1Kak'e' kak'ajsbil tetz Kataj tetz cu'n kalma'. Kak'e' kak'ajsbil tetz yi bi' i' tetz cu'n kajtza'kl, na wi'nin xanil yi tetz bi'.
2Kak'e' kak'ajsbil tetz Kataj tetz cu'n kalma'. Quil tz'el te kac'u'l yi e'chk takle'n balaj yi bnixnak ta'n.
3Na i' na cuyun cyakil yi kapaj, nin i' na tz'ac'an cyakil e'chk jilwutz ya'bil yi na oc lac'p ske'j.
4Qui na tak' i' ama'l tan kaquime'n chan, na na pek' i' ske'j, nin na tak' i' yi banl talma' squibaj.
5Nin ja tak' i' cyakil e'chk takle'n balaj sketz. Nin na tak' i' junt tir kawalor, chi na ban jun q'uilq'uitx yi na jal ac'aj xi'il.
6Yi Kataj chin tz'aknak cu'n i' yi na cawun tan chicolche'n yi e' yi na chitij q'uixc'uj.
7Talnak i' yi tetz tajbil tetz Moisés. Nin ẍchajnak i' e'chk milawr scyetz e' kamam kate'.
8Yi Kataj, chumbalaj nin i', na na el k'ajab ske'j. At pasens i', na wi'nin na pek' ske'j.
9Nk'e'tz cha'tz cyen tunin i' tan makle'n kawutz. Nin qui na tawnaj cu'n i' yi ẍchi'chbe'n c'u'l ske'j.
10Nin qui na tak' i' yi kacaws yi at klo' ak'bil tetz tan kapaj tu katx'ok'be'n yi kajuchnak swutz i'.
11Wi'nin banl talma' i' scye'j yi e' yi na cyak' k'ej i'. Icy'nak cu'n swutz yi tcya'j.
12Ma yi kil, kajpe'n nin mpone't ta'n. Cho'n mban kaxo'l tu yi kil chi tane'n yi xo'l yi tele'n tzi'n tu yi toque'n tzi'n.
13Xomij Kataj ske'j yi o' yi na kak' k'ej i', nin wi'nin na pek' i' ske'j chi na pek' jun yaj scye'j yi e' tal nitxajil.
14Na na el xtxum i' sketz yi ẍe'n kutane'n. Na el xtxum tetz yi o' tu xk'ol.
15Ej nin yi ank'i'n yi ak'ij sketz ni'cu'n tu jun buch yi at xo'l xtze' yi jalcu'n na lo'on tan k'ej.
16Jalcu'n na lo'on tan cyek'ek'. Nin na el cu'n swutz nin qui't quil wutz junt tir.
17Poro yi banl talma' Kataj quinin bajsbe'n tetz scye'j yi e' yi na cyak' k'ej i'. Na yi balajil i' quil sotz sbne' opon tunintz.
18Stz'a'tok yi banl talma' i' scye'j yi e' yi na chiban tane'n yi trat yi bnixnak ta'n, yi e' yi na cho'c c'ulutxum jak' ca'wl i'.
19Yi Kataj cho'n c'olchij jalen tcya'j tan cawu'n. Nin i' na cawun tibaj cyakil yi at bene'n tzi'n.
20Kak'e' bin kak'ajsbil tetz. Nin axwok ángel yi ak'ij ik'ej, ak'wok k'ej i'. Yi axwok itetz yi na xconwok tetz ẍchakum i', yi axwok itetz yi list atixe'twok tan tbite'n yi tetz ca'wl, ak'wok k'ej i'.
21Ncha'tz cyakil yi e'u' ángel yi e'u' sanlar tetz Ryos, cyak'e'u' chik'ajsbilu' tetz. Chibne'u' tane'n yi chimunlu' yi ate'u' sju'. Chixomoku' te yi tetz tajbil.
22Ncha'tz cyakil yi e'chk takle'n yi bnixnak tan Ryos yi at bene'n tzi'n, tcya'j tu wuxtx'otx', cyakil yi e'chk takle'n yi at jak' ca'wl i', tajwe'n tan cyak'ol chik'ajsbil tetz. Kak'e' bin kak'ajsbil tetz Kataj tetz cu'n kalma'.
