Yokanatkalune Kamrure 2:5-42

⁵Gerosale rawna Goteyone jejine kgipashiregolune, pachijnemnunanuka giyakatyachine tengogne rapukote gwachijnejetachri.

⁶Rakagnenekle gwinitka rapatjetna gixolune. Gi rumatanshinikanutanna gi rixanu satkakneru tokanu yijnako yanumsaletkana.

⁷Rumyekna. Ruglajitna. Wane chinna, “Getanna. ¿Gi ge Kalile gajenni wa nyi pejnuruneko yanumsatachine?

⁸¿Gi wixpoko wixa satkakwu wixako tokanuya wa wumushpakanru wtokanu wyijnako yanumletna?

⁹Wixni Partone, ga wa Metone, ga wa Gelamitane, ga wa Mesopotami gajene, Gote gajene, ga wa Kapatosi gajene, Ponto gajene, ga wa Gasya gajene.

¹⁰Prigi gajene, ga wa Pampiri gajene, Gigipto gajene, ga wa pasretkaka Liwya, Surene tukasreta gajene, ga wa Roma giyakatyachine,

¹¹Goteyone ga wa Goteyo gitaknawachine koxa. Krete gwachine, Garawa gwachine, wyijnako yanumsaletna wixako wtokanuya tsru ruyaklekaka Goyakalupirana.”

¹²Rumyekna pejnuruneko. Gi rumatanshinikanutna. Wane chinkakna, “¿Klunerutkange?”

¹³Pimrine kgixpiranataklerune. Wane chinna, “Jinanunatkana winga.”

¹⁴Giyagni Petro tunwata wa pamole satupjeneyma. Gichko tokanru runkaklewyegitna. Wane chinna, “Jejine, Goteyone, ga wa pejnuruneko Gerosale gwachingi, gimatanru tye. Gyijnakotokanutanno.

¹⁵Gi rixanu gi wa gimetachinni wa nyi wa nchinanshinikanutyawaka. Gi rixanu tumananustsiwani.

¹⁶Seyni tye kgonutkala wa tokanchi geneklewatachri Gowele chinyawaka:

¹⁷Wane china Goyakalu: Wane rixanu ralipregognepatka. Giwekikaluru Gitanu napookakpotutanru pejnuruneko gaji. Tokanchi geneklewatachinepni pwugenene jejine ga wa suxone. Gmaklutene getanru kaygawlukaka. Gixa tsrutene gipnawatanu gipnawlukaka.

¹⁸Galikakni walgognepatka nwayegrene, nwayegrerone yegi nyokanatanru Giwekikaluru Gitanu. Tokanchi geneklewatachinepni.

¹⁹Koglajrukaka nenekanu tengogneya, ga wa tengognempuko getkalurkaka tyechijneya, jralu, ga wa xirnachri, ga wa chichipgya gimomopgyatachri.

²⁰Kashrijewnanu tkachi. Ruchpokanu. Ga wa ksuru jraplu, ma mapookanuwachi Gitsrukaachi tsru koglajrugogne.

²¹Wane rixanu girukokta Gitsrukaachi giwaka tomsatanu, wale gognetkaako.

²²“Jejine, Gisrayiline gyijnakotanru tye tokanchi: Geso, Nasare gajeru, Walenwa jeji Goyakalu kiglepiranyegiru rixkakanru gixyegiya ruyaklekakaya, ga wa koglajrekakaya, ga wa getkalurkakaya. Tyenwa Goyakalu kamrutanru Waleya gixatskalaya, gimatyawaka koxa gixa.

²³Walenwa samyookaluru Goyakalu giglepokotyawaka wa rushinikanru, ga wa muchikawako rumatgognenatanru. Wale gixa gixripkakanru ga wa giylatanru wa kmukochirerunemyoya. Koroshishkita gitakjixanru.

²⁴Wale Goyakalu yotunkaka. Gipukchichino kaspukyalu. Gi rixanu gi rumkata chipetkotatka gipukchiya.

²⁵“Gi rixanu Tawi wane chinpiranyegitlu: Netlu Gitsrukaachi gita ginaple rawgognenatinri. Gi rixanu npotuklesretate rawa, Gi wa nkomyemyetko.

²⁶Wale chinanu numuwgajita, ga wa numuwleymananuka nyanumata. Ga wa xani nomane koxa gapnanutanu kagwakikolupa chinanu.

²⁷Gi rixanu gi puknokamtanno gipnachine gwiyawaka. Gi koxa puchichanru wa Pixanu mmukochiretu rujpaginripa.

²⁸Pumatkakno giweklugapkaka. Pomjikpotutanno Pixa yegi nixinri.

²⁹“Jejine, nomolene, gichichanno nunkakyapgi pgujetanuwaka tsrupotni gitsrukaachini Tawipirana. Wa gipnachrinatka. Kapnatkana. Ga wa giyomle wixyeglu xanigognenanu.

³⁰Giyagni tokanchi geneklewatachri rixinri, Tawi gimatlu wa Wale kawchinanu Goyakalu wane chinru wa Tawiklopishaneya gixmanetyawaka Goyakalu gipgujewnakakanru Kristo pogirewatinripa Tawi pogirewatyawakaya.

³¹Ma mapookanuwa retinitkalu, runkakletlu Kristo yotunotinripa. Gi wa ruknooko gipnachine gwiyawaka. Gi wa gigituko jpaggianu

³²Wa tye Geso yotunkaka Goyakalu. Walepirana pejnurunekwu gipgujtatachinwu.

³³Giyagni pogirchi rutaaka Goyakalu potuklesretate. Girchi yegi rawyalu gipiratkaluru Giwekikaluru Kpashiripirana. Rawinitkalu rupkakatkalu wa tye gixa getanru ga wa gyijnakotanru.

³⁴Gi rixanu Tawi gi wa tengogne ya, seyni wale wane china: Gitsrukaachi wane chinru wa Nutsrukate, Npotuklesretate ptuplatanu,

³⁵Nutakinpotukna pkamnixjene putspanjixgapre rixinripna.

³⁶“Gimatankoxlu pejnuruneko Gisrayiliklopishangi wa tyeko Geso wa koroshishkita gitakanru, Goyakalu galikakni gitakatkalu Gitsrukaachi ga wa Kristo rixinripa.”

³⁷Giyagni yijnakotinrina tyepirana, kachingajinatkana. Wane chinkana Petro ga wa pimrine yokanatanune, “Jejine, wumolene, ¿gi wixanutka xani?”

³⁸Ga wa Petro wane chinna, “Genshinikanutanu. Gkatikolupa wa gixa satkakgi Geso Kristo giwakaya, gkaspukmukochiretikolupa. Gyoptotanru Giwekikaluru Kpashiri geneekaluru.

³⁹Gi rixanu gixanupni wa gipiratkaluru, ga wa gwugenenenupkoxapa, ga wa gyoptukaklopishatyawakpotunanuka, gi pejnukta wa Gitsrukaachi Woyakalute tomganunepa.”

⁴⁰Gixo pimri tokanchi rupgujtalewata. Ruykolewata. Wane china, “Gognetkakikolupa gixa tyegogne gimuweekakanatachine mpotukanyegiya.”

⁴¹Giyagni wa yoptotokanutjene katka. Yogniikalunni walegogne mapa waragka getko yine.

⁴²Yokanatkalune ginkaklewle romkagitna. Romkagi gimatkakletna. Romkagi jiknajroletlona jimapro. Romkagi gagjigogneretna.