deh bwe?

¹³Ado aloh jo ndramak ta leheya, ma Laban, mwasin handru ta ado aloh jo i buku doh, tasah, badeh jo amwenen.

¹⁴Jo Laban ma jo ndramak ta leheya, jo nane ndrasikine kati ado. Ado satudun nyara ado, mwasin ta ado kala kasikine kati nadu tine ado iri rayah ja.