Yowan 13:4-14

⁴Le nga Yesu iwulai kaningi so, inbe imadit tina le idudu sousoungu mooloo ki in du tana, inbe ikap manmaningi pattu a iwitkala lo galini.

⁵Motong la iti ran du ye omai atu, inbe imadit ye ngasingi di galiunu tina ngan kedi a imanman ye manmaningi yo iwitkala lo galini i.

⁶Ngan iyei nen le la pombe ye Simon Pita, le nga Pita imadit tina le itoru nen, “Tool Mai, ngan lom belei, ole kungas kek, too?”

⁷Motong la Yesu iraua betanga ki nen, “So yo ayei nga, nookoot nga ong i lom galanga ye tiap, bong pang dama ni nga, ngan ole lom galanga ye.”

⁸Le nga Pita iwete panga nen, “Atoo, au i o ke be amalum pong be kungas kek pitiap yege.” Pita iwete nen, motong la Yesu iyei ne, “Kumata le be angas kem tiap nga, ngan ong in o ke be kuyepe yau tiap.”

⁹Le nga Simon Pita iyei ne, “Tool Mai, be nen nga, ngan kungas kek leu be, bong kungas baek inbe kutok lapau.”

¹⁰Motong la Yesu iwete panga nen, “Tool be irriu koot nga, ngan ke be irriu mulu tiap, bong ole ingas kene leu, inbe tinini mai i igalanga le imot. Ngan ang nga tinimim igalanga oo, bong ang nga le imot tiap.”

¹¹Ngan Yesu in lon galanga ye tool yo be itaru la di koi ki baedi in oo. Ngan ye punu in la le iwete be di le imot ngan tinidi igalanga tiap nga.

¹²Yesu ingas di galiunu tina ngan kedi a imot, motong la isousou mulu ye sousoungu mooloo ki tani, inbe imulu la iwur ye nene. Motong la itor di nen, “Ai, ang nga lomim galanga ye soo so yo ayeii pang in lapau, too?

¹³Ang nga kakiu au ye ‘Pannoongoo’ inbe ‘Tool Mai’ nga, ngan kawete gorrau le dook mata, yesoo au i urata kiau tina nangan.

¹⁴Le kumata be au i Tool Mai inbe Pannoongoo kiang la angas kemim nga, ngan ole ang lapau, kayei nen a kangas di diemim kapala kedi.