Madito 2:5-42

⁵Na ako Yelusalemu wali kuko Wayahudi, wanhu walingumkunda Nguluwi, walawile chila nhanzi ya isi yeng'ha na kilanga.

⁶Lowahuliche lizi alyo, chilundo chikulu cha wanhu nachikungajiza. Weng'ha watinuka lukami kwa vila chila yumwe wa hewo nakawahulika awo wanhu wa Nguluwi wolonga kwa ulonzi wohawavumbuche nawo.

⁷Wabubuwala na kulunduwala walonga, “Lelo awa weng'ha tulinguwahulika wolonga ahi, hawawele wenyeng'haye wa Galilaya?

⁸Iwa ndaze lelo, kuta chila munhu kanguwahulika wolonga kwa ulonzi wohawavumbuche nawo?

⁹Wayetu wamwenga Wapalisi na Wamedi na Waelami na wamwenga ndo wenyeng'haye wa Mesopotamiya na Yudeya na Kapadokia na Ponto na mkowa wa Asiya

¹⁰na Fulugiya na Pamfiliya na Misili na honhu ha Libiya behi na Kulene, wayetu wamwenga ndo wajenzi kulawa Loma,

¹¹na Wayahudi na wanhu wahinduchile na kwinjila kuli nzila ya kumfugamila Nguluwi ya Chiyahudi, wamwenga walawa Kilete na Alabiya. Hetwe tweng'ha twanguwahulika wolonga kwa ulonzi wotuvumbuche nawo mbuli ng'hulu za Nguluwi.”

¹²Weng'ha nawabubuwala kuno wochiuza, “Ayi mina yangutulangusa choni?”

¹³Ila wamwe wawabeza wolonga, “Wanhu awa wagala divai inyale ya lehano!”

¹⁴Ila Petili nakema hamwe na wala kumi na yumwe kaluka kuwadamlila wanhu kwa lizi likulu, “Wang'holozangu Wayahudi na hemwe mweng'ha mlingikala hano Yelusalemu, mhulichize goya ulonzi wondilonga.

¹⁵Wanhu awa hawagalile kota vyomlinguvizela, sambi ya saa tatu hela mitondo?

¹⁶Kukomya ndo kota mbuli ayi ndo ila yoyalonjile Yoeli nayawele mloli wa Nguluwi,

¹⁷“ ‘Mli mazuwa gala ga kuduma, nakalonga Nguluwi, ndowajidila wanhu weng'ha Muhe wa heni. Wana wa hemwe wa chilume na wachidala wolavya uloli. Wasongolo wa hemwe wokona ulotezi, na wasekulu wa hemwe wolota.

¹⁸Ena, na vitumagwa wa heni wachilume na wachidala, ndowajidila Muhe wa heni mazuwa gala, na hewo wolavya uloli.

¹⁹Ndodita vinduzanduza mchanya kilanga, na ulajilo hasi muisi, kowa na danda na chiluli na miyosi jizidahe,

²⁰isanya lyoditilwa jiza, na isaye lyowa lidung'hu kota danda, hala hainalawila zuwa lila likulu na iwele na ukulu wa Mkulu.

²¹Aho yoneche yomchema Mkulu kwa utanzi, koloholigwa.’

²²“Wanhu wa Isilaeli, mhulichize ulonzi awu! Yesu wa Nasaleti nayali munhu yula Nguluwi kamlajila kwa ludali lwa ulajilo na vinduzanduza na kububuwaza na vila Nguluwi vyoyaditile hali hemwe kukolela heye, kota vyomvizelele.

²³Kota navyoyaganile heye kulawa mwaluko, Nguluwi nakalamula kuta Yesu yawichigwe mmoko mwa hemwe, na hemwe mumkopola kwa kuwalechela wanhu wehile wamuwambe mumsalaba.

²⁴Ila Nguluwi nakamzilipula, kamlohola kuli usungu wa kubagama mina na haiganigwe ng'hatu kubagama kumuwohe.

²⁵Mina Daudi nakalonga mbuli za Mkulu kota ahi, “ ‘Nandimonaga Mkulu kumwando kwa heni mazuwa gose, kahamwe nzingo ya heni ya kudilo, nani hambe nhigasiche.

²⁶Ahyo, nhumbula ya heni yangusangalala, na lumyango lwangu nalutowa luchenze lwa kusangalala. Na lukuli lwa heni lochikala muli kitumbila,

²⁷kwa vila hegwe Nguluwi, huileka nhumbula ya heni kuli isi ya wabagame, ne humkundiza yelile wa hegwe yole mchilaga.

²⁸Kundajila nzila za ukomu, kumemeza usangalalo kwa kuwa baho hegwe!’

²⁹“Wang'holozangu, ndangugana kuwalonjela ndikangaze mbuli zimfichile Daudi, sekulu wa hetwe yatanganiche. Heye nakabagama na katiligwa, kahi chilaga cha heye cha bahano hakaye hetu mbaka lehano.

³⁰Ila kwa vila Daudi nayali mloli wa Nguluwi, nakavizela kuta Nguluwi kamlahila kuta komhaliza yumwe wa lulelo lwa heye yawe mndewa wa honhu hake.

³¹Daudi nakona kung'hali mbuli zoyodita Nguluwi na ahyo nakalonga gala ga uzilipuko wa Kilistu mlohozi hala hoyalonjile, “ ‘Halechigwe kuli isi ya wabagame, lukuli lwa heye halolile mli chilaga.’

³²“Lelo Nguluwi nakamzilipula ayu Yesu na hetwe tweng'ha twa walolezi wa mbuli ayi.

³³Heye loyakwinizwe na kuwichigwa na Nguluwi nzingo ya heye ya kudilo, nakabochela kwa heye mhaza yula Muhe Yelile nayalagane na hetwe, nakatujidila ayo Muhe. Acho ndo mlinguchona sambi na kuhulika.

³⁴Mina heye Daudi, hakwinile mbaka kilanga, ila heye nakalonga. “ ‘Mkulu nakamlonjela Mkulu wa heni, kalise nzingo ya heni ya kudilo,

³⁵mbaka ndiwadite wang'honyo wa hegwe wawe chigoda cha kuwichila magulu ga hegwe.’

³⁶“Wanhu weng'ha wa Isilaeli wangulapigwa kuvizela kuta ayo Yesu yomumgazile, ndo yuye yula Nguluwi yamditile yawe Mkulu na Kilistu Mlohozi!”

³⁷Lelo wanhu lowahuliche ahyo, wahomwa nhumbula, nawamuuza Petili na watumigwa wayage, “Wang'holozetu tudite ndaze?”

³⁸Petili nakedichila, “Mumgalamchile Nguluwi na chila yumwe wa hemwe yabatizigwe kwa itagwa lya Yesu Kilistu, leka musilwe gehile ga hemwe na kubochela ndolendole ndo iwele Muhe Yelile.

³⁹Mina, ilagano lila lyomuwichilwe hemwe, na lyomuwichilwe na wana wa hemwe, na kwa wanhu weng'ha walingikala kutali na kwa chila munhu yula mkulu Nguluwi wa hetwe komchema kwa heye.”

⁴⁰Kwa ulonzi unji winji, Petili nakalajiliza na kuwahimiliza wanhu yolonga, “Milohole na lulelo alu lwihile.”

⁴¹Wenji nawaukunda ulonzi wa heye, wabatizigwa. Wanhu wawele elufu zidatu wonjezeka kuli chila chilundo zuwa alyo.

⁴²Awa weng'ha walutilila kilangusa kwa watumigwa. Hamba nawalutilila kikala hamwe chilukolo na kumogola ibumunda na kumlanda Nguluwi.