Tillɑɑ Tǝmlɛ 2:5-42

⁵Pǝ pɑmnɑ mpɑ pɑ tǝŋǝɣɩ Ɩsɔ mpɑɑʋ kɛ teu tɔ pɑ lɩɩnɑ ɑntulinyɑ tǝnɑ tɑɑ nɑ pɑ́ wɛ Yosɑlɛm kɛ wɑɑtʋ ɩnɩ.

⁶Yǝlɑɑ mpɛ pɑ nɩɩ kɔkɔtɛ ńtɛ́ tǝ tɑŋ, ɩlɛnɑ pɑ́ koti sɔsɔm. Ḿpʋ́ɣʋ́ pǝ lɑpɑ-wɛɣɛ hɑ, pǝ tɑɣɑ pʋlʋ, pɑɑ wei ɩ nɩɩkɑɣɑ Ɩsɔ sɛɛlɑɑ yɔɣɔtǝɣǝnɑ ɩ tɛ tɑɑ.

⁷Tǝnɑɣɑ pɑ kpɑ nɔɔsɩ nɑ pǝ́ lɑ-wɛɣɛ piti, nɑ pɑ́ tɔ sɩ: Ɩsɩɩ Kɑlilee nyǝ́mɑ tike yɔɣɔtǝɣǝnɑ ɩsǝntɔ.

⁸Ɩlɛ pǝ lɑpɑ ɩsǝnɑ nɑ pɑɑ tɑ́ tɑɑ wei ɩ́ nɩɩkɩ pɑ yɔɣɔtǝɣǝnɑ ɩ tɛ tɑɑ?

⁹Anɩ tɑ́ tɑɑ cǝnɛ mpɑ pɑ lɩɩnɑ Pɑɑtɩ tɛtʋ tɔ pɑ wɛɛ, Metii nɑ Ɩlɑm pǝ nyǝ́mɑ nɑ́ wɛɛ, Mesopotɑmi nyǝ́mɑ nɑ́ wɛɛ, nɑ Yutɑ nɑ Kɑpɑtɔɔsɩ pǝ nyǝ́mɑ, nɑ Pɔŋ nyǝ́mɑ nɑ Asii tɛtʋ nyǝ́mɑ,

¹⁰Filicii nɑ Pɑmfili pǝ nyǝ́mɑ, nɑ Icipiti nyǝ́mɑ nɑ Silɛɛnɩ cɔlɔ Lipii tɛtʋ hɔɣɔlʋɣʋ lɛŋkʋ nyǝ́mɑ, nɑ pǝ kɑɑsɑ lɛlɑɑ mpɑ pɑ lɩɩnɑ Lom tɔ.

¹¹Yutɑ nyǝ́mɑ siɣisiɣi wɛɛ, nɑ pǝ kɑɑsɩ mpɑ pɑ sʋʋ Yutɑ nyǝ́mɑ Ɩsɔsɛɛlɛ kɛ kʋsʋʋ tɔ, nɑ Kǝlɛɛtɩ nyǝ́mɑ nɑ Alɑpʋ nyǝ́mɑ. Pɑɑ nɑ mpʋ pɑ tɩɩ kɛɛsǝɣɩ Ɩsɔ tǝmɑ sɔsɔɔnɑ tɔm nɑ tɑ́ tɔmnɑɑ wɑɑnɩ wɑɑnɩ tɑɑ, nɑ tǝ nɩɩkɩ tɑ́ tǝnɑ.

¹²Pǝ tǝmsɑ pɑ tǝnɑ, pɑ tɑ nyɩ nti pɑɑ yɔɣɔtɩ tɔ. Ɩlɛnɑ pɑ́ pɔɔsǝɣɩ tǝmɑ sɩ, tɔm tǝnɛ ntiɣilɛ mpʋ?

¹³Amɑ lɛlɑɑ nɑ́ woŋɑ-wɛ, nɑ pɑ́ tɔ sɩ sʋlʋm pɩɩnɑ-wɛ.

¹⁴Tǝnɑɣɑ Piyɛɛ nɑ tillɑɑ lɛlɑɑ nɑɑnʋwɑ nɑ kʋlʋm ɩnɩ pɑ kʋlɑɑ nɑ pɑ́ sǝŋ ɩsɔ. Ɩlɛnɑ Piyɛɛ yɔɣɔtǝnɑ sɑmɑɑ nɑ nɔɣɔ sɔsɑɣɑ sɩ: Mɑ Yutɑ nyǝ́mɑ mɛ, nɑ mpɑ mɛ mǝ kɔmɑ Yosɑlɛm kɛ kʋkɔm tɔ, ɩ́ tʋ ŋkpɑŋŋ nɑ ɩ́ cɛkǝnɑ teu kɛ nti mɑ heeliɣi-mɛ tɔ.

¹⁵Pǝ tɑɣɑ sʋlʋm kʋɣʋnɑ yǝlɑɑ pɑnɛ ɩnɩ ɩsɩɩ ɩ́ hʋʋkɩ tɔ. Pǝ tɑɣɑ pʋlʋ tɔɔ, pǝ kǝlɑ tɑnɑŋ.

¹⁶Amɑ nti Ɩsɔ kʋyɔɣɔtʋtʋ tɛlǝsʋlʋ Sowɛɛlɩ kɑ yɔɣɔtɑɑ tɔ, ntɩ tǝ mɑɣɑmɑɣɑ tǝ lɑkǝnɑ sɑŋɑ.

¹⁷Ɩsɔ yɔɣɔtɑɑ sɩ: Nti mɑɑ lɑ kʋyɛɛŋ kɑntǝkɑɣɑ nyǝŋ tɑɑ tɔɣɔlɔ. Mɑɑ tisi mɑ Feesuɣu kɛ yǝlɑɑ tǝnɑ tɔɔ. Mǝ pǝyɑlɑɑ nɑ mǝ pɛɛlɑɑ kɑ́ nɑ nti tɩɩ lɑ cele tɔ nɑ pɑ́ yɔɣɔtɩ. Pɩɩ hʋ́lɩ́ mǝ ɩfepiyɑ kɛ tɔmnɑɑ nɑ pɑ́ nɑnɑ pɑ ɩsǝpee. Nɑ mǝ kʋkpɑtǝlɑɑ kɑ́ toosi toosee.

¹⁸Tɑmpɑnɑ tɔɔ, mɑɑ tisi mɑ Feesuɣu kɛ mɑ tǝmlɛ nyǝ́mɑ, ɑpɑlɑɑ nɑ ɑlɑɑ nyǝ́mɑ, pɑ tɔɔ kɛ́ kʋyɛɛŋ ɩnɩ ɩ tɑɑ. Pɑɑ nɑ́ nti tɩɩ lɑ cele tɔ nɑ pɑ́ yɔɣɔtɩ-tɩ.

¹⁹Mɑɑ lɑ kɔkɔlɔ nyǝmnɑɑ kɛ hɑtoo ɩsɔtɔnʋɣʋ tɑɑ, nɑ piti tǝmɑ kɛ ɑtɛ. Cɑlǝm nɑ kɔkɔ nɑ nyɔɔsɩ sɔsɔɔnsɩ kɑ́ nyɑlɑ.

²⁰Ilim kɑ́ sɩ tǝkpitii. Ɩsɔtʋ kɑ́ sɛɛ ɩsɩɩ cɑlǝm. Pǝ tǝnɑ pɩɩ lɑ mpʋ nɑ pǝ́cɔ́ pǝ́ tɑlɑ Tɑcɑɑ kʋyɑkʋ sɔsɔɔŋkʋ teeli nyǝŋkʋ ŋkʋ.

²¹Pǝ́ nɑ pǝ mpʋ tɔ yǝlɑɑ tǝnɑ mpɑ pɑɑ yɑɑ Tɑcɑɑ hǝtɛ tɔ pɑɑ tʋlɩ-tɩ.

²²Ɩsɛɣɛlɩ nyǝ́mɑ mɛ, ɩ́ nɩɩ nti mɑ heeliɣi-mɛ tɔ. Nɑsɑlɛtɩ Yesu kɛ́ yʋlʋ wei ɩ sɔsɔɔntʋ Ɩsɔ hʋ́lɑ́-mɛ tɔɣɔ. Pǝ tɑɣɑ pʋlʋ, Yesu niŋ kɛ Ɩsɔ lɑpǝnɑ piti tǝmɑ nɑ sɔɣɔntʋ tǝmɑ nɑ Ɩsɔ kɔkɔlɔ nyǝmnɑɑ mpɑ ɩ hʋ́lɑ́ mǝ hɛkʋ tɑɑ tɔ. Ɩsɩɩ mǝ mɑɣɑmɑɣɑ ɩ́ nyǝm pǝ tǝnɑ tɔ.

²³Nɑ yʋlʋ ɩnǝɣɩ Ɩsɔ kpɑɣɑɑ nɑ ɩ́ cɛlɛ-mɛ ɩsɩɩ ɩ kɑ hʋʋ ɩ tɑɑ nɑ ɩ́ tʋ pǝ pǝlɛ sɩ ɩ kɑ́ lɑ tɔ. Amɑ mǝ kʋ-ɩ, mǝ yelinɑ nɑ yǝlɑɑ ɑsɑɣɑɑ kɑmɩ-ɩ sǝm tesikɑ tɔɔ.

²⁴Amɑ Ɩsɔ yɔkɑ sǝm tomɑ nɑ ɩ́ feesi-ɩ. Pǝ tɑɣɑ pʋlʋ, pǝ fɛɩ sɩ sǝm ɩ́ lɑpɩ-ɩ pʋlʋ cǝcǝkɑ.

²⁵Tɑmpɑnɑ, Tɑfiiti yɔɣɔtɑ Yesu ɩnɩ ɩ tɔm kɛ mpʋ sɩ: Mɑ nɑɑkɑɣɑ Tɑcɑɑ kɛ tɑm kɛ́ mɑ cɔlɔɣɔ. Ɩ kɑ sǝŋɑ mɑ wɑɑlɩ kɛ́ sɩ mɑ́ tɑɑ selinɑ pʋlʋ.

²⁶Pǝ tɔɔ kɛ́ mɑ lɑɑkɑlɩ cɑɣɑ tǝntǝmlɛ kɛ teu, nɑ lɑŋhɛɛlɛ kʋɣʋ-m mɑ yɔɣɔtɑɣɑ tɑɑ. Pɑɑ mɑ kɛ́ yʋlʋ nɑ mɑɑ sɩ tɔ, mɑ cɑɣɑnɑ tɛɛlʋɣʋ.

²⁷Pǝ tɑɣɑ pʋlʋ tɔɔ, Ɩsɔ nyɑ́ n kɑɑ lɔ-m yem kɛ́ ɑtɛtǝlɛ tɑɑ. N kɑɑ yele sɩ nyɑ́ yʋlʋ mɑ́ mɑ́ tɩɩ sɔŋ pɑɑ pǝcɔ mɑɣɑmɑɣɑ.

²⁸N hʋlɑ-m weesuɣu mpɑɑŋ. N kɑ́ wɛɛ mɑ kiŋ nɑ ń hʋlǝsǝɣɩ mɑ lɑŋlɛ kɛ teu.

²⁹Apɑlɑɑ mɛ, ɩ́ yele mɑ́ tʋlǝsɩ-mɛɣɛ tɑ́ lɔŋcɛ Tɑfiiti tɔm tǝcɛɩcɛɩ sɩ, ɩ sǝpɑ nɑ pɑ́ pimi-ɩ, nɑ ɩ pǝlɑɑʋ wɛ tɑ́ hɛkʋ kɛ hɑlǝnɑ sɑŋɑ.

³⁰Tɑfiiti ɩnɩ ɩ kɑ kɛ́ Ɩsɔ kʋyɔɣɔtʋtʋ tɛlǝsʋlʋ kɛ́ nɑ ɩ́ nyǝmɑ́ teu sɩ, Ɩsɔ kɑ tɔmɑ nti nɑ tuunɑʋ sɩ ɩ kɑ́ lɑpɩ-ɩ tɔ pɩɩ lɑ. Sǝsɩ Tɑfiiti lʋlʋɣʋ tɑɑ tʋ nɔɣɔlʋ kɑ́ tɔɣɔnɑ kɑwulɑɣɑ ŋkɑ Tɑfiiti ɩnɩ ɩ kɑ tɔɣɑɑ tɔ.

³¹Hɑtoo lɔŋ Tɑfiiti nɑwɑ mpi pɩɩ tɛ nɑ pǝ́ lɑ tɔ. Pǝ tɔɔ kɛ́ ɩ yɔɣɔtɑ Mesii sǝpʋ nɑ ɩ́ fe tɔ pǝ tɔm sɩ: Pɑ tɑ lɔ-ɩ yem kɛ́ ɑtɛtǝlɛ tɑɑ. Ɩ tɑ tɩɩ sɔŋ pɑɑ pǝcɔ mɑɣɑmɑɣɑ.

³²Yesu wei ɩnɩ ɩ tɔm mɑ yɔɣɔtǝɣɩ ɩsǝntɔ tɔ, Ɩsɔ feesɑ-ɩ, nɑ tɑ́ tǝnɑ tǝ nɑnɑ tɑ́ ɩsǝpee tǝkelekele.

³³Ɩsɔ kʋsɑ ɩ nyʋɣʋ nɑ ɩ́ cɑɣɑsɩ-ɩ ɩ kɔŋkɔŋ tɑɑ. Ɩlɛnɑ ɩ́ kpɑɣɑ Feesuɣu Nɑŋŋtʋ, wei ɩ kɑ tɔmɑ sɩ ɩ kɑ́ hɑ tɔ, nɑ ɩ́ cɛlɛ-ɩ. Nɑ Feesuɣu Nɑŋŋtʋ ɩnǝɣɩ Yesu tisɑ tɑ́ tǝnɑ tɑ́ tɔɔ, nɑ ɩ́ tɔŋnɑ nɑʋ nɑ nɩɩʋ kɛ ɩsǝntɔ.

³⁴Pǝ tɑɣɑ ɩsɩɩ Tɑfiiti mɑɣɑmɑɣɑ nɑ́ kpɑ ɩsɔ se. Amɑ pɑɑ nɑ mpʋ ɩ yɔɣɔtɑɑ sɩ: Tɑcɑɑ Ɩsɔ heelɑ mɑ Sɔsɔ sɩ: Cɑɣɑ mɑ kɔŋkɔŋ tɑɑ.

³⁵Hɑlǝnɑ mɑ́ kɔnɑ nyɑ́ kolontunɑɑ, nɑ ń loosi nyɑ́ nɔɔhɛɛ kɛ pɑ tɔɔ.

³⁶Pǝ wɛɛ sɩ Ɩsɛɣɛlɩ yǝlɑɑ tǝnɑ kɑ́ nyɩ teu tǝkpɑtɑɑ sɩ, Yesu wei ɩ́ kɑmɑ sǝm tesikɑ tɔɔ tɔ, ɩnǝɣɩ Ɩsɔ lɑpɑ Sɔsɔ nɑ Mesii.

³⁷Ɩsɛɣɛlɩ nyǝ́mɑ nɩɩ tɔm tǝnɛ ɩlɛnɑ pɑ lɑŋɑ pǝsɩ sɔsɔm, nɑ pɑ́ pɔɔsɩ Piyɛɛ nɑ tillɑɑ lɛlɑɑ sɩ: Tɑ tɑɑpɑlɑɑ mɛ, ɩsǝnɑɣɑ pǝ wɛɛ sɩ tǝ́ lɑ ɩlɛ?

³⁸Tǝnɑɣɑ Piyɛɛ cɔ-wɛ sɩ: Ɩ́ lɔ mǝ ɩsɑɣɑtʋ nɑ ɩ́ lɑɣɑsɩ hʋwɛɛ, nɑ pɑ́ yɑɑ Yesu Kilisiti hǝtɛ nɑ pɑ́ sɔnɑ pɑɑ mǝ tɑɑ wei kɛ́ Ɩsɔ lʋm, nɑ pǝ́ hɩɩsɩ mǝ ɩsɑɣɑtʋ. Ɩlɛnɑ ɩ́ hiki Ɩsɔ kʋcɔɔʋ sɔsɔɔʋ ŋku kʋ kɛ́ Feesuɣu Nɑŋŋtʋ tɔ.

³⁹Pǝ tɑɣɑ pʋlʋ tɔɔ, mǝ nɑ mǝ piyɑ nɑ hɑtǝlɑɣɑ nyǝ́mɑ kɛ Ɩsɔ tɔmɑ sɩ ɩ kɑ́ hɑ, ɩ́ tɩɩ lɑɑlɑɑ nɑ ɩ́ yɑɑ wei te, ɩ́lɛ́ ɩ hikɑɑ kɛ́.

⁴⁰Ḿpʋ́ɣʋ́ Piyɛɛ tɑsɑ Ɩsɛɣɛlɩ nyǝ́mɑ kɛ tɔm pɑɣɑlɛ kɛ heeluɣu tɔtɔ, nti tɩɩ sǝnɑ-wɛ nɑ tǝ sɔɔsɩ-wɛɣɛ ɑpɑlʋtʋ tɔ. Sǝsɩ, ɩ́ lǝsɩ mǝ tǝɣɩ yǝlɑɑ letɑɑ pɑnɛ pɑ tɑɑ nɑ ɩ́ tʋlɩ-tɩ.

⁴¹Ḿpʋ́ɣʋ́ Ɩsɛɣɛlɩ nyǝ́mɑ tɑɑ yǝlɑɑ tuutuumɑ mʋ Piyɛɛ tɔm nɑ pɑ́ sɔ-wɛɣɛ Ɩsɔ lʋm. Kʋyɑŋku, mpɑ pɑ sʋʋ Ɩsɔ sɛɛʋ tɔ, pɑ nyɔɔŋ tɑlɑ ɩsɩɩ iyisi tooso (3000).

⁴²Pɑ ɩsǝlɛ kɑ sɛɛnɑ tillɑɑ kʋsɛɣɛsǝtʋ kɛ nɩɩʋ, nɑ pɑ tǝŋɑɣɑ tǝmɑ nɑ lɑŋhʋlʋmlɛ kɛ sɔsɔm. Pɑ tɔkɑɣɑ tǝntǝmlɛ kɛ tɑm, nɑ pɑ́ puki Ɩsɔ sǝlǝmʋɣʋ pɩɩ sɔɔ nɔɣɔlʋ.