1Idayaw ko si Diyos Apo sin am-in ay kabaelak ya nemnem ko. Idayaw ko din nasantoan ay ngadana.
2Adiak liw-an din ad-ado ay seg-ang na, isonga dadlonak daydayawen sisya.
3Pakawanena am-in ay basbasol ko ya agasana am-in ay sakit ko.
4Sin pese et omilislisi sisya. Bindisyonanas sak-en sin seg-ang ya layad na.
5Ad-ado ay pansigdan di idawat na sin inagew ay panbiyagak isnan daga ta say olay ed wani ay nakayak, kinmakaman din sigod ay pigsak ay kaman din titit ay napigsapigsa ay makwani en agila.
6Itonton Diyos din kalintegan di am-in ay mapalpaligatan.
7Inpaammo nan Moses din plano na, et inilan din Israelita din nakaskasdaaw ay inam-amag na.
8Si Diyos yan managlayad ya managseg-ang. Naanos ya din layad na et komakaman.
9Adi kanayonen Diyos din panyamyamana, ya adi na ililiget din ipogaw na.
10Din dosa ay idawat nan datako et mayap-ew mo is-o sin basol tako.
11Tan kaman din kakayang di ed daya isnan daga di kadakdaken din layad na sin mangipatpateg en sisya.
12Din basbasol tako et enggay pinakawana et palalo ay in-addawi na, kaman nan kaaddawin di belaan di agew sin kadiposana.
13Kaman din iyat di esay ama ay manegseg-ang sin anak na din iyat Diyos ay manegseg-ang sin mangipatpateg en sisya,
14tan ammo na dedan ay sin tapok di napoan tako, et nemnemena din pankapsotan tako.
15Din biyag tako et kaman din biyag di logam. Kaman sabsabong ay maila din kamapteng na sin sinkaattikan,
16tan madageman et makpit, mag-as et maliw-an.
17Ngem din layad Diyos sin mangipatpateg en sisya, adi manbalbaliw ya maga di gedeng na.
18Din adi manliwliw-an sin intolag na mo adi et tongtongpalen dan bilbilina, mantoltoloy din kinalinteg na enggana sin apo da.
19Insaad Diyos din panturayana ed daya, am-iam-in yan iturturayana.
20Dayawen yo si Diyos, dakayo ay napipigsa ya manakabalin ay anghel na, dakayo ay manmannge sin ibaga na ya manongtongpal sin bilina.
21Dayawen yo si Diyos, dakayo am-in ay wadad daya ay baa na ay mangon-onod sin panlaydana.
22Dayawen yos Diyos, dakayo am-in ay pinarsua na sin am-in ay lugar ay iturturayana. Dayawek si Diyos sin am-in ay nemnem ko.
