1Ayina Deivid igirumi Tagu nuwanuwagu tupanama Yawe God anakabepepi! Kana waghawagha kabikabikuwayina anakabepepi!
2Tagu nuwanuwagu tupanama Yawe God anakabepepi, bi bera miisedi tupadi ibera na gemeyani aninuwawapidina.
3Touna yagu tamumu tupadi yanoghotatavedi, bi gubaga tupadima yiyawiigu.
4Touna karawagama yiyawiigu, bi yinuwanuwaghanegu da nuwamonika yaveregu bi miisena yaberabera tagu biidi.
5Patana amakamakena, touna sawara miisedi yiwiitegu, da tubuyigu na ware kakaka wouna maragasina naboni.
6Yawe God yana wiiwiita na yayowogha wawaya biiyadi basuna yana keda na nonowa rotomanidi; bi raghanina wawaya berona sabera na Yawe God toudi wawayidi wiitupawamiwamira yaveredi.
7Touna yana noghota iyanoghonoghosi da iyabera na Mosis biidi ividebeni, bi Isrel damdi biiyadi parapa yana maragata ghamana iviyevevedi.
8Yawe God na wiiwiinuwaghaneyanina da wiinuwayuyunina, touna genuwanuwana iyapughupughu yaininagha, bi yana nuwayuyuna kiiravidae na gegha damonana.
9Touna genonowa yada berona inatupakoghatedina, bi kate yana nuwapughu inanuwatawana waghawaghasina.
10Bagune touna rubarubana da aro ghamana iyavereda, bi yada bera beroberodi kiiravine yanuwatotoveda na gegha iyiimiisanena mayedana.
11Yana nuwayuyuna touda kiiravidae, iiyawogha sakabikabikarawayeni na gegha damonana; nuwayuyunina na iragata kirakii, gegha abama yana ragata naboni.
12Ware raghani matanama metagha na yana rabaraba mayimayiyina raghani didinama naboni, yada bera berodi gwabidama yayounataveyana da yana rabaraba noko patana.
13Ware tamada natunatuna yanuwatotovedi na naboni, bi Yawe God iiyawogha sakumakumararayeni na yanuwatotovedi;
14touna yanoghosi da touda dobodoboma kawagha iberada, na iyakovi da touda na noganogada.
15Bi yada make yawana kubura debane na ware rei naboni. Ware garagara sarudi naboni, tiisaru bi tarabobo.
16Yanunu yatapidi, na toudi sasiwana getana iiyabo iyakitakita mayedina.
17Bi gegha da iiyawogha Yawe God sakumakumararayeni, na yana nuwayuyuna da bera rotomanidi beradi gwabidiye inamake nonowa, kimta da kimta kiiravidiye
18da nokodi iiyawogha yana wiiwaghasina maragasina sakabikabitawani bi yana gwara sakabikabisisiredina biiyadi.
19Yawe God ibera da abama na yana wiibada abamakamakena, bi nama sawara tupadi yibadedi.
20Yawe God kokabepepi, tami aneyaneya tupami badobadomi da maragasimi, iiyawogha yana sisiya kowaiyana da koberadina tami Yawe God kokabepepi.
21Yawe God kokabepepi abama kana iyo wawayimi iiyawogha kobagibagiyeni da yana noghota koberaberana.
22Sawara tupadi touna iberadina, sawara tupadi yana wiibadana kamone, na tami Yawe God kokabepepi. Tagu nuwanuwagu tupanama Yawe God anakabepepi.
