1E'u' bajxom, mbi xac na cyocsaj quibu' nim tu yi e'chk takle'n cachi' yi na chibanu' scye'j wunak. Na yi ketz kaRyosil at mas tetz ẍchamil swutz alchok ajcawil, nin quinin bajsbe'n tetz yi banl talma' i' ske'j.
2Na yi e' cyeru' ntin na chitzanu' tan xtxumle'n e'chk takle'n cachi'. Ncha'tz chin cyajbil ninu' ẍchaq'ue'n e'chk yol. Nin chin xo'wbil nin yi e'chk yol yi na el tzaj le chitzi'u'. Cho'n cunin chijilonu' chi tane'n jun cchilu' yi chin a' nin wi'.
3Mas tcu'n na chipek'u' tan banle'n yi e'chk takle'n cachi', swutz yi e'chk takle'n balaj. Nin mas balaj tcu'n yi la'jil ẍchiwutzu' swutz yi bintzi.
4Yi e'chk yol yi na chiyolu' ntin na xcye' tan chixite'n yi e' wunak, na chin la'j nin e'u'.
5Poro Ryos tz'ak'on chicawsu' tetz ben k'ej ben sak. Na chijeponu' buk'ij tane'n nin ẍche'lk cunu' swutz.
6Cyakil yi e' yi cho'n k'uklij chic'u'l te Ryos, squile' cyakil yi xtxolbila'tz, nin ẍchixobok ta'n. Poro ẍchitze'enk scye'j yi e' mal naka'tz, nin scyale':
7“Ilwoke' nin, yi mbi mbajij scye'j yi e' mal naka'tz. Yi cyetz, qui nk'uke' chic'u'l te Ryos. Ma na cho'n nk'uke' chic'u'l te yi cyetz chime'bi'l. Nin qui na quil cyen yi juchle'n il.”
8Ma in wetz, cho'n cu'n wutane'n xe ca'l Ryos chi tane'n jun wi' oliw yi chumbalaj nin, na ilenin cho'n k'uklij wetz inc'u'l te Ryos.
9Wajcaw, ilenin swak'e' ink'ajsbil teru'. Nin chintyoẍink teru' tan yi e'chk takle'n yi ja bnix tanu' swe'j. Nin ncha'tz ilenin sk'ukek inc'u'l te'ju', na chumbalaj nin ilu', nin quinin bajsbe'n tetz yi banl talma'u'.
