Ioni 13:4-14

⁴Wayahina, tauna am‑nana wayahina mini, a pai bwaꞌ boui, e pai nau‑vi‑ayaya epei, e vi‑haionei.

⁵Ka ine, e daudau iwahi gaeba nihenina, epei, e omo, vi‑putu a tau vi‑muni‑waiwai aei nosinosia, kadu pai nau‑vi‑ayaya wayahina vi‑haiona wayahina aei nau‑vi‑ayayi.

⁶Ka tauna omo Simoni Pita wayahina. Kate Pita vonei, ivona, “Kauvea, eha nau‑wawanim aeu enosia!”

⁷Ka Iesu vona‑nau‑patei, ivona, “Ataina wamke eha yau dewa taina etꞌ‑anamane‑vidohe, kate munia enua‑haui.”

⁸Kate Pita vonei, ivona, “Tuta ataina a itoava auyewa pai nau‑yehata wayahina, yauke eha anꞌ‑awaehem aeu enosia.” Kate Iesu vona‑nau‑patei, ivona, “Aituhu yauke eha anosim, vona ahiahina, wamke eha aitam au tau vi‑muni‑waiwai.”

⁹Wayahina, Simoni Pita vonei, ivona, “Kauvea, aituhu deina, eha aeu ana heta, kadu nimau, ununu, habuhabu enosiu!”

¹⁰Ka Iesu vona‑nau‑patei, ivona, “Aituhu aviyaivia avaha itoa‑yehai, taui nau‑wawani aei ana heta inosia. Taui inini habuhabuna avaha hadahadanina. Ka itomi avaha hadahadanimi deina, kate aitamoata wayahimia eha.”

¹¹Iesu ivona deina, iuna tauna avaha anamanei koiaka munia vi‑nua‑hauhauei. Wayahina, tauna ivona, “Itomi avaha hadahadanimi deina, kate aitamoata wayahimia eha.”

¹²Ka Iesu avaha a tau vi‑muni‑waiwai ai yau 12 aei nosi‑yehai, akanai tauna a pai bwaꞌ weteni‑havinei, e mavina wayahia. E tauna vi‑tanaiei, ivona, “Yau dewana wayahimi unua‑haui, o eha?

¹³Uvi‑wahaniu ‘Tau Viwavenena’ kadu ‘Kauvea’ ka akanai, vonana vivane vona tunutunuhina.

¹⁴Memeanina nuami vi‑tupatupa, kate avonemi, tau paisewa eha ai tau veimea ivane‑tawane. Kadu aitamoata deina, tau mataeda eha ai tau vi‑tune ivane‑tawane. Kadu aitamoata deina, itomi eha uvane‑tawaneu. Udueyei! Yauke vivane yami Kauvea kadu yami Tau Viwavenena, ka taua avaha aemi anosia. Dewana adewei yami pai dune ivaita wayahina. Wayahina, itomi aitamoata aitamoata nau‑wawanimi tuta tuta una‑ivaitemi. Yauke avaha dewa‑vidovidoha a pai dune ahiahina avenemi. Wayahina, itomi nau‑wawanimi kadu uvi‑tau paisewa aitamoata aitamoata wayahimia, yauke avi‑tau paisewa wayahimia aitamoata deina.