1David i girumi Orau taputapunei Bada ana voepaepai. Wavana vivivireina ana voepaepai.
2Orau taputapunei Bada ana voepaepai, kaua aiaii i kauei aubaiu eḡa nuanuau ina vuru.
3Au ḡoʼapoapoe anatapui e notanota-tawanei, ma doria awarinei e vivilawaniu.
4Ata iraḡe ma i sinaepaiu ma nuavainei ma raunuapoapoelei e vivigulaueu.
5Au lawana au anatapuna purapura aiaii avai i verevereu, au vilaraga marana i raviravivouni me manubada.
6Bada ana kaua anatapuna jijimanina.
7Ana oga Moses i viatataiei, ma mai Israel Bada ana kaua vivirewapanai i ʼnanai.
8Bada raraunuapoapoena ma ivina aiaina, Eḡa laḡilaḡina amlona ita voḡaiḡai. Ana nuavaina maemae-nonoana.
9Eḡa mara nonoa ina enita, ma ana amloḡaiḡai eḡa ita mamae-nonoa.
10Anina da ita kovaḡa-kaueta, wate i raunuʼapoapoeleta da kovoḡa eḡa ḡaeḡaena ita verevereta.
11Dobu weka ma mara nore au tepadewadewana. Nanare, Bada ana nuavaina i rata guratana taui da Bada e vivivirei awarii.
12Mepa madeḡa e gogogolana da mepa e ḡaiḡairalana, lamna uama, ma nanare ata ḡoʼapoapoe vinimalana e vaivaitawana-naiei aueia.
13Me ama natunatuna e rarau-nuapoapoelei, nanare Bada natunatuna e rarau-nuapoapoelei.
14Aubaina i aramanei da tauta pokauei i kaueta.
15Ata mara au dobu lamna me modu. Ta gogogo ma ta rarata me berana moduei;
16Anina ma ive i uvena-kapupuei, eḡa ita mamae, ana gabu i kwakwava.
17Taui da Bada e voepaepai ana nuavaina maemae-nonoana awarii ma nanare noinoii ma ai epaepaia awarii
18taui aiavoi da ana parivainuaḡana bagibagina e vovojijini ma ana patupatutui tarawatu e vovojijini.
19Bada ana vigulau anikialana au mara i terei, ma kampa ana vigulau e vivibadei.
20Bada ana anela, vivirewapanami, Bada riwana o rarautaniḡanei ma o kaukauei, Bada ona voepaepai.
21Anina Bada ana anela marei, Bada ona voepaepai taumi ana taunola ma ana ḡoana anatapuna o kaukauei.
22Taumi anatapumi Bada uranei i kauei, ana au vigulau maemaei, Bada ona voepaepai. Tau nanare orau taputapunei Bada ana voepaepai.
