Isanquienare Joa 13:4-14

⁴Ari yoacaajeitaquena Jesoshi, impoiji icatianaca. Yojoquireaquero yoicoro. Ishiticatsaquitanacaro ishevorotantari.

⁵Irosati isantacaro nija metaroqui, irosati iquivantajeitaquenarori noitipee: narori, aisati itsipapee iroamerepee. Iro ishetantajanarori noiti ishevorotantari.

⁶Irovetaincha inquivaquiitapeerime iriori Petero, icantavaqueri: —Tempa avirotaque Novincatsarite, te oncameetsateji pinquivenaro noiti narori. Oncameetsateme nonquivempirome piiti avinti.

⁷Yacanaqueri Jesoshi: —Te piotacoteroji meeca oca nantaquempiri. Aitaque piotajero coajicani.

⁸Icantanaqueri: —Eiro piquivanarotsi noiti catsini. Yacanaqueri: —Eirorica noquivimpirotsi piiti, eiro aquempeavacaatsi coajicani.

⁹Irosati icantantacariri: —Jentsite, Novincatsarite, pinquivenaro noitipee, naco, noito, maaroni.

¹⁰Icantanajiri Jesoshi: —Eiro yapiitajatsi inquivajea caajeitaintsiri. Quitejeivetaquempi avinti, iro cantaincha te pinquitejeiteji maaroni.

¹¹Iotaque Jesoshi janica aacanterineri. Irootaque icantantacari: “Te pinquitejeiteji maaroni”.

¹²Itsoncajeitaquena iquivajeitaquenaro noiti maaroni. Iquitsaatajaro aisati yoicoro. Aisati isaviquimojeitajana, icantana: —¿Piojeitaquempa meeca paita nantantayetarori ocapee?

¹³Tempa picantapinijeitana: Oametantatsiri, aisati Pincatsari. Queariotaque oca picantaquenari. Narotaque oamejeitimpiri, pincatsariventajeitimpiri.

¹⁴Pineaquena meeca, noquivajeitaquempiro piiti. Aitaque pinquempetavacaajeiteari avirori, pinquivavacayea piitiqui.