APOSELENA YULU 2:5-42

⁵Gii dokopa Juu wambu Anatu suu pyao karenge yuu wakale wakale range dupwa Jerusaleme dokona kata londe epapala kareyami.

⁶Kareyami dupwame aposele dupwa pii wakale wakale leyami doko sepala epo buu minyiyami. Dokopa pii wakale wakale lao kimbu siyamisa wambu dupwa pii range lenge dokome dopa lalyamo lao kapa siyami. Sepala apa pipala pilyamo lao saka nayami.

⁷Dokopa mona nembo ayaka lao karo dopa leyami. Pii dopa lao karaminyi dupwa nakama peparae yuu Galili range daase?

⁸Apa pipala namwa range pii lenge dokona palyuo wakale laminyi silyamano kandese? leyami.

⁹Yuu Patia range akalipi Mitia akalipi Ilama akalipi karamano. Yuu Mesopotemiape yuu Jutia yuu Kapatosia yuu Pondasa yuu Esia

¹⁰yuu Pitisia yuu Pambilia yuu Isipi yuu Lipia pakirena Sairini lao singipi yuu dupwana palenge wambu dupwa karamano leyami. Yuu Orome dokona palenge Juu wambu angi dupwape dee Juu rara daa Juu wambunya misi pii soo nyingi dupwa opetae Jerusaleme dokona epapala upunili ingyuo karamano.

¹¹Kiriti akalipi Arapia akalipi dupwa karamano. Namwa yuu muu wakale wakale range dupwa nakama Anatunya yulu andake dupwana lao pii namwana lenge dopale ingyuo wakale wakale lamisa silyamano leyami.

¹²Dopa lao karo dokopa nakama peparae mona nembo apa pipala pilyamo lao saka napala nakama lao yulu doko aki rengedeme pilyamo? leyami.

¹³Dopa leyaminyipape lapo dupwa giyalya giyana pyuo pii doko soo nembo kareyami. Waene ipwange enenge nao pyoko pyoko lapala kyawa sisingi bolombalo lapyasa letaminyi leyami.

¹⁴Dopa leyaminyipape Pitamoo aposele akali akalisa ipisu mendaki kareyami dupwamoo sipureyaminyipa Pita baa pii ketae palyuo wambu dupwa boo pyao lamaiya. Yangonemoo nakama Juu akali dupwape dee Jerusaleme palenge peparaepe namba pii larono dupwa kale yukupala selapa leya.

¹⁵Akali dapwa waene ipwange naminyi kyawa sisingi bolombalo lalamo lao suu pyalaminyi doko daa. Wamba yangama dokopa dopa pii nange kandale.

¹⁶Pii nalyamopape Anatumi poropeta akali Joele leyamuli pyuo epapu pyaka silya kande. Joele dopa leya.

¹⁷Anatu dopa letamo. Yuu gii lumwa piramo dokopa nambana Imambu wambu dupwa peparaena maralyinya lao mokwa soo mairu. Dokopa nakamana wanenge ikinyingipi dupwame nambana pii nolako larami. Nakamana wanyane akali dupwa pii repa repa pyuo kandarami. Nakamana alemo dupwa kombeya pirami.

¹⁸Kinyi, dopa piramo yuu gii dusipana nambana kendemande enda akalipi keta nambana Imambu maralyinya lao mokwa soo mairu. Dokopa nakama nambana pii nolakao lao kararami.

¹⁹Dokopa yake dulu yulu andake wambu dupwame kando yamarangwarami dopale pyuo, isa yuu dokona wambu kandena lao yulu andake lapo lasaka pyuo piru. Ranjamape isarepe sukwa puupae lara dokope dusipa kandena lao lasaka piru.

²⁰Neta doko iminjo rali pira. Kana doko ranjama ingyara. Wambo dopa piramopa enakana Kamongona yuu gii doko pyaka sera.

²¹Dokopa mendeme Kamongona kingi lapala baa lete wai pyao nyakapili lao lara ramo doko, baa nyiso pyuo nyera. Pii dopa leya Joeleme.

²²Nakama Isaraele akali dupwa pii dake selapape. Anatumi Yesu Nasarete range doko angi rombo palyiyalyamo lao selapape lao yulu andake lapo wambu dupwame kando yamarangwarami dopale kandalapape lao renge kuiyuo lasaka piyamopa Yesu keta nakama peteyami dokona sukusa piyamopa range silyaminyi.

²³Anatumi wambo suu piyamuli pyuo nakama Yesu pyao kumakalapape lao jiya. Nakamame baa nyepala lowa see nange wambu dupwa maiyaminyipa nakamame isa mamandona pyao palyiyami.

²⁴Dopa piyaminyipape Yesu baa mee kumuo pali nara ingiyamopa Anatumi kumunginya randa dupwa ramanyi yaki nyepala baa minyalyuo nyiya.

²⁵Dokona lao Dapitimi baa suu pyao dopa leya. Kamongo doko nambana lenge kambu dokona karalu kareyamopa kandeyo. Namba monarena yamarangwa napipi lao Anatu baa nambana kingi rolaerename karakalyamo.

²⁶Dokona namba mona anda pyakalyuo pyao kambu dokome rae maingi pii dupwa lao kareyo. Namba isa akali kumuo penge doŋo embame nambana imambu doko kyawa minyuo kararenepa

²⁷wambu kumasi palenge dokona nambana imambu doko paka nara dokona mona kare kare karo, embena akali poo pyasi doko rumbya napipi lare ingilyamo.

²⁸Embame lete penge kata doko lasaka pii kande embame namba repeta karakarenepa raeme kumaro leya.

²⁹Yangonemoo namwana rakange kyawa Dapiti baa kumuyamopa malu piyami doko namwa soo gisilyamano. Banya malu anda doko dae silyamo dokona pii mende pali nalyamo.

³⁰Baa poropeta akali pii nolako lenge dokome Anatumi baa kando, Embena ree palu dokona mende embena kiŋi yulu pyuo karena lao rombo palyaro lao langyuo kaelyo, lamaiyamo pii doko soo gisapala

³¹Anatumi Koraisa nyisapala dopa pira lao wambo sepala baa pii doloma rangesa lao laa naya. Koraisa baa lopo neta para doko sepala baasa kando pii mende leya. Wambu kumasi palenge dokona kumasi palena lapala kaeya naya. Banya yanenge kakapange mee rumbya naya leya.

³²Yesu doko Anatumi lopo nyiya doko namwa peparaeme kandapala lao karamano.

³³Baa lopo epapala Anatunya kingi rolaerename nyiyamo dokopa Rakangeme Imambu Poo Pyasi nyera lao kaeyamo doko nyiya. Nyepala namwa keta mokwa soo jipyamopa poo lao ipyamosa pilyamo doko kandelyaminyi.

³⁴Dapiti yake dokona range pulyuo paa naya. Baa rangesa lao dopa leya. Kamongo dokome nambana Kamongo lamaiyuo, Nambana kingi rolaerename pisipi.

³⁵Pisirinyipa emba kando nekyambuli ingyuo karaminyi dupwa embena kimbu dokome kalyare lao nyuo isa palyakaro, leya.

³⁶Nakamame Yesu isa mamandona pyao palyiyami dokoko Anatumi baa Kamongo Koraisa ingyuo karena lao rombo palyiya doko nakama Isaraele wambu dupwa peparae soo gisalapape.

³⁷Pitame dopa pyuo leyamo dokopa banya pii doko nakamana mona anda piya. Nakama elyapala kondome kumuo kareyami. Dokopa nakamame Pitamoo aposele menge dupwa opetae piso soo, Yangonemoo namwa apa pirama? leyami.

³⁸Dokopa Pitame nakama lamaiyuo dopa leya. Nakamame mona enenge palyapala Yesu Koraisana kingi dokona lao nakamana koo dupwa Anatumi nyuo kame sakapyali lao suu pyapala bapitisimo nyelapape. Dokopa nakama Imambu Poo Pyasi jeramo nyerami leya.

³⁹Dokona lao Anatumi Imambu Poo Pyasi doko jero lao kaeyapya pii doko nakamasa kando laowako nakamana wane wanakepe wambu menge nanesa karaminyi dupwa opetaesa lao wambu baame sukusa ipupwape laramo dupwa peparaena palyuo leyaŋa, leya Pitame.

⁴⁰Pitame pii londe lao pii renge wakale wakale dupwana kata wapuo lamaiyuo, Nakama dae wambu yulu koo pyuo karaminyi dupwa yaki nyepala lete wai pyao ipupwape leya.

⁴¹Leyamopa yuu gii dokopa wambu akalisa rema daako ama malu wakasa (3,000) banya pii soo nyepala bapitisimo nyuo sukusa epeyami.

⁴²Dokopa nakamame aposele dupwana mana pii sokondali pyuo nenge yalya kando nao ateŋa lao pyuo peteyami.