1I lingag Dabid Too mdà di nawagu mlé fye di Amugu Dwata; kayègu ku too sikof kdayengu Dwata too mtiu.
2Too mdà di nawagu mlé fye di Amugu Dwata, na làgu glifet i kdee kafye gablén di deg;
3du kenen i mlifet i kdee salàgu, na kenen fgulê i kdee tdukgu.
4Kenen i msò deg mdà di fati na mlé deg kafye mdà di kakdon landè kgilin.
5Fananoan nawagu i dad fye blén deg di klogu mto, taman samfulê i galgu salngad di lamnok agu fa na salngad di gal i kablak.
6Amuito Dwata i falwà kdee to bankut; di kukuman banlén ale i dale kaglut.
7Fgadè Dwata i knayean nimò di ku Mosis, na gfiten di bel Israél i mgimoan.
8I Amuito Dwata too kamdo, too bong nawan dad to; laan mlal flabè, na too bong i kakdon na landè kgilin.
9Laan tì fadlug mngak i landè gutlagan, na laan fles flabè kel di landè sen.
10Laan fanlayam i to gablà di kbong salaan, i kbalasan dad salaito là salngad di kbong ksasè i nimoito,
11du i kakdon i dad to nun klikò di kenen, landè kgilin, na too là gagan mtas dun; salngad di kdatah i langit di tah tanà i kalbong nawan dale.
12Na laito gagan mtas i kawag i guflana Dwata i salaito mdà di gito, mawag fa di gusut i duh mdà di gusdafan.
13Too nun kakdon i dad to nun klikò di kenen, salngad kakdo i satu mà di kenen dad ngà.
14Du gadean i gumlungayito; laan glifet mgimò ito mdà alò di kfung.
15Gito dad to, là mlo i kneito di tah tanà ani salngad di bnas, na salngad di knè i dad fye baweh bulek di bnas,
16du kbal i nus na mtatek i dad bulekan, na là mlo mlanas na landè lêman mite dun.
17Kabay i kakdo Amuito Dwata di dad to nun klikò di kenen, knean i knean, landè kgilin mdà di landè gutambuan kel di landè gusenan; i kafyen dale gafat di kdee tugad i bella,
18i dad to mafè i kasfakangla Dwata, na too fkah di nawala i kimenla katedan.
19Ditù di langit gumagot i Amuito Dwata, na kenen i harì mebe i kdee.
20Mlé gamu fye di Amuito Dwata, gamu dad kasaliganan, gamu dad mtulus mimò i dad dekan na flinge i dad tnaluan.
21Mlé gamu fye di Amuito Dwata, kdeeyu mnè di langit, kdee saligan mimò i knayean.
22Mlé gamu fye di Amuito Dwata, kdeeyu mgimoan di klamang kagotan. Too mdà di nawagu mlé fye di Amugu Dwata!
