YOHAAN 4:11-42

¹¹Dhala ’bom ki thoḵ a’di gwo mo ki: Tap̱a, /e dar gi to mmomush yi’de/ mo dhali jis yi’de/ ’kula’kul mo ba/. Yi’de/ jin di ki e mina /e igam ’peni mana mo?

¹²A/ki /e can ka babam bam ka Yakuub ’taa? a’di jin c̱iki aman jis yi’de/ yansan mo? Dhali a’di ki is piti p̱iki’d si’da/ mo ’peni jis yi’de/ yansan mo dhali iya/m piti mo dhali to/em piti mo be.

¹³Yesus ki thoḵa yim gwo mo ki: Aris uni ’baar mo ka ’deṯe/ ’deṯe/ kun p̱i yi’de/ yansan mo tani mina yi’de/ doḵ/e bu’th mo be.

¹⁴Hili a’diyin jin midi p̱i yi’de/ jin miga/ c̱i a’di mo tani mina yi’de/ diki doḵ/e bu’th ki sule/ sule/ mo. Yi’de/ jin miga/ c̱i a’di mo tani midi war mo e a’di mmokash mo dhali mmodu’d mo ntagi mondiki/e ki sule/ sule/ ya ye ’ba/ mo be.

¹⁵Dhala ’bom ki thoḵ a’di gwo mo ki: Tap̱a, c̱iyi aha/ yi’de/ yansan mo ma, ki aha/ mina yi’de/ diki doḵ/e bu’th mo walla mmodiki yayu/ imahan mmoha’b yi’de/ mo be.

¹⁶Yesus ki owa yim gwo mo ki: Yaku/ mo ma. Yuḵa kaṯẖim pini mo dhali yayu/ imahan mo.

¹⁷Dhala ’bom ki thoḵ a’di gwo mo ki: Aha/ dara ga kaṯẖim pem mo. Yesus ki thoḵa yim gwo mo ki: Gwom pini ’boro’d mo jin ona /e gwo mo ki: Aha/ dara ga kaṯẖim pem mo be.

¹⁸Haali/ /e ’dap̱kina gwaṯẖ ’twa/ ka mudhe’d mo dhali a’di jin di’di /e shwane/ mo tani yisa ta’da kaṯẖim piniya. Gwo yan ona /e ki oŋ gana/ mo be.

¹⁹Dhala ’bom ki o a’di gwo mo ki: Tap̱a, aha/ nyiṯẖkina ki /e tana manc̱i gwo ma Arumgimis mo be.

²⁰Haali/ ibabam bam uni iluŋkin e ’kuwosh yansan mo be dhali um o gwo ki mo gi Pa Urushaliim a’di ta mo jin mina ’kwani ḵa mii iluŋ mo ba/.

²¹Yesus ki thoḵa yim gwo mo ki: A’boma, gami aha/ gwo is mo ma. Mo midi p̱u’du/ mo ki um mini ’koki luŋa Baba e ’kuwosh yan mo walla e Pa Urushaliim mo be.

²²Um luŋki to jin ’kona um ki mish mo. Aman luŋkina a’di jin misha aman mo haali/ mowoṯẖ piyi’d mo ’peni ’Kwani Yahuuda/ mo be.

²³Hili, mo midi p̱u’du/ mo dhali a’di a’dan shwane/ mo ki uni gun luŋkina luŋ ki bwaŋ gana/ mo tani mini luŋa Baba ki shi/in mo dhali ki gwoŋ gana/ mo haala Baba ŋap̱ki ku gi wakansan mmoluŋ a’di mo be.

²⁴Arumgimis ta shi/in be dhali uni gwansan kun luŋki a’di mo tani mini mii luŋ a’di ki shi/in dhali ki gwoŋ gana/ mo be.

²⁵Dhala ’bom ki thoḵ a’di gwo mo ki: Aha/ misha ka Masiyya midi p̱u’du/ mo (a’di jin yuḵu gway ka Ḵrisṯẖos mo tani), dhali ki a’di midi p̱u’du/ mo tani a’di midi ṯor aman aris to ’baar mo be.

²⁶Yesus ki thoḵa yim gwo mo ki: Aha/ jin ṯora /e gwo mo tani aha/ a’dan be jin tana a’di mo be.

²⁷Dhali yan’ko’d ki ’ta’b mo tani imanciḵ a’di gwo p̱u’dkin mo. Dhali uni merkin mo mmoṯorkina a’di aṯor ka ’bom mo. Hili jan ṯal ’deŋ kamu/ yisa ḵa’d ’twa/ mo mmo/o gwo mo ki: Atinta ŋap̱a /e mo, walla, Atinta ṯorkina /e aṯor nyaḵka yim mo?

²⁸Wakan a’bom dhalki dhur yi’dem piti ’pen mo dhali ya ’peŋkuman bampa/ mo dhali ṯor ’kwani gwo mo ki:

²⁹Iiyu/ mo ma dhali p̱ar wathiŋ kamu/ e mo jin ṯorki aha/ aris tom pemi ’baar mo kun miikika/ mo. Yansan diki ta Ḵrisṯẖos ’teya?

³⁰Dhali uni iikin ka pije/ mo ’peni bampa/ mo dhali p̱u’dku/ i a’di mo be.

³¹Ki embul mo yan mo tani imanciḵ a’di gwo ŋap̱ki a’di mo mmo/o a’di gwo mo ki: Rabbi, shwayi to mo ma.

³²Hili a’di ki thoḵ uni gwo mo ki: Aha/ takina gi tonṯe/ mmoshwa mo a’di jin molkina um mo be.

³³Wakan imanciḵ a’di gwo o gwo ka rem ’kup̱ mo ki: Ki wathiŋ kamu/ ḵalki a’di tonṯe/ mmoshwa mo ’taa?

³⁴Yesus ki thoḵ uni gwo mo ki: Tonṯem pem jin shwaka/ mo tani ta bwa gi a’di jin hashki aha/ mo dhali mmothima ṯu’c piti mo be.

³⁵’Kona um ki o gwo mo ki: Appe boc̱a ’kup̱i doŋon mo naskina/ dhali yan’ko’d mo gi ’ciṯẖu/ to midi p̱u’du/ mo. Dhali aha/ ṯora um gwo mo ki: ’Deki em bumi mis mo dhali hili mombunto mo, a’di kusha to mo mo hila/ mmo/is mo gom mo jin minu ’ciṯẖ a’di to mo be.

³⁶A’di jin ’ciṯẖki to mo tani midi bu’th jin mina a’di gam mo dhali tul maman is gom mondiki/e ki sule/ mo. Wakan amanyeḵa ḵa’bany to mo dhali aman’ciṯẖ to mo uni ’kunykina bwa mo mmonṯal ’de/ mo be.

³⁷E mii yan mo tani gwo jin onu mo gama gam ki gwoŋ gana/ mo jin o gwo mo ki: Wathin ṯal ’de/ ki si to mo dhali jaŋ kamu/ ki ’ciṯẖ to mo be.

³⁸Aha/ hashkina um mo mmo’ciṯẖ a’di, a’di jin ’kokina um ki miiya ṯu’c mo. Kun tiya uni miikina ṯu’c mo dhali um cic̱kin e mo ma ṯu’c buni mo be.

³⁹’Kwani Samiriyiin ’peni ’peŋkuman bampa/ c̱aan mo tani gamki a’di gwo is mo haali/ gom gwo jin ṯor ma ’bom mo mmo/o gwo mo ki: A’di ṯorki aha/ gwo mo goma ris to ’baar mo kun miikika/ mo be.

⁴⁰Wakan ki ’Kwani Samiriyiin p̱u’dkin e a’di mo tani uni doṯki a’di mo mmonyaḵ c̱a’b e uni mo, dhali a’di c̱a’bki’di mun ka cim su/ mo be.

⁴¹Dhali uni ka ris ris gamki gwo is mo gom gwom piti mo be.

⁴²Dhali uni ki owa ’bom gwo mo ki: A’di yisa di’d mmota gwom pini jin gama aman gwo is mo yisa haali/ aman ciḵkina gwo ki is bam mo, dhali aman misha a’di yansan ka jiŋ gana/ a’di ita’da Manwoṯẖ gi ’kwaniny’cesh mo be.