1Ilu' kaRyosil, ¿mbi tzuntz nko' cyaj cyen tilolu'? ¿Mbi xac na tak'u' bis sketz? Na ja saj colpuj wi'u' ske'j. Ta' ko' ẍch'eyaju', tak'u' junt tir kawalor.
2Na tan yi teru' poreru', ja chucan yi wuxtx'otx' nin ja aj pax. Poro mas balaj yil sban cunu' junt tir, chi yi tane'n nin, na wi'nin lo'one'n mas.
3Ncha'tz ja tak'u' ama'l tan tule'n e'chk takle'n, yi chin xo'wbil nin swutz yi tanumu'. Ja tak'u' jun kacaws yi chin xo'wbil nin.
4Poro yi o' ketz yi cho'n k'uklij kac'u'l te'ju', ja je' jun techl tanu' tan kopone'n kale atit yi jun techla'tz, bantz kaclaxe'n tk'ab yi e'chk oyintzi'.
5Ko' ẍch'eyaju' bin Ta'. Tbite'u' yi na cu' kawutz teru'. Sajku' tan kuch'eye'n, nin ko' cole'u', na na pek'u' ske'j.
6Na je bin yolu'e'j: “Tetz cu'n walma' yil no'c tan jatxle'n cu'n yi ama'l Siquem. Ncha'tz wulej yi ẍk'ajlaj Sucot.
7Ncha'tz, wetz cu'n cyakil yi ama'l cwent Galaad tu Manasés, na wetz cu'n cyakil yi e'chk ama'la'tz. Ncha'tz yi ama'l cwent Efraín, ni'cu'n chi ya'tzk jun casco tan colche'n inwi'. Ma yi ama'l cwent yi e' aj Judá, ni'cu'n chi ya'tzk jun tx'amij yi at tink'ab.
8Ma yi chi'ama'l yi e' aj Moab, ya'stzun yi ama'l kale na chintx'ajone't, kale na intx'ajwit ink'ab. Ma yi chi'ama'l yi e' aj Edom, colbil tu' inxajab tera'tz. Ej nin chinẍch'ink tan yi tzatzin yi atin cu'nt, yil chinxcye' scye'j yi e' filistey,” chiju' banak.
9Ma jalu' Wajcaw, ¿na' lnoponsan le yi tnum yi at q'uixbel tan kaxcyewe'n te'j? ¿Na' scyetz jun yi sbajxok tzinwutz tan wopone'n tan oyintzi' le ama'l Edom?
10¿Nk'e'tz pe' ilu' Ta'? Poro ja ko' cyaj tilolu'. Qui't na xomu' ske'j yi na ke'l tan oyintzi'.
11Poro Ta', qui pe' tz'el k'ajabu' ske'j. Ko' ẍch'eyaju' ẍchik'ab yi e' kacontr. Na yi o' ketz qui'c nin ketz kaxac.
12Poro kol xomu' ske'j, jun cu'n skaxcyek te yi kacontr. Na ilu' tz'ocoponu' tan chixite'n cu'n, chicyakil.
