1Quil cxbisunwok tan yi e'chk takle'n cachi' yi na chiban yi e' mal nak. Quil tz'el nin italma' te yi e'chk takle'n yi na chicambaj yi e' mal naka'tz.
2Quil cxbisunwok tan paj, na ni'cu'n sbajok scye'j chi na ban jun buch yi jalcu'n na skej tan k'ej. Ni'cu'n sbajok scye'j chi na chiban e'chk wi' ujul yi na saj num tan k'ej.
3Ma na k'ukek itetz ic'u'l te Kataj. Banwok yi balaj. Cxnajank tzunwok le teri iluwar. Nin xclaxokwok ta'n.
4Joywok yi tzatzin yi na jal te Kataj. Stk'e' tzun i' cyakil yi na el italma' te'j.
5C'oxwok itib junawes tk'ab i'. K'ukek ic'u'l te'j, nin tz'ocopon tan ich'eye'nwok.
6Slajluchaxk tzun yi jicyuch te itajtza'kl. Na sclarink yi ibalajil ẍchiwutz wunak chi tane'n yi tkan skil.
7Pasens na taj tan ẍch'iwe'n yi tajbil Kataj. Ch'iwwok jalen yil tz'oc Kataj tan ich'eye'n. Quil chi'ch ic'u'l scye'j yi e' yi na jal chime'bi'l, yi e' yi na chiriquin tan yi e'chk cyajtza'kl cachi' yi na chiban.
8Quil tzitak'wok ama'l tetz jun bis, nka jun chi'ch c'u'lal, tan wane'n tzite'j. Na qui'c na tak', nin na xcye' tan ipitle'n nin tul il.
9Quil tzibanwok e'chk takle'na'tze'j. Ma na cho'n k'ukek ic'u'l te Kataj. Tzitetzaj tzun yi itanum. Ma yi e' mal nak chelepon laju'n swutz.
10Txant tan chisotze'n yi e' mal naka'tz. Pe nink cxo'cwok tan chijoyle'n qui't chijal ita'n.
11Poro yi e' c'ulutxum, ẍchinajank cyera'tz tul chi'ama'l. Sjalok cyakil yi tajwe'n scyetz. Nin ẍchitzatzink.
12Ma yi e' mal nak, ilenin na cho'c tan xtxumle'n yi mbil chiban scye'j yi e' balaj. Nin chin chiwutz nin na chiban scye'j.
13Poro yi Kataj tze'e'n tu' na ban i' scye'j yi e' mal naka'tz, na na el xtxum tetz yi ẍchisotzok cyera'tz.
14Yi e' mal naka'tz list quitane'n tu chispar tu c'oxbil chiflech tan chibiyle'n yi e' prow, yi e' yi at tajwe'n scyetz. List e' tan chisotzaje'n yi e' yi jicyuch te cyajtza'kl.
15Poro ite'n nin chispar xconk tan chibiyle'n cu'n. Nin wak'u'n cu'n sbne' yi c'oxbil chiflech.
16Yi mu'ẍ tal chime'bi'l yi e' me'ba', mas ba'n tcu'n swutz cyakil chime'bi'l yi e' ric.
17Na tz'ocopon Kataj tan chixite'n yi e' mal nak. Poro ilenin tz'ocopon tan quich'eye'n yi e' balaj.
18Na na oc i' tan chicolche'n yi e' yi qui na chijuch quil. Nin cyetz sbne' yi chi'ama'l tetz ben k'ej ben sak.
19Ej nin yil tz'ul c'a'laj tiemp ẍchiwutz, quil chitij q'uixc'uj. Nin yil tz'ul we'j, quil chiquim tan paj.
20Poro yi e' mal nak ẍchiquimok cyera'tz. Ẍchisotzok chi na ban tz'is yi na oc k'a'kl. Chelepon xit chi na ban sibel k'ak'.
21E' c'amol pwok poro qui't na chichoj. Ma yi e' balaj nak, na cyak' cyetz chipu'k, tan quich'eye'n yi e' yi at tajwe'n scyetz.
22Yi e' yi at banl Kataj squibaj, ẍchicambok cyera'tz te yi cyetz chi'ama'l. Ma yi e' yi qui'c banl Kataj squibaj, chelepon laju'n ta'n.
23I' na chajon chibe' yi e' balaj. Nin na che' col yi e' yi na tzatzin i' scye'j.
24Kol chisaj trimp, quil chicu' trimp junawes, na at nin Kataj tan chixicyle'n.
25Yi in wetz ja chintijin. Nimix tiemp wa'n tzone'j wuxtx'otx'. Poro qui'c jun tir yi jajk wil, yi jajk el jun balaj wunak te c'u'l Ryos. Nin cya'l nwilwit yi jajk cho'c yi e' tetz nitxajil tan rmosumi'n.
26Yi e' balaj naka'tz, ilenin na el chik'ajab scye'j yi e' mas wunak, nin tzatzin cu'n na cyak' c'mo'n scyetz. Nin yi cyetz chinitxajil chumbalaj nin e' ẍchiwutz yi e' mas wunak.
27Cyajswok cyen e'chk yab ajtza'kl. Nin banwok tane'n yi e'chk takle'n balaj. Cxtzatzink tzunwok cyakil tiemp.
28Na yi Kataj na pek' te e'chk balaj ajtza'kl. Nin qui na che' tilcyen yi e' yi cho'n k'uklij chic'u'l te i. Poro na chisotz yi e' mal nak ta'n, tuml chinitxajil.
29Ma yi e' balaj nak, scyetzaje' yi ama'l. Cyetz sbne' tetz ben k'ej ben sak.
30At xtxolbil chiyol yi e' balaj. Nin tz'aknak cu'n yi e'chk xtxolbil yi na cyal.
31At nin yi ca'wl Kataj te cyalma'. Nin qui na quil cyen. Qui tzun na chije' trimp.
32Ma yi e' mal nak na cho'c tan chixk'uke'n yi e' balaj, nin na chijoy puntiltz tan chibiyle'n cu'n.
33Poro quil tak' Kataj ama'l scyetz. Quil che' tak' yi e' balaj ẍchik'ab yi e' mal naka'tz. Nin quil tak' i' ama'l tetz jun juez tan tlol, yi e' aj paj, yi e' balaj nak.
34K'ukek bin ic'u'l te Kataj. Banwok tane'n yi tetz ca'wl. Sjalok tzun ik'ej swutz i', nin stk'e' i' yi ama'l tzitetz. Nin tziwutz cu'n yil che'l laju'n yi e' mal nak ta'n.
35Wilnak jun yaj yi chin juntlen nin yi tajtza'kl. Qui'c nin mu'ẍ pitz'pal yi jilon. Ja tocsaj tib i' nim ẍchiwutz cyakil wunak. Ni'cu'n ban tu jun chin wutzile'n wi' tze' yi wi'nin k'ab.
36Poro yi xone'n tiemp ja nicy'ak tan tilwe'n, poro qui'ct i' at. Ja injoy, poro qui't njal wa'n. Na nsken sotz.
37Poro ilwok nin yi e' balaj. Txumwok yi e' yi putzpuj chijilon. Ate' nin cyera'tz, nin ilenin chitzatzink cyera'tz.
38Ma yi e' pajol ca'wl, chixitok cyera'tz. Nin quil chitzatzin sbne' opon tunintz.
39Na yi Kataj at i' tan quich'eye'n yi e' balaj. Na oc i' tan chiq'uicy'le'n yi na ul pilbil cyetz.
40Na oc i' tan quich'eye'n, tan cyele'n liwr ẍchik'ab yi e' mal nak, na cho'n na cu' chiwutz tetz i' tan chiclaxe'n.
