1Dawid sasawa Ne nuana uduudu mampe Iawe God wadaposisapa. Me ebowa kakaiwa wadaposisapa.
2Ne nuana uduudu mampe Iawe God wadaposisapa, ne walama uduudu me dewa eubu dewamona insamopina.
3Me ne kadiwana uduudu insadabuamode ita kerona uduudu inamode.
4Ne bo baiwantedino me inanen. Me ne nuawadawadanedie ita nuaparenaleidie dewa eubu mainawo dewamode.
5Ne inawaa wainepino me nitu eubu mampe ne sauneampa, ema epe inta ne apana sanaa mukamukaua seganteapa nene inamoia mukamukaua rua.
6Iawe God apana ewadabualala saumode ipawa me dewawa dodomana; me mo mampo kotuwa dodomana os dewasade.
7Me dima insedia umanawa Moses euwasan, me dewa pokawaa dewamone mukawa debama sabamosano Israel apanawa eweiena.
8Iawe God nuawa aiaisiwa ita nuaparelala, me mai tauwadea nuawa kadileipona, do me nuawadawadawa mai dialepi.
9Me mai no kadimba kainokaino eweipe enituidaneipona, dia, ita do me nuakadiwa mai winakasaleipona.
10No kadiwa dewasaitana baiwa me matangelaneipona, tane me no kadiwa dewasaitana mai ruaida sipoanepie matangelaidanepi.
11Mo mida me wiwirawantoia mampo me nuawadawadawa ipa debamaia winakasalala; nuawadawada sa ipa iono uba debama winedia rua.
12Omo wisedie nowa daumaia aleidie pamedia rua, epe rua me no kadimba riasadio nambeido aleide.
13Seda mambu obampa mampo nuawa aiaisiwa wandia rua, Iawe God mo mida me sawantoia mampo nuawa aiaisiwa wande,
14ipawa me atemba no popokau mampe dewanen, me atemba no mai apana mukamukaua, dia.
15No ipa beran rua tawo osowe wainitana, no beran kelontoie ita nonosintoia rua, walama kampaida os wainitana.
16Lanunu wiseidie suaubamode, ita tauwadea nonosintoio mai mida ewamoipona.
17Tane Iawe God nuawadawadawa ipa winakasalala, mo mida me sawantoie wiwirawantoia mampo me euda dewasade ita mo bedeuwo mida ando muntompa mampo winakasalepi,
18mo mida saua badowa wadeitue ita anaana sa ruawantoia.
19Iawe God uba dewasana me kolaiwatawa, osowe waine dewa uduudu oniamode.
20E ensel mukamukaua uduudu, Iawe God aiawa eteile ruawaitilana, e Iawe God wadaposisana.
21E uboo wanwanlala mukamukaua uduudu e mida me nolawa dewasailana, Iawe God wadaposisana.
22Dewa uduudu me dewamona uboo ita tawo osowe wineia, e uduudu Iawe God wadaposisana. Ne do nuana uduudu mampe Iawe God wadaposisapa.
