1Ilu' kaRyosil, ẍchaje'u' yi na cawunu'. Ticy'se'u' c'u'lu' scye'j yi e' juchul il.
2Na ilu' yi wi'tz pujul xtisya'. Che' cawsaju' bin yi e' yi na cyocsaj quib nim tu cyajtza'kl.
3Ta', ¿tona' nin chibisun noc yi e' mal naka'tz?
4Na cyakil yi e' mal naka'tz, qui na cyek ẍchi' jun, ma na e' cu'n tzolol yol. Ntin na cyocsaj quib nim tu cyajtza'kl.
5Ntin na chitzan tan chibuchle'n yi e' teru' tanumu' Ta'.
6Na na cho'c tan chibiyle'n cu'n yi e' xma'lca'n, scyuch' yi e' prow joylajil wunak, yi qui'c chinajbil. Ncha'tz yi e' tal me'ba' yi qui'c chitaj chitxu', na che'l cu'n cya'n swutz.
7“Qui na ko' til Ryos,” che'ch. “Qui na ko' til yi Ryosil Jacow,” che'ch.
8Txalpnak yi cyajtza'kl yi e' mal naka'tz. ¿Tona' nin lpujx cya'n?
9Yi jun yi nuc'ul te kaẍchin, ¿qui ptzun na tbit chiyol? Yi jun yi bnol te kawutz, ¿qui ptzun na til yi mbi na chiban?
10Iẍkaj qui tzunk chicawsij yi e' mal naka'tz tan yi jun yi na oc tan makle'n chiwutz cyakil yi e'chk nación. Iẍkaj qui tzunk na el xtxum yi jun yi ak'ol cyajtza'kl cyakil wunak te yi mbi na chitzan tan xtxumle'n.
11Poro yi mero bintzi i'tz yi na el xtxum Ryos te cyajtza'kl. Nin na el xtxum tetz yi qui'c xe' yi chitxumu'n.
12Wajcaw, ba'n cyeri yi e' yi na ocu' tan chinuc'le'n, tu yi e' yi na ocu' tan chichusle'n.
13Na iẍnin na chitzatzin cyera'tz yi na ul c'a'laj tiemp ẍchiwutz. Ma yi e' mal nak ja wi't kopxij chijulil cyera'tz.
14Poro Kataj Ryos quil che' til cyen yi e' tetz tanum. Nin quil che' til cyen yi e' yi ate' tk'ab.
15Na txant tan tpone'n yi k'ejlal tan cawune'n yi pujul xtisya' yi chin tz'aknak cu'n, nin cyakil yi e' balaj nak ẍchixomok te'j.
16Poro, ¿na' ltz'oc tan incolche'n ẍchik'ab yi e' mal naka'tz yi chin juntlen nin e'? Cya'l.
17Ma na ntin cu'n Ryos nchincolon. Na yi qui'k mo'c Ryos tan wuch'eye'n, ten klo' chinquim.
18At na ban cu'nt yi na je' jiẍp wukan. Poro na chin ẍch'eyaju' Ta', tan yi banl talma'u' swibaj.
19Yi na no'c wutz pe'm, qui't na pujx yi wajtza'kl wa'n. Poro na chin maysaju', nin na tak'u' tzatzin swetz.
20Poro qui'c rmeril tan cyamiwil quibu' tu jun juez yi na xom te yi tetz tajtza'kl, nin yi na oc tan contri'n te yi teru' ca'wlu'.
21Na yi e' cyetz, ntin na chijoy puntil tan chibuchle'n yi e' yi qui'c cyetz quil. Nin at na bant cu'n junawes na chiquim cya'n.
22Poro yi ilu' teru' Ta', ilu' colol wetz. Ni'cu'n ilu' tu jun wutzile'n c'ub kale na incol quent wib.
23Poro yi e' mal naka'tz, ite'n nin cyajtza'kl xcyek tan chixite'n cu'n. Na yi ketz kaRyosil stk'e' i' ama'l tan chicwe'n xit.
