Yohɑɑnɩ 4:11-42

¹¹Ḿpʋ́ɣʋ́ ɑlʋ cɔ Yesu sɩ: Mɑ cɛ, n fɛɩnɑ kʋlulunɑʋ ŋku n kɑ́ lunɑ tɔ. Pǝ́cɔ́ lɔkɔ nɑ́ tɩɩ lumɑɑ. Ɩlɛ leɣe n kɑ́ hiki weesuɣu lʋm mpɩ?

¹²Tɑ́ lɔŋcɛ Yɑkɔpʋ hulinɑ lɔkɔ ɩnɛ nɑ tɑ́ɑ́ mɑɣɑnɑ-ɩ. Hɑlɩ Yɑkɔpʋ nɑ ɩ piyɑ nɑ ɩ kɑlǝkǝŋ pɑ nyɔɔ lɔkɔ ɩnɩ ɩ lʋm. Ɩlɛ n hʋʋ sɩ n kǝlɑ ɩlɛ?

¹³Ḿpʋ́ɣʋ́ Yesu cɔ ɑlʋ sɩ: Wei ɩ́ nyɔɔ lɔkɔ ɩnɛ ɩ lʋm lʋkɔtʋ tɑsǝɣɩ-ɩ kpɑʋ kɛ́.

¹⁴Amɑ wei ɩ́ nyɔɔ lʋm mpi mɑɑ hɑ-ɩ tɔ, lʋkɔtʋ ɩɩ lɛlǝɣɩ-ɩ kpɑʋ pɑɑ pǝlee. Pǝ tɑɣɑ pʋlʋ, lʋm mpi mɑɑ hɑ-ɩ tɔ pɩɩ lɑ ɩ tɑɑ kɛ́ lʋm sɛɛlʋ wei ɩ cɛtǝɣɩ tɔ. Hɑlǝnɑ ɩ́ hiki weesuɣu ŋku kɩɩ tɛŋ tɔ nɑ ɩ kiŋ.

¹⁵Ḿpʋ́ɣʋ́ ɑlʋ cɔ Yesu sɩ: Mɑ cɛ hɑ-m lʋm mpɩ, ɩlɛ lʋkɔtʋ kɑɑ tɑsɑ-m kpɑʋ, nɑ mɑ́ tɑɑ tɑsɑ cǝnɛɣɛ mǝlʋɣʋ kɛ lʋm luɣu.

¹⁶Ḿpʋ́ɣʋ́ Yesu tɔmɑ ɑlʋ sɩ: Polo ń yɑɑ nyɑ́ pɑɑlʋ nɑ nyɑ́ nɑ-ɩ ɩ́ kɔɔ cǝnɛ.

¹⁷Ḿpʋ́ɣʋ́ ɑlʋ cɔwɑ sɩ: Mɑ fɛɩnɑ ɑpɑlʋ. Ɩlɛnɑ Yesu cɔ ɑlʋ sɩ: Tɑmpɑnɑ kɛ n yɔɣɔtɑɑ sɩ n fɛɩnɑ ɑpɑlʋ.

¹⁸Pǝ tɑɣɑ pʋlʋ, n tɛmɑ ɑpɑlɑɑ kɑkpɑsɩ kɛ sɑɑʋ, nɑ wei ɩ tɛ n tɩɩ wɛ kɑɣɑnɑ ɩsǝntɔ tɔ n wɛ yem, pǝ tɑɣɑ nyɑ́ pɑɑlʋ. Pǝ tɔɔ kɛ́ nyɑ́ tɔm wɛnɑ tɑmpɑnɑ.

¹⁹Ḿpʋ́ɣʋ́ ɑlʋ cɔ Yesu sɩ: Tɑcɑɑ, mɑ nɑɑ sɩ n kɛ́ Ɩsɔ kʋyɔɣɔtʋtʋ tɛlǝsʋlʋ.

²⁰Tɑ lɔŋcɛnɑɑ sɛɛkɑɣɑ Ɩsɔ kɛ́ pʋɣʋ kʋnɛ kʋ tɔɔ. Amɑ Yutɑ nyǝ́mɑ mɛ mǝ tɔŋ sɩ ye pɑɑ sɛɛ Ɩsɔ Yosɑlɛm kɛ́.

²¹Ḿpʋ́ɣʋ́ Yesu cɔ ɑlʋ sɩ: Alʋ nyɑ́ nɩɩ mɑ tɔm, pɩɩ kɔɔ tɔ, Tɑcɑɑ Ɩsɔ sɛɛʋ kɑɑ wɛɛ tǝntǝmlɛ tɔm, sɩ pʋɣʋ kʋnɛ kʋ tɔɔ yɑɑ Yosɑlɛm.

²²Sɑmɑlii nyǝ́mɑ mɛ ɩ́ tɑ nyɩ wei ɩ́ sɛɛkɩ tɔ. Amɑ Yutɑ nyǝ́mɑ tɑ tɑ́ nyǝmɑ́ wei tɑ́ sɛɛkɩ tɔ. Pǝ tɑɣɑ pʋlʋ, Yutɑ nyǝ́mɑ kiŋ kɛ Ɩsɔ sɛɛʋ mpi pǝ wɑɑsǝɣɩ tɔ pǝ wɛɛ.

²³Amɑ pǝ wɛɛ pɩɩ kɔɔ, hɑlɩ pǝ tɩɩ tɛmɑ kɔntɛ te, nɑ mpɑ pɑ sɛɛkɩ Ɩsɔ nɑ tɑmpɑnɑ tɔ pɑɑ sɛɛ-ɩ hɑtoo pɑ tɑɑ kɛ́ nɑ cɛsʋɣʋ fɛɩ. Ɩsɔ sɛɛlɑɑ ɩsɩɩ mpʋ wɛɣɛ Cɑɑ Ɩsɔ sɔɔlɑɑ.

²⁴Ɩsɔ ɩɩ nɑɑ ɩsɛntɔɔ, pǝ tɔɔ kɛ́ mpɑ pɑ sɛɛ-ɩ tɔ, pǝ tɑɣɑ ɩsɛntɔɔ kɛ pɑɑ sɛɛ. Amɑ pɑ tɑɑnɑɑ kɛ́ nɑ cɛsʋɣʋ fɛɩ.

²⁵Ḿpʋ́ɣʋ́ ɑlʋ cɔ Yesu sɩ: Mɑ nyǝmɑ́ sɩ Mesii wei pɑ yɑɑ sɩ Kilisiti tɔ ɩ kɑ́ kɔɔ te, ye ɩ́lɛ́ ɩ kɔmɑ, ɩ kɑ́ kilisi-tʋɣʋ pǝ tǝnɑ.

²⁶Ḿpʋ́ɣʋ́ Yesu cɔ ɑlʋ sɩ: Mɑ wei mɑ yɔɣɔtǝɣǝnɑ-ŋ ɩsǝntɔ tɔ, mɑɣɑlɛ Mesii ɩnɩ.

²⁷Yesu nɑ ɑlʋ pɑ tɔŋnɑ yɔɣɔtɑɣɑ kɛ ḿpʋ́ɣʋ́ ɩlɛnɑ ɩ ɩfɑlɑɑ tɑlɑ, nɑ pǝ́ lɑ-wɛɣɛ piti kɛ́ mpi pǝ tɔɔ ɩ nɑ ɑlʋ tɑkɑ pɑ yɔɣɔtǝɣɩ tɔ. Pɑɑ nɑ mpʋ pɑ tɑɑ nɔɣɔlʋ tɑ pɔɔsɩ sɩ: Pepeɣe n cɑɑ ɩ kiŋ? Yɑɑ ntiɣi nyɑ́ yɔɣɔtǝɣǝnɑ-ɩ?

²⁸Tǝnɑɣɑ ɑlʋ mǝŋnɑ ɩ hǝyɑɣɑ nɑ ɩ́ sɩɩ. Ɩlɛnɑ ɩ́ mǝlɩ ɩcɑtɛ tɑɑ nɑ ɩ́ yɑɑ yǝlɑɑ sɩ:

²⁹Ɩ́ kɔɔ nɑ ɩ́ nɑ́ ɑpɑlʋ nɔɣɔlʋ wei ɩ kpɑɣɑ pǝ tǝnɑ mpi tuu mɑ lɑpɑ tɔ nɑ ɩ́ kɛɛsɩ. Ɩ tɑ kɛ Mesii yee?

³⁰Ḿpʋ́ɣʋ́ yǝlɑɑ lɩɩ ɩcɑtɛ tɑɑ nɑ pɑ́ puki Yesu kiŋ.

³¹Alʋ ɩnɩ ɩ tɛɛ mpʋ tɔ, nɑ ɩ ɩfɑlɑɑ nɑ́ɑ́ tɔŋnɑ-ɩ tɛɛkʋɣʋ kɛ́ sɩ: Tɑcɑɑ n kɑɑ tɔɣɔ mpʋ?

³²Amɑ Yesu cɔ-wɛ sɩ: Tɔɣɔnɑɣɑ ŋkɑ mɑ tɔkɩ tɔ ɩ tɑ nyɩ-kɛ.

³³Ḿpʋ́ɣʋ́ Yesu ɩfɑlɑɑ pɔɔsɑ tǝmɑ sɩ: Nɔɣɔlʋ kɔnɑ-ɩ tɔɣɔnɑɣɑ kɛ yee?

³⁴Tǝnɑɣɑ Yesu cɔ-wɛ sɩ: Mɑ tɔɣɔnɑɣɑ ntɛ́ wei ɩ tilɑ-m tɔ ɩ luɣu nyǝntʋ lɑpʋ, nɑ ɩ tǝmlɛ nte ɩ hʋlɑ-m sɩ mɑ́ lɑ tɔ tǝ yoosuɣu.

³⁵Mɛ mǝ tɔŋ sɩ: Pǝ kɑɑsɑ ɩsɔtʋnɑɑ liɣiti nɑ kʋmtʋ tɑlɑ. Amɑ mɑ́, mɑ heeliɣi-mɛ sɩ, ɩ́ kʋsɩ mǝ ɩsɛ nɑ ɩ́ nɑ ɩsǝnɑ kʋtɔɣɔʋ sɛɛnɑ tɑwɑ nɑ kʋ tɑŋɑ kʋntɑɑ tɔ.

³⁶Kʋntʋ wei ɩ kʋŋ tɔ, ɩ tɔŋɑ ɩ kʋfɛlʋɣʋ hikuɣu kɛ́, nɑ ɩ́ nyǝkǝɣɩ pee tɔtɔɣɔ ɩ weesuɣu ŋku kɩɩ tɛŋ tɔ kʋ tɔɔ. Mpʋ pǝ lɑkǝnɑ nɑ tuulu nɑ kʋntʋ pɑ́ kpɛntǝɣɩ yɔɔlʋɣʋ.

³⁷Pǝ tɔɔ kɛ́ tɔm nti pɑ yɔɣɔtǝɣɩ tɔ tǝ wɛnɑ tɑmpɑnɑ sɩ: Lɛlʋ tuuki kɛ́ nɑ lɛlʋ nɑ́ɑ́ kʋ.

³⁸Mpʋ tɔtɔɣɔ, mɑ tilɑ-mɛ sɩ ɩ́ kʋ hɑlǝm mpi ɩ́ tɑɑ hɑlɑ tɔ. Lɛlɑɑ nɑ́ hɑlɑɑ nɑ kɑɣɑnɑ pǝ wɑɑsǝɣɩ-mɛ.

³⁹Ɩcɑtɛ ńtɛ́ tǝ tɑɑ Sɑmɑlii nyǝ́mɑ pɑɣɑlɛ mʋ Yesu tɔm kɛ tɔm nti ɑlʋ kɑ yɔɣɔtɑɑ tǝfoo sɩ: Ɩ kpɑɣɑ pǝ tǝnɑ mpi tuu mɑ lɑpɑ tɔ nɑ ɩ́ kɛɛsɩ tɔ tǝ tɔɔ.

⁴⁰Wɑɑtʋ wei Sɑmɑlii nyǝ́mɑ tɑlɑ Yesu kiŋ nɑ pɑ́ nɑ-ɩ tɔ, pɑ wiinɑ-ɩ sɩ ɩ́ lɑ wɛɛ nɑɑlɛɣɛ pɑ kiŋ. Ɩlɛnɑ ɩ́ cɑɣɑ tǝnɑɣɑ kʋyɛɛŋ nɑɑlɛ.

⁴¹Pǝ kɔmɑ nɑ pɑ́ nɩɩ ɩ mɑɣɑmɑɣɑ ɩ kʋyɔɣɔtʋtʋ, ɩlɛnɑ yǝlɑɑ sɑmɑɑ kɛ sɔsɔm tɑsɑ ɩ tɔm kɛ mʋɣʋ.

⁴²Nɑ pɑ́ tɔŋ ɑlʋ sɩ: Pǝnɛntɛ pǝ tɑɣɑ nti n heelɑ-tʋ tɔ tǝ tɔɔ tike kɛ tǝ mʋ ɩ tɔm. Amɑ tɑ́ mɑɣɑmɑɣɑ tǝ nɩɩnɑ tɑ́ ŋkpɑŋŋ nɑ tǝ tɛmɑ tɑ́ tɑɑ sɩ, tɑmpɑnɑ ɩ kɛ́ ɑntulinyɑ Wɑɑsʋlʋ.