1Wajcaw, ilu' inRyosil, nternin na joyonu' swetz. Cha'stzun te chin jalchan cunin na no'c tan joyle'nu'. Na nternin na quim walma' tan saktzi' tane'n, na na chimbisun tan yi sotzaj c'u'lal yi atin cu'nt. Cho'n wutane'n chi tane'n jalaj tx'otx', yi chin skej nin, kale qui'cle't a'.
2Poro yi wetz wajbil i'tz yil nopon xe ca'lu', tan wilol yi poreru' nin yi k'eju'.
3Na yi banl talma'u' swibaj, i'tz mas balaj swutz yi ank'i'n tetz tzone'j wuxtx'otx'. Cha'stzun te swak'e' ink'ajsbil teru'.
4Swak'e' k'eju' te yi cobox k'ej yi atin tzone'j wuxtx'otx'. Ntin swutzu' jepon wuk'ol ink'ab tan tak'le'n k'eju'.
5Na ko tetz cu'n walma' yil tzinjoyu', chintzatzink. Chintzatzink, chi jun yaj yi na noj c'u'l, yi na wan te jun chumbalaj wa'a'n. Swak'e' tzun ink'ajsbil teru' tetz cu'n walma'.
6Wajcaw, te yi coylchin wi insoc na ul tx'akxuju' tinc'u'l. Na na no'c tan xtxumle'n cyakil yi banl talma'u'.
7Na ntin cu'n ilu' ch'eyl wetz. Nin nternin na chintzatzin, na atu' tan inq'uicy'le'n, na atin tzak' yi xicy'u' tane'n.
8Ej nin junawes wak'o'nt wib tk'abu', nin ch'inu'n chin tanu'.
9Ma yi e' incontr yi na cyaj yil chinquim, e' te'n ẍchiquimok, nin nchiben cye'tz xetze' ẍchixo'l alma'.
10Ẍchiquimok tan spar, nin yi chiwankil sbajk cyak'un txuc.
11Poro yi kareyil stzatzink tera'tz tk'ab Ryos. Ej nin cyakil wunak yi xomij chiwi' te'j, scyak'e' chik'ajsbil tetz i'. Poro yi e' yi chitzi' tu' na cyal yi xomij chiwi' te'j, smakxok chitzi' cyera'tz.
